ការផឹកទឹកមួយប្រភេទ អាចបំផ្លាញខួរក្បាល ថ្លើម តម្រងនោម និងជាមេបង្កកោសិកាមហារីក

កាលពីពេលថ្មីៗនេះ លោកវេជ្ជបណ្ឌិត Tien Chinh Hoang ប្រធានមជ្ឈមណ្ឌលការពារ និងព្យាបាលជំងឺថ្លើម និងថង់ទឹកមាត់ នៃមន្ទីរពេទ្យ Chang Gung Memorial នៅតៃវ៉ាន់ បានព្រមានថា ការផឹកទឹកក្នុងដបប្លាស្ទិក និងពែងប្លាស្ទិក អាចបណ្តាលឲ្យភាគល្អិតមីក្រូប្លាស្ទីកចូលទៅក្នុងខ្លួនបានយ៉ាងងាយ។

វេជ្ជបណ្ឌិតរូបនេះបាននិយាយថា ការស្រាវជ្រាវដែលបានចេញផ្សាយនៅក្នុងទស្សនាវដ្តី Environmental Science and Technology បានរកឃើញថា អ្នកដែលផឹកទឹកដបជាទៀងទាត់អាចលេបបាន ៩ម៉ឺនភាគល្អិតមីក្រូប្លាស្ទីកបន្ថែមទៀតជារៀងរាល់ឆ្នាំ ខណៈដែលអ្នកដែលផឹកចេញទឹកពីក្បាលម៉ាស៊ីន លេបតែភាគល្អិតមីក្រូប្លាស្ទិកប្រហែល ៤ពាន់ប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែក ការសិក្សាមួយផ្សេងទៀតដែលត្រូវបានចេញផ្សាយនៅក្នុងទិនានុប្បវត្តិ Nature Medicine ក្នុងខែកុម្ភៈ ឆ្នាំ ២០២៥ ក៏បានបញ្ជាក់ថា ផលប៉ះពាល់នៃមីក្រូប្លាស្ទិកលើរាងកាយមនុស្សកាន់តែធ្ងន់ធ្ងរពីមួយឆ្នាំទៅមួយឆ្នាំ។

ក្រុមស្រាវជ្រាវមកពីនាយកដ្ឋានវិទ្យាសាស្ត្រឱសថនៅសាកលវិទ្យាល័យ New Mexico សហរដ្ឋអាមេរិក បានវិភាគសំណាកសរីរាង្គពីមនុស្ស ២៨ នាក់ដែលបានស្លាប់ក្នុងឆ្នាំ ២០១៦ និងមនុស្ស ២៤ នាក់ដែលបានស្លាប់នៅឆ្នាំ ២០២៤។

ជាលទ្ធផល អ្នកស្រាវជ្រាវបានរកឃើញមីក្រូប្លាស្ទិកនៅក្នុងខួរក្បាល ថ្លើម និងតម្រងនោមរបស់ពួកគេ។ ក្នុងចំណោមនោះ បរិមាណនៃភាគល្អិតមីក្រូប្លាស្ទីកនៅក្នុងខួរក្បាលគឺ ៧ទៅ៣០ ដង ខ្ពស់ជាងបរិមាណនៃភាគល្អិតមីក្រូប្លាស្ទីកដែលមាននៅក្នុងថ្លើម និងតម្រងនោម។ បរិមាណនៃភាគល្អិតមីក្រូប្លាស្ទិកនៅក្នុងខួរក្បាលរបស់មនុស្ស ដែលបានស្លាប់ក្នុងឆ្នាំ ២០២៤បានកើនឡើង ៥០% បើប្រៀបធៀបទៅនឹងអ្នកដែលបានស្លាប់ក្នុងឆ្នាំ ២០១៦។ ក្រុមស្រាវជ្រាវក៏បានរកឃើញថា បរិមាណនៃភាគល្អិតមីក្រូប្លាស្ទិកនៅក្នុងខួរក្បាលរបស់មនុស្សមាននិន្នាការកើនឡើងយ៉ាងខ្លាំងតាមពេលវេលា។

មិនតែប៉ុណ្ណោះ វេជ្ជបណ្ឌិតតៃវ៉ាន់បានបញ្ចាក់បន្ថែមទៀតថា មីក្រូប្លាស្ទិកអាចជាអ្នកសមគំនិតក្នុងជំងឺមហារីកពោះវៀនធំ។ ដូច្នោះហើយ អ្នកស្រាវជ្រាវបានរកឃើញថា ភាគល្អិតមីក្រូប្លាស្ទិកអាចកកកុញនៅក្នុងកោសិកាមហារីកពោះវៀនធំ បង្កើនចលនាកោសិកា និងអាចជំរុញការរីករាលដាលនៃជំងឺមហារីកអំឡុងពេលធ្វើតេស្ត។

វេជ្ជបណ្ឌិតនិយាយថា បច្ចុប្បន្ននេះ ភាគល្អិតមីក្រូប្លាស្ទីកអាចបំពុលបរិយាកាស និងប៉ះពាល់ដល់ប្រព័ន្ធអេកូឡូស៊ីដោយសមុទ្រ។ ពួកគេអាចចូលទៅក្នុងខ្សែសង្វាក់អាហាររបស់មនុស្ស ហើយចូលទៅក្នុងខ្លួនរបស់យើង។ ដោយរូបលោកបាន ណែនាំថា ការប្រើប្រាស់អាហារវេចខ្ចប់ក្នុងថង់ប្លាស្ទិក ពែងប្លាស្ទិក ជាពិសេសអាហារក្តៅ ដូចជាស៊ុប កាហ្វេ តែក្តៅជាដើម ក៏អាចបង្កភាពងាយស្រួលដល់ភាគល្អិតមីក្រូប្លាស្ទិកចូលក្នុងខ្លួនផងដែរ។

ដូច្នេះហើយ អ្នកជំនាញសុខភាពណែនាំថា ដើម្បីកាត់បន្ថយហានិភ័យ ប្រជាពលរដ្ឋគួរកំណត់ការប្រើប្រាស់ប្រអប់ប្លាស្ទិក ពែងប្លាស្ទិក ពែងក្រដាសដែលអាចចោលបាន ថង់ប្លាស្ទិកជាដើម ដើម្បីទុកដាក់អាហារ ឬរបស់ប្រើប្រាស់ចាំបាច់។ ជំនួសមកវិញ មនុស្សគួរតែប្រើដបដាក់ទឹកក្ដៅ, ពែងកែវ,ប្រអប់ថ្មឬដែក ដើម្បីទុកអាហារ និងប្រើថង់ក្រណាត់ដើម្បីទុកឧបករណ៍ប្រើប្រាស់៕

អត្ថបទ៖ សាង ស្រីល័ក្ខ

ចុចអាន៖មិនបាច់​ចាយ​ប្រាក់កាសច្រើន​ ទទួលទានតែភេសជ្ជៈ​មួយឲ្យទៀងទាត់ ដូចប្រឆាំង​មហារីក