កូរ៉េខាងជើង ឃុំខ្លួនមន្ត្រី៣នាក់ ជុំវិញហេតុការណ៍លិចនាវាចម្បាំង

ប្រទេសកូរ៉េខាងជើង បានឃុំខ្លួនមន្ត្រីចំនួន៣នាក់ ជុំវិញហេតុការណ៍លិចនាវាចម្បាំងនៅថ្ងៃសម្ពោធ កាលពីថ្ងៃព្រហស្បតិ៍ ដែលធ្វើឲ្យមេដឹកនាំ គីម ជុងអ៊ុន ក្តៅស្លឹកត្រចៀកយ៉ាងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មានរដ្ឋ KCNA នៅថ្ងៃអាទិត្យទី២៥ខែឧសភាឆ្នាំ២០២៥ មន្ត្រីទាំងបីនោះសុទ្ធសឹងជាអ្នកទទួលខុសត្រូវចំពោះការលិចនាវា ដែលមានម្នាក់ជាប្រធានវិស្វករនៃរោងចក្រផលិតនា​វា Chongjin ភាគខាងជើង, ម្នាក់ជាមេផ្នែកផលិតនាវា និងម្នាក់ទៀតជាប្រធានរដ្ឋបាលប្រចាំទីនោះ។

ទោះបីជាយ៉ាងណាក៏ដោយ គេនៅមិនទាន់ដឹងទេថាតើ អ្នកទាំង៣នឹងត្រូវទទួលទោសអ្វី និងធ្ងន់កម្រិតណា ប៉ុន្តែមុននេះ លោក គីម បានហៅហេតុការណ៍លិចនាវា ថាជា «ឧទ្ទវហេតុធ្ងន់ធ្ងរបំផុត» និងជាអំពើឧក្រិដ្ឋកម្មដែលមិនត្រូវបណ្តោយឲ្យកើតមាន និងមិនអាចអត់ឱនឲ្យបានឡើយ។

សូមជម្រាបជាថ្មី នាវាចម្បាំងទម្ងន់ ​៥ ០០០តោនមួយគ្រឿងត្រូវលិចក្នុងពិធីដាក់សម្ពោធ នៅចំពោះមុខលោក គីម ជុងអ៊ុន ព្រោះដាក់ចុះខុសបច្ចេកទេស នៅឯកំពង់ផែក្រុង Chongjin។

លោកគីម បានចេញបញ្ជាដាច់ណត្តិ ធ្វើយ៉ាងណា ត្រូវស្រង់និងជួសជុលនាវានេះឲ្យស្អាតវិញ ឲ្យបានមុខកិច្ចប្រជុំគណបក្សដ៏សំខាន់នៅខែមិថុនាខាងមុខនេះ។

នាវានេះ មានបំពាក់ជាមួយប្រព័ន្ធអាវុធទំនើបរួមទាំងមីស៊ីល Ballistic និង Cruise ដែលមានសមត្ថភាពផ្ទុកក្បាលគ្រាប់នុយក្លេអ៊ែរផងដែរ ហើយនឹងដាក់ឲ្យធ្វើបេសកកម្មនៅឆ្នាំក្រោយ។

យ៉ាងណាមិនមានរបាយការណ៍អំពីជនរងគ្រោះទេក្នុងហេតុការណ៍នោះ៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង យកតង់បាំងនាវាចម្បាំងដែលលិច