ព័ត៌មានជាតិ

ក្នុងមួយថ្ងៃសមត្ថកិច្ចរកឃើញគ្រាប់យុទ្ធភណ្ឌមិនទាន់ផ្ទុះ៣ទីតាំងផ្សេងគ្នារាប់រយគ្រាប់

បានផុស

៥ years មុន

នៅ

ថ្ងៃអង្គារ ២៣ មីនា ២០២១

ដោយ

តាមរបាយការណ៍ដែលកម្ពុជាថ្មីទទួលបានពីសមត្ថកិច្ចនៅថ្ងៃទី២៣ ខែមីនា ឆ្នាំ២០២១នេះបានឲ្យដឹងថា គ្រាប់យុទ្ធមិនទាន់ផ្ទុះដែលបានប្រទះឃើញនៅលើទីតាំងទី១ គឺនៅព្រឹកថ្ងៃទី២៣ ខែមីនានេះនៅចំណុចវត្តបុរាណនិវេសន៍(ហៅវត្តគាស់ក្រឡ) ស្ថិតក្នុងភូមិមុខវត្ត ឃុំគាស់ក្រឡ ស្រុកគាស់ក្រឡខណៈដែលព្រះសង្ឃគង់ក្នុងវត្តបានជីកកាយដីដើម្បីដាក់លូធ្វើបង្គន់អនាម័យ បានប្រទះឃើញគ្រាប់មិនទាន់ផ្ទុះប្រភេទ(PKF)ចំនួន១៦កេះស្មើនឹង៤០០០គ្រាប់(ផលិតនៅប្រទេសឣាមេរិច)។

តាមការពិនិត្យជាក់ស្តែងគ្រាប់ទាំងនោះឣាចកប់ក្នុងសម័យសង្គ្រៀមលន់នល់ ហើយខូចគុណភាពប្រហែល៩០%នេះបើយោងតាមការបញ្ជាក់ពីសមត្ថកិច្ចជំនាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពដដែលបន្តថា គ្រាប់យុទ្ធភណ្ឌដែលប្រទះឃើញលើទីតាំងទី២នៅព្រឹកថ្ងៃដដែល នៅវេលាម៉ោង៨:០០នាទីមានចំនួន២៩គ្រាប់ខណៈដែលមានប្រជាកសិករជាម្ចាស់ស្រែឈ្មោះ រឿម គង់ ភេទប្រុសអាយុ៤២ឆ្មាំរស់នៅភូមិថ្មី ឃុំកន្ទឺ១ ស្រុកបាណន់បានមករាយការណ៍ឲ្យនគរបាលប៉ុស្តិ៍ថាបានឃើញគ្រាប់នៅក្នុងដំបូកក្នុងស្រែរបស់ខ្លួន។ ក្រោយពីកម្លាំងប៉ុស្តិ៍បានទៅត្រួតពិនិត្យឃើញគ្រាប់មានចំនួន២៩គ្រាប់ក្នុងនោះមាន:គ្រាប់60mm១៩គ្រាប់,គ្រាប់DK82ចំនួន៤គ្រាប់,គ្រាប់80mmចំនួន៤គ្រាប់,គ្រាប់75mmចំនួន០១គ្រាប់និងគ្រាប់B40ចំនួន០១គ្រាប់។

ចំណែកគ្រាប់យុទ្ធភណ្ឌដែលប្រទះឃើញលើទីតាំងទី៣ក្នុងថ្ងៃដដែលនៅវេលាម៉ោង១០:០០នាទីបានប្រទះឃើញចំនួន០៦គ្រាប់ខណៈដែលកំពុងកាយដីធ្វើផ្លូវក៏ប្រទះឃើញហើយប្រជាពលរដ្ឋម្នាក់ឈ្មោះទឹម ស៊ីណាក់ ប្រុសអាយុ៦៤ឆ្នាំរស់នៅចំណុចទួលសង្កែបបួយ ស្ថិតនៅភូមិកោះរាម ឃុំខ្នាចរមាស ស្រុកបវេល ខេត្តបាត់ដំបង បានរាយការណ៍ជូនសមត្ថកិច្ចទៅពិនិត្យដើម្បីយកមករក្សាទុកបណ្តោះអាសន្ន។ ក្នុងនោះមានគ្រាប់80mm០១គ្រាប់,គ្រាប់B40ចំនួន០១គ្រាប់,គ្រាប់ម៉ីន69ចំនួន០១គ្រាប់,គ្រាប់បែកដៃចំនួន០៣គ្រាប់។

សមត្ថកិច្ចឲ្យដឹងដែរថា បច្ចុប្បន្នគ្រាប់យុទ្ធភណ្ឌសរុបទាំង៣ទីតាំងក្នុងស្រុកទាំង៣ខាងលើមកដល់ពេលនេះសមត្ថកិច្ចទាំង៣ទីតាំងបានប្រគល់ឲ្យមន្ត្រីជំនាញនៃអង្គភាពCMAXរួចរាល់ហើយដើម្បីយកទៅរក្សាទុករងចាំធ្វើការកម្ទេចចោលនៅពេលក្រោយ៕

សៅ សារិទ្ធ