សហគ្រាសជិត ៨ពាន់ បានចុះបញ្ជីនៅពន្ធដារ រយៈពេល ៧ខែឆ្នាំនេះ

អគ្គនាយកពន្ធដារ បានទទួលការស្នើសុំចុះបញ្ជីសរុបចំនួន ៩៤០០សហគ្រាស រយៈពេល ៧ខែ ឆ្នាំ ២០២៣ ក្នុងនោះ សហគ្រាសដែលបានអនុញ្ញាតឱ្យចុះបញ្ជីមានចំនួន ៧៨៥៧ ស្មើនឹង ៨៤ភាគរយ។

បើតាមអគ្គនាយកពន្ធដារ ការចុះបញ្ជីពន្ធ ជាមុខងារប្រតិបត្តិការស្នូលដ៏សំខាន់មួយ ដែលអគ្គនាយកដ្ឋានពន្ធដារ​តែងតែផ្តោតការយកចិត្តទុកដាក់ខ្ពស់ ព្រោះការចុះបញ្ជីពន្ធដារ គឺជាប្រភពទិន្នន័យដ៏​សំខាន់គាំទ្រដល់ការគ្រប់គ្រង​ការដាក់លិខិតប្រកាស ការធ្វើសវនកម្ម ការប្រមូលបំណុលពន្ធ និងបណ្ដឹងតវ៉ា និងការងារផ្សេងទៀត សំដៅប្រមូល​ចំណូល​ពន្ធប្រកបដោយតម្លាភាព និងប្រសិទ្ធភាព ពិសេសកែលម្អបរិយាកាសអាជីវកម្ម ធានាបាននូវការប្រកួត​ប្រជែងដោយស្មើភាព។

ទន្ទឹមនឹងការជំរុញការងារចុះបញ្ជី អគ្គនាយកដ្ឋានពន្ធដារ ក៏បានដាក់ចេញនូវវិធានការនានាដើម្បីធានាបានភាពត្រឹមត្រូវ​នៃការចុះបញ្ជី ដូចជាការចុះអង្កេតផ្ទាល់ដល់ទីតាំងជាដើម។ អគ្គនាយកដ្ឋានពន្ធដារ បានសង្កត់ធ្ងន់ថា នឹងបង្វែរការ​ស្នើសុំ ឬបដិសេធការស្នើសុំ ចុះបញ្ជីចំពោះសហគ្រាសដែល មិនបានបំពេញព័ត៌មាន និងផ្ដល់ឯកសារភ្ជាប់ត្រឹមត្រូវ, មិនគោរពតាម​លក្ខខណ្ឌតម្រូវរបស់រដ្ឋបាលសារពើពន្ធ ជាប់ទាក់ទិននឹងសហគ្រាស ឬសមាគម ឬអង្គការនានា ដែលមានជំពាក់បំណុលពន្ធ, សហគ្រាសមិនមានទីតាំង ឬទីកន្លែងធ្វើអាជីវកម្មជាប់លាប់ និងកន្លែងធ្វើសកម្មភាព អាជីវកម្មមិនសមស្រប នឹងកម្មវត្ថុអាជីវកម្មដែលបានស្នើសុំ ជាដើម។

កំណើននៃការស្នើសុំចុះបញ្ជីរបស់សហគ្រាស គឺជាសញ្ញាល្អក្នុងការប្រមូលពន្ធរបស់អគ្គនាយកដ្ឋានពន្ធដារ។ ជាក់ស្តែងរយៈពេល ៧ខែ ឆ្នាំ២០២៣ ចំណូលពន្ធ-អាករ ដែលពន្ធដារ ប្រមូលបានមានចំនួន ៩ ៣៦៧,៤៤ ប៊ីលានរៀល (ប្រមាណជា ២ ៣១២,៩៥ លានដុល្លារ) ស្មើនឹង ៦៤,៧៦% នៃផែនការច្បាប់ស្តីពីហិរញ្ញវត្ថុ​សម្រាប់​ការគ្រប់គ្រងឆ្នាំ២០២៣។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់កម្ពុជាថ្មីថា ចំណូលពន្ធផ្ទៃក្នុងកើន មានន័យថា កំណើនសេដ្ឋកិច្ចល្អប្រសើរ។ «កាលណាចំណូលផ្ទៃក្នុងកើនឡើង គឺជាក្តីរំពឹង និងសប្បាយរីករាយរបស់រដ្ឋ និងប្រជា​ពលរដ្ឋ ព្រោះរដ្ឋមានថវិកា សម្រាប់ទ្រទ្រង់ហេដ្ឋារចនាសម្ព័ន្ធផ្សេងៗ ដើម្បីអភិវឌ្ឍសង្គមជាតិ»។ អនុប្រធានសភា​ពាណិជ្ជកម្មកម្ពុជា ​បានបន្តថា ចំណូលពន្ធនេះ មានសារៈសំខាន់ណាស់ ទាំងចំណូលពន្ធដារ និងពន្ធគយ។

បើតាមអ្នកឧកញ៉ា លឹម ហេង វិស័យដែលផ្តល់ចំណូលខ្ពស់សម្រាប់ពន្ធដារ មានដូចជា វិស័យឧស្សាហកម្ម សេវាកម្ម ពាណិជ្ជកម្ម និងអចលទ្រព្យ ជាដើម៕