កីឡា

យប់នេះ ព្រះខ័នរាជស្វាយរៀង ត្រូវការពិន្ទុពីក្រុមកំពូលតារាង Makassar

បានផុស

១ year មុន

នៅ

ថ្ងៃពុធ ៨ មករា ២០២៥

ដោយ

ក្រុមបាល់ទាត់ព្រះខ័នរាជស្វាយរៀងត្រូវបើកទ្វារពហុកីឡដ្ឋានជាតិអូឡាំពិក ទទួលភ្ញៀវមកពីប្រទេសឥណ្ឌូណេស៊ី PSM Makassar FC វេលាម៉ោង៧:៣០នាទីយប់ ថ្ងៃទី៨ ខែមករា ឆ្នាំ២០២៥ វគ្គសន្សំពិន្ទុក្នុងពូល A ពានរង្វាន់ ASEAN Club Championship ២០២៤-២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាជាការប្រកួតដ៏សំខាន់ និងចាំបាច់ត្រូវស្វែងរកឲ្យបានពិន្ទុដាច់ខាតសម្រាប់ម្ចាស់ផ្ទះ ព្រះខ័នរាជស្វាយរៀង បន្ទាប់ពីពីរប្រកួតកន្លងទៅឈ្នះ១ និងចាញ់១ មាន៣ពិន្ទុ កំពុងស្ថិតនៅលេខ៤ក្នុងពូល។ ចំណែកក្រុមរបស់ឥណ្ឌូណេស៊ី PSM Makassar FC កំពុងឈរលើកំពូលតារាងដោយមាន៤ពិន្ទុ បន្ទាប់ពីឈ្នះ១ និងស្មើ១។

ក្នុងសន្តិសីទសារព័ត៌មានមុនការប្រកួតកាលពីព្រឹកថ្ងៃទី៧ ខែមករា ឆ្នាំ២០២៥ លោក Bernardo Tavares គ្រូបង្វឹកក្រុម PSM Makassar FC បានសរសើរពីភាពខ្លាំងក្នុងដីរបស់ព្រះខ័នរាជស្វាយរៀងដែលមិនទាន់ស្គាល់បរាជ័យក្នុងការប្រកួតលីគកំពូលកម្ពុជា ខណៈក្រុមរបស់លោកធ្វើមិនសូវបានល្អទេក្នុងលីគនារយៈពេលចុងក្រោយ។

លោកបាននិយាយថា ៖«ការប្រកួតក្រៅដីពីរលើកក្នុងពាន ASEAN Club Championship ព្រះខ័នរាជស្វាយរៀងធ្វើបានល្អគឺឈ្នះ Terengganu នៅប្រទេសម៉ាឡេស៊ី និងចាញ់ BG Bathum United នៅថៃ តែយើងឃើញហើយ ការប្រកួត៣០នាទីចុងក្រោយនៅថៃ ព្រះខ័នរាជស្វាយរៀងធ្វើបានល្អមែនទែនទោះបីជាពួកគេចាញ់»។

លោកបន្តថា ក្រុមរបស់លោកនឹងពិបាកស្វែងរកពិន្ទុពីក្រុមរបស់កម្ពុជា ពីព្រោះពួកគេមិនដែលចាញ់សោះក្នុងការប្រកួតក្នុងដី និងមានទម្រង់លេងប្រែប្រួលច្រើន។ ពួកគេមានកីឡាករល្អៗច្រើន បើទោះបីជាមានកីឡាករបរទេសខ្លះរបួសក៏ដោយ។ ជាក់ស្តែង ញាណ សុស៊ីដាន ជាកីឡាករដ៏ល្អ និងមានគុណភាព ប៉ុន្តែបែរជាមិនសូវបានលេងញឹកញាប់ទៅវិញ ដូច្នេះមានន័យថា កីឡាករផ្សេងៗទៀតសុទ្ធតែល្អ។

ជាមួយគ្នានេះ គ្រូបង្វឹកព្រះខ័នរាជស្វាយរៀង លោក Jose Munoz បានឲ្យដឹងថា កីឡាករសំខាន់មួយចំនួនបានរបួសដូចជា គឹម សុខយុទ្ធ, Bablo និង Ryo Fujii ជាដើម ប៉ុន្តែនៅមានកីឡាករល្អៗជាច្រើនទៀតដែលអាចលេងបាន។

លោកបានបញ្ជាក់ថា ការប្រកួតនេះគឺជាឱកាសល្អសម្រាប់កីឡាករកម្ពុជាបង្ហាញសមត្ថភាពលើឆាកអន្តរជាតិ បន្ទាប់ពីកីឡាករបរទេសសំខាន់របួសមិនអាចលេង។

បន្ទាប់ពីឈ្នះ១ និងចាញ់១ មាន៣ពិន្ទុ ព្រះខ័នរាជស្វាយរៀង ត្រូវការពិន្ទុជាចាំបាច់ដើម្បីបង្កើនក្តីសង្ឃឹមកាន់តែច្រើនក្នុងការលើកទៅកាន់វគ្គពាក់កណ្តាល ខណៈនេះជាការប្រកួតក្នុងដីលើកដំបូង។ សម្រាប់ពីរប្រកួតទៀត ព្រះខ័នរាជស្វាយរៀងនឹងធ្វើដំណើរទៅទឹកដីវៀតណាមជួបក្រុម Dong A Thanh Hoa នៅថ្ងៃទី២២ ខែមករា និងចុងក្រោយទទួលក្រុមមីយ៉ាន់ម៉ា Shan United នៅថ្ងៃទី៥ ខែកុម្ភៈ នៅពហុកីឡដ្ឋានជាតិអូឡាំពិក រាជធានីភ្នំពេញ៕

ពិន្ទុបណ្តោះអាសន្ន