យន្តហោះក្រុមហ៊ុនអាកាសចរណ៍ United Airlines ឆេះម៉ាស៊ីន ខណ:កំពុងហោះលើអាកាស

ជើងហោះហើរ United Airlines ពី Houston ទៅកាន់ Fort Myers រដ្ឋ Texas ត្រូវបានបង្ខំឱ្យវិលចុះចតវិញ ដោយសារម៉ាស៊ីនមួយ នៃយន្តហោះបានឆេះ ខណ:ពេលកំពុងហោះហើរ ដែលករណីនេះបានកើតឡើងកាលពីថ្ងៃច័ន្ទ ទី៤ ខែមីនា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថានីយ៍ទូរទស្សន៍ KTRK-TV ដែលមានទីស្នាក់ការនៅទីក្រុង Houston បានផ្សាយនៅថ្ងៃទី៧ ខែមីនា នេះថា យន្តហោះខាងលើប្រភេទ Boeing ៧៣៧ ជើងហោះហើរ ១១១៨ ផ្ទុកអ្នកដំណើរចំនួន ១៦៧នាក់ ហើយភាគច្រើននៃអ្នកដំណើរទាំងនោះ សុទ្ធតែថតបានសកម្មភាពភ្លើងឆេះម៉ាស៊ីនយន្តហោះនេះ ។

លោក David Gruninger ដែលជាអ្នកដំណើរបាននិយាយថា៖ «ខ្ញុំចាំថាមានពន្លឺភ្លឺចាំងមកតាមបង្អួច ហើយវាបន្លឺសំឡេងដូចគ្រាប់បែក ហើយបន្ទាប់មកមានអណ្ដាតភ្លើងឆេះចេញតែម្ដង» ។

យោងតាមរបាយការណ៍ពី FlightAware បានឱ្យដឹងថា យន្តហោះខាងលើគ្រោងហោះហើរចេញពីអាកាសយានដ្ឋានអន្តរទ្វីប George Bush នៅម៉ោង ៦: ៤០នាទី ល្ងាច ប៉ុន្តែជាក់ស្ដែង វាបានប្រែក្លាយទៅហោះនៅម៉ោង ៦:៥២នាទី ល្ងាចវិញ។ ហើយបន្ទាប់ពីហោះចេញបានរយ:ពេល ៣៣នាទី វាក៏បានត្រឡប់មកវិញ ដោយសារមានបញ្ហាឆេះម៉ាស៊ីនផ្នែកខាងឆ្វេង ។

ជាមួយគ្នានេះ បើយោងតាម អ៊ីមែលពី United Airlines ដែលបានផ្ញើទៅកាន់អ្នកដំណើរទាំងអស់ បានឱ្យឃើញថា ក្រុមហ៊ុនបានផ្ដល់ជូនអ្នកដំណើរនូវទឹកប្រាក់ចំនួន ២០០ដុល្លារ និងប័ណ្ណអាហារ ១៥ ដុល្លារ។ ហើយក្រុមហ៊ុនអាកាសចរណ៍ខាងលើ បាននិយាយនៅក្នុងសេចក្តីថ្លែងការណ៍មួយថា “យើងបានរៀបចំសម្រាប់យន្តហោះថ្មីមួយដើម្បីដឹកអតិថិជនរបស់យើងទៅកាន់គោលដៅរបស់ពួកគេ ដែលចេញដំណើរទៅកាន់ Fort Myers នៅល្ងាចថ្ងៃដដែលនោះ”។

សូមបញ្ជាក់ថា ឧបទ្ទវហេតុខាងលើ មិនបង្កឱ្យមានរបួសដល់អ្នកដំណើរ និងសហនាវិកណាម្នាក់ឡើយ ៕

ប្រែសម្រួលដោយ÷ ប៉ោ កុសល