អាជ្ញាធរខណ្ឌពោធិ៍សែនជ័យ ចុះសំអាតស្ពានអាកាសថ្មើរជើងមុខផ្សារជម្ជូវ័ន បន្ទាប់ពីមានការរិះគន់ពីមហាជន

ក្រោយមានការរិះគន់នៅលើស្ពានអាកាសថ្មើរជើងមុខផ្សារជម្ជូវ័ន តាមបណ្តោផ្លូវជាតិលេខ៤ ភូមិជម្ជូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ថា មានក្រុមជនអនាថាយកសំរាម ខោអាវចាស់ៗមកចោលនៅទីនោះ មិនត្រឹមតែប៉ុណ្ណោះក្រុមទាំងនោះមកបន្ទោបង់ធ្វើឲ្យបរិស្ថានមិនស្អានដែលជាស្ពានសម្រាប់បងប្អូនប្រជាពលរដ្ឋរួមទាំងសិស្សានុសិស្សឆ្លងកាត់ ពេលនេះ​ត្រូវបាន​អាជ្ញាធរចុះសម្អាត  រួមទាំងឲ្យខាងក្រុមហ៊ុនស្លាកប៉ាណូដោះចេញមិនឲ្យដាក់ទៀតទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យើងសង្កេតឃើញថា ទីតាំងខាងលើកន្លងមកក្រុមជនអនាថាបានយកខោអាវចាស់ៗមកចោលនៅទីនោះ និងពេលខ្លះមកសម្រាកនៅទីនោះផងដែរ ធ្វើឲ្យបាត់បង់សណ្ដាប់ធ្នាប់ បរិស្ថាន  មិនត្រឹមតែប៉ុណ្ណោះ សិស្សានុសិស្សមួយចំនួនក៏លែងហ៊ានដើរឆ្លងកាត់ ព្រោះក្រុមជនអនាថាតែងតែដេករឺអង្គុយនៅទីនោះ។ ហើយកន្លងមកអាជ្ញាធរសង្កាត់ចោមចៅទី៣​តែងតែធ្វើការបោសសំអាត ​និងដេញជនអនាថា​ទាំងនោះមិនឲ្យមកសម្រាកនៅទីនោះទៀតទេ។ រហូតមកដល់ថ្មីៗ ក្រុមជនអនាថាទាំងនោះក៏បន្តមកទៀតមិនត្រឹមតែប៉ុណ្ណោះក្រុមទាំងនោះមកបន្ទោបង់ពាសពេញលើស្ពានទៀតផង ទើបនៅព្រឹកថ្ងៃទី៥  ខែឧសភា ឆ្នាំ២០២២នេះ អាជ្ញាធរ​បានចុះសំអាត និងហៅក្រុមហ៊ុនស្លាកប៉ាណូពាណិជ្ជកម្មដែលដាក់លើបង្កាន់ដៃស្ពានឲ្យដោះចេញទាំងអស់ ចៀសវាងមានការបិទបាំងងាយស្រួលក្រុមជនអនាថា​ទាំងនោះមកបន្តស្នាក់នៅទៀត៕

អត្ថបទ៖ សុខា