ព័ត៌មានអន្ដរជាតិ

នាវាដឹកប្រេងរុស្ស៊ី២គ្រឿងក្រឡាប់នៅសមុទ្រខ្មៅ

បានផុស

១ year មុន

នៅ

ថ្ងៃចន្ទ ១៦ ធ្នូ ២០២៤

ដោយ

នាវាដឹកប្រេង២គ្រឿងរបស់ប្រទេសរុស្ស៊ីបានក្រឡាប់នៅក្នុងសមុទ្រខ្មៅបណ្តាលឱ្យមានការធ្លាយប្រេង និងរងការខូចចខាតយ៉ាងធ្ងន់ធ្ងរ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១៦ខែធ្នូនេះ។

វីដេអូដែលចេញផ្សាយដោយការិយាល័យអាជ្ញាធរដឹកជញ្ជូនភាគខាងត្បូងនៃប្រទេសរុស្ស៊ី បានបង្ហាញឱ្យឃើញនូវស្នាមរបស់នាវាដឹកប្រេងមួយគ្រឿងបានដាច់ទាំងស្រុង ជាមួយនឹងស្រទាប់ប្រេងដែលអាចមើលឃើញនៅក្នុងទឹក។ យ៉ាងហោចណាស់សមាជិកនាវិកម្នាក់ត្រូវបានគេរាយការណ៍ថាបានស្លាប់ក្នុងហេតុការណ៍នេះ។

ឧបទ្ទវហេតុនេះបានកើតឡើងនៅច្រកសមុទ្រ Kerch ដែលបំបែកប្រទេសរុស្ស៊ីពីឧបទ្វីបគ្រីមៀ របស់អ៊ុយក្រែនដែលត្រូវបានបញ្ចូលដោយខុសច្បាប់ដោយទីក្រុងម៉ូស្គូក្នុងឆ្នាំ២០១៤។

ប្រតិបត្តិការជួយសង្គ្រោះដោយប្រើទូកអូស ឧទ្ធម្ភាគចក្រ និងបុគ្គលិកជាង ៥០ នាក់ និងជួយសង្គ្រោះបានសមាជិកនាវិក ១៣ នាក់ត្រូវបានជួយសង្គ្រោះពីនាវាដឹកប្រេងមួយ មុនពេលត្រូវបានផ្អាកដោយសារតែអាកាសធាតុអាក្រក់ ខណៈនៅមានសមាជិកនាវិក១៤នាក់ផ្សេងទៀតនៅលើនាវាដឹកប្រេងទីពីរ។

ប្រធានាធិបតី វ្ល៉ាឌីមៀ ពូទីន បានបញ្ជាឱ្យបង្កើតក្រុមការងារមួយ ដើម្បីដោះស្រាយឧប្បត្តិហេតុនេះ ដែលដឹកនាំដោយឧបនាយករដ្ឋមន្ត្រី Vitaly Savelyev ហើយអាជ្ញាធរកំពុងស៊ើបអង្កេតចំពោះការធ្វេសប្រហែសព្រហ្មទណ្ឌ។

បើតាមលោកMichelle Bockmann អ្នកវិភាគនៅទស្សនាវដ្តីឧស្សាហកម្មដឹកជញ្ជូន Lloyd’s List បានប្រាប់ BBC ថានាវាទាំងពីរជាកម្មសិទ្ធិរបស់ក្រុមហ៊ុន Volgatanker ហើយមានទំហំតូច។ ពួកគេបានដឹកប្រេងទម្ងន់ប្រហែល ៤៣០០ តោនក្នុងនាវានីមួយៗ។

លោក Bockmann បាននិយាយថា នាវាដឹកប្រេងដែលប្រើសម្រាប់ការជួញដូរប្រេងឆៅរបស់រុស្ស៊ីជាអន្តរជាតិជាទូទៅមានសមត្ថភាពផ្ទុកលើសទម្ងន់ប្រហែល ១២០០០០ តោន ដែលមានន័យថា វាទំនងជាកប៉ាល់ដឹកប្រេងទាំងនេះត្រូវបានប្រើប្រាស់សម្រាប់ដឹកជញ្ជូនប្រេងតាមទន្លេរបស់រុស្ស៊ី ឬក្នុងទឹកសមុទ្រ។

គួរបញ្ជាក់ថាច្រក Kerch គឺជាផ្លូវដ៏សំខាន់សម្រាប់ការនាំចេញគ្រាប់ធញ្ញជាតិរបស់រុស្ស៊ី ហើយវាក៏ត្រូវបានប្រើប្រាស់សម្រាប់ការនាំចេញប្រេងឆៅ ប្រេងឥន្ធនៈ និងឧស្ម័នធម្មជាតិរាវផងដែរ។ ក្នុងឆ្នាំ២០០៧ នាវាដឹកប្រេងមួយទៀតគឺ Volgoneft-139 បានបាក់ពាក់កណ្តាលក្នុងអំឡុងពេលព្យុះមួយខណៈពេលដែលបោះយុថ្កាពីច្រកសមុទ្រ Kerch ដោយបានកំពប់ប្រេងជាង ១០០០តោន។

ការនាំចូលប្រេងពីរុស្ស៊ីត្រូវបានសម្ព័ន្ធមិត្តអ៊ុយក្រែនដាក់ទណ្ឌកម្មយ៉ាងខ្លាំងចាប់តាំងពីវិមានក្រឹមឡាំងបានបញ្ជាឱ្យវាយលុកពេញលេញក្នុងប្រទេសក្នុងខែកុម្ភៈ ឆ្នាំ២០២២។ ក្នុងរយៈពេលប៉ុន្មានឆ្នាំចុងក្រោយនេះ រុស្ស៊ីត្រូវបានចោទប្រកាន់ថាបានប្រើប្រាស់នូវអ្វីដែលហៅថា កងនាវាដឹកប្រេងខ្មោច ដែលជារឿយៗត្រូវបានថែទាំមិនបានល្អ និងខ្វះការធានារ៉ាប់រងត្រឹមត្រូវ ដើម្បីផ្លាស់ទីប្រេង និងគេចចេញពីការដាក់ទណ្ឌកម្ម៕