តារាចម្រៀងប៉ុប Dolly Parton ឈ្នះរង្វាន់ ​១០០លានដុល្លារ ពីស្ថាបនិកក្រុមហ៊ុន Amazon

តារាចម្រៀងប៉ុប Dolly Parton បានទទួលរង្វាន់ ១០០លានដុល្លារ ពីកម្មវិធី Bezos Courage & Civility Award ដែលផ្តល់ដោយស្ថាបនិកក្រុមហ៊ុន Amazon.com គឺមហាសេដ្ឋី Jeff Bezos ។

កាលពីថ្ងៃទី១១ ខែវិច្ឆិកា ឆ្នាំ២០២២ កន្លងទៅថ្មីៗនេះ មហាសេដ្ឋី Jeff Bezos ដែលជាម្ចាស់ក្រុមហ៊ុនរ៉ុក្កែតអវកាស Blue Origin និងជាស្ថាបនិកក្រុមហ៊ុន Amazon បានប្រកាសពានរង្វាន់ “pursue solutions with courage and civility” ជូនដល់តារាចម្រៀងអាមេរិកាំង អ្នកស្រី ​Dolly Parton ​ដែលពានរង្វាន់នេះគិតជាទឹកប្រាក់មានចំនួន ១០០លានដុល្លារ។

រង្វាន់នេះ ត្រូវបានផ្ដល់ជូន ដោយសារតារាស្រីវ័យ ៧៦ឆ្នាំរូបនេះ ជាសកម្មជនសប្បុរសធម៌ដ៏សកម្ម។ នាពេលកន្លងមក​អ្នកស្រីធ្លាប់បរិច្ចាគ ១លានដុល្លារដល់មជ្ឈមណ្ឌលវេជ្ជសាស្ត្រនៃសាកលវិទ្យាល័យ Vanderbilt ដើម្បីជួយបង្កើតវ៉ាក់សាំង ក្នុងអំឡុងពេលជំងឺរាតត្បាតកូវីដ-១៩។ មិនតែប៉ុណ្ណោះ នៅក្នុងខែវិច្ឆិកានេះ Parton ត្រូវបានបញ្ចូលឈ្មោះទៅក្នុងកម្មវិធី Rock & Roll Hall of Fame ហើយអ្នកស្រីក៏បានបង្កើតអង្គការសប្បុរសធម៌ជាច្រើនរួមទាំងមូលនិធិ Dollywood ដែលផ្តោតលើការអប់រំ ក៏ដូចជាជួយដោះស្រាយវិបត្តិក្រីក្រផងដែរ។

គួរបញ្ជាក់ថា ពានរង្វាន់របស់មហាសេដ្ឋី Bezos ចាប់ផ្តើមតាំងពីឆ្នាំ២០០១ មកម្ល៉េះ ដោយរង្វាន់ដំបូងបានផ្ដល់ទៅសកម្មជន Van Jones ដែលបម្រើការជានាយកប្រតិបត្តិនៃកម្មវិធី REFORM Alliance៕

ប្រែសម្រួល៖ សន្យា

ចុចអាន៖ ឆ្នាំមុនលេចពាក្យចចាមអារ៉ាមស្នេហាជាមួយ​ Selena ពេលនេះ Chris ទាក់ទងគ្នាជាផ្លូវការនឹងតារាសម្ដែងព័រទុយហ្គាល់