ព័ត៌មានជាតិ

ម្ដាយគ្រប់រូបគួរប្រុងប្រយ័ត្ន !រវល់លេងទូរស័ព្ទភ្លេចមើលកូន លង់ទឹកធុងក្នុងបន្ទប់ទឹកស្លាប់បាត់

បានផុស

៦ years មុន

នៅ

ថ្ងៃចន្ទ ២៨ ធ្នូ ២០២០

ដោយ

ក្មេងស្រីតូចទើបតែអាយុ១ឆ្នាំម្នាក់ បានស្លាប់បាត់បង់ជីវិត ក្រោយដាំក្បាលចូលក្នុងធុងដាក់ទឹក ក្នុងបន្ទប់ទឹក ខណៈដែលស្ត្រីជាម្ដាយរវល់លេងទូរស័ព្ទភ្លេចខ្លួន ។

ហេតុការណ៍នេះបានកើតឡើង កាលពីវេលាម៉ោង១១និង៣០នាទីព្រឹកថ្ងៃទី២៧ ខែធ្នូ ឆ្នាំ២០២០ នៅចំណុចបន្ទប់ជួល ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា ក្មេងស្រីរងគ្រោះដែលស្លាប់បាត់បង់ជីវិតនោះមានឈ្មោះ វ៉ៅ ស្រីនីត អាយុ១ឆ្នាំ មានម្ដាយឈ្មោះ ណុប គន្ធា ស្នាក់នៅក្នុងបន្ទប់ជួលកើតហេតុខាងលើ។

តាមការបញ្ជាក់ពីស្ត្រីជាម្ដាយក្មេងស្រីរងគ្រោះបានឲ្យដឹងថា មុនពេលកើតហេតុ ខ្លួនកំពុងចុចទូរស័ព្ទលេងនៅមុខបន្ទប់ ដោយកូនស្រីរបស់គាត់និងក្មេងៗដទៃទៀត លេងក្នុងបន្ទប់ ហើយក្រោយមកក្មេងៗដែលលេងជាមួយនោះ បាននាំគ្នាទៅផ្ទះវិញអស់ ដោយនៅតែកូនរបស់គាត់លេងតែម្នាក់ឯង។

ប្រភពដែលបានបន្តឲ្យដឹងទៀតថា ខណៈពេលដែលក្មេងៗលេងជាមួយកូនទៅផ្ទះអស់ ខ្លួនជាម្ដាយភ្លេចខ្លួនពុំបានចាប់អារម្មណ៍មើលកូនឡើយ ដោយបានលេងទូរស័ព្ទបន្តទៀត ។ លុះក្រោយមកទើបនឹកឃើញកូន ពេលទៅរកមើល ឃើញកូនដាំក្បាលចុះក្រោមចូលក្នុងធុងទឹក ដែលនៅក្នុងបន្ទប់ទឹក ដែលមានជម្រៅត្រឹមតែប្រមាណ២ទៅ៣តឹកប៉ុណណោះ ។

ក្រោយពីឃើញបែបនេះ ម្ដាយក៏បាននាំកូនទៅកាន់មន្ទីរពេទ្យ ដើម្បីជួយសង្គ្រោះប៉ុន្តែពេលទៅដល់គ្រូពេទ្យបានប្រាប់ថា កូនស្លាប់ហើយ ទើបដឹកកូនត្រឡប់ទៅផ្ទះវិញនិងរាយការណ៍ជូននគរបាលមូលដ្ឋានឲ្យចុះទៅពិនិត្យមើលតែម្ដង៕

អត្ថបទ ៖ សុខុម