លោក Nasser Al-Khelaifi ថា PSG ជាក្លិបល្អបំផុតសម្រាប់ Mbappe

ប្រធានក្លិប Paris Saint-Germain លោក Nasser Al-Khelaifi ចង់ឱ្យខ្សែប្រយុទ្ធ Kylian Mbappe បន្តស្នាក់នៅជាមួយក្រុម​ទៀត​ដើម្បី​សម្រេចសមិទ្ធផលធំៗនៅ​ពេល​ខាង​មុខ​ ខណៈថ្មីៗនេះលេចឮព័ត៌មានថា រូបគេគ្រោងចាកចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារា​បាល់ទាត់​ឆ្នើម Mbappe នៅសល់កុងត្រាតែរយៈពេល៦ខែប៉ុណ្ណោះ​ជាមួយក្លិប PSG ដែលមានន័យថា រូបគេនឹងមានសេរីភាពក្នុងការចរចាជាមួយក្លិបផ្សេងទៀត​សម្រាប់​លក្ខខណ្ឌ​ផ្ទេរដោយគ្មានតម្លៃនៅរដូវក្តៅនេះ បើសិនកីឡាកររូបនេះមិនព្រមបន្តកុងត្រា។ ក្លិបយក្ស​អេស្ប៉ាញ​ Real Madrid នៅតែ​ចិញ្ចឹម​ចិត្ត​ក្នុងការចុះហត្ថលេខា​យកកីឡាករ​វ័យ​២៥ឆ្នាំ បើ​ទោះ​ជាបរាជ័យ​ជា​ច្រើន​លើក។

លោក Al-Khelaifi ប្រធានក្លិប PSG បាននិយាយថា ៖«ខ្ញុំមិនមានអ្វីត្រូវលាក់បាំងទេ។ ខ្ញុំពិតជាចង់ឲ្យ Kylian ស្នាក់​នៅ​ទីនេះបន្ត។ កីឡាករល្អបំផុតក្នុងពិភពលោកគឺ Kylian ហើយក្លិបល្អបំផុតសម្រាប់គាត់គឺ Paris។ គាត់​ជាចំណុចសំខាន់​នៃ​គម្រោង​របស់​យើង។ គាត់មានកន្លែងហ្វឹកហាត់ដ៏ល្អបំផុតនៅក្នុងពិភពលោក ជាមួយ​គ្រូបង្វឹកដ៏ល្អបំផុតនៅលើពិភពលោក Luis Enrique។ ជារៀងរាល់ឆ្នាំ គាត់ប្រាកដជាបានលេងនៅ Champions League។ យ៉ាងហោចណាស់ក៏ត្រឹមវគ្គ១៦ក្រុមចុងក្រោយដែរ ហើយអាចឈានវគ្គ៨ក្រុមចុងក្រោយ សូម្បីតែវគ្គពាក់កណ្តាលផ្តាច់ព្រ័ត្រ ឬវគ្គផ្តាច់ព្រ័ត្រ។ ពួកយើងជាក្លិបធំមួយនៅទីនោះ»។

Mbappe ស៊ុតបាន២៥គ្រាប់ក្នុងការបង្ហាញខ្លួន២៤លើក ក្នុងការប្រកួតទាំងអស់នៅរដូវកាលនេះ។ កាល​ពីថ្មីៗ​មានព័ត៌មាន​ថា រូបគេនឹង​ចូលរួមជាមួយ​អធិរាជស Real Madrid នៅពេល​ផុតកុងត្រាជាមួយក្លិប Paris Saint-Germain៕

ប្រែសម្រួល៖ ផា រតនា
ប្រភព៖ Theathletic