លោកយាយវ័យ ៧៦ ឆ្នាំ លក់នំបញ្ចុក​តាមភូមិ រកប្រាក់ដោះស្រាយជីវភាពប្រចាំថ្ងៃ​

របរលក់នំបញ្ចុក់ លក់បាយ និងបបរ ពេលព្រឹក នៅតាមភូមិទោះបីជាមិនអាចរកប្រាក់ចំណូលបានច្រើនដូចរបរផ្សេងៗ តែអាចដោះស្រាយជីវភាពប្រចាំថ្ងៃ។

លោកយាយ អ៊ុន សាវឿន ហៅយាយ ទ្រព្យ អាយុ ៧៦ ឆ្នាំ រស់នៅភូមិអញ្ចាញ ឃុំដារ ស្រុកចិត្របុរី ខេត្តក្រចេះ បាន​ប្រកបរបរលក់នំបញ្ចុក​​រយៈពេលជាង ២៧ ឆ្នាំមកហើយ ចាប់តាំងពីពេលប្តី​លោកយាយ​មរណៈភាពទៅ ដើម្បីរកប្រាក់ចំណូលផ្គត់ផ្គង់ជីវភាពគ្រួសារ ចិញ្ចឹមកូន និងការចំណាយប្រចាំថ្ងៃ។

លោកយាយ អ៊ុន សាវឿន ប្រាប់​ថា របរ​លក់​នំបញ្ចុក់រាល់ព្រឹកនេះ បានត្រឹមតែ ៤-៥ គីឡូក្រាមប៉ុណ្ណោះ។ ប្រសិនបើពេលអ្នកភូមិមានបុណ្យទាន ឬកម្មវិធីផ្សេងៗ ឬថ្ងៃណាអត់ស្រួលខ្លួន ក៏លោកយាយអត់លក់ដែរ។

រៀងរាល់ព្រឹក មានប្រជាពលរដ្ឋ អ្នកភូមិ មកជួបជុំទិញហូប និងលក់ដាច់ជាហូរហែរ អមដោយបន្លែធម្មជាតិជាច្រើនមុខស្រស់ៗ ហើយ​ដែល​លោកយាយចាប់លក់យ៉ាងយូរ ត្រឹមម៉ោង ៨ ព្រឹក គឺលក់អស់ហើយ។

ក្នុងការ​ប្រកប​មុខ​របរលក់នំបញ្ចុក​រាល់ថ្ងៃ​ លោកយាយ អ៊ុន សាវឿន តែងតែភ្ញាក់ពីយប់ៗ ដើម្បីស្លរទឹកសម្លរនំបញ្ចុក ដោយលោកយាយរៀបរាប់ពីរបៀបធ្វើ និងគ្រឿងផ្សំ មានដូចជា រំដេង រមៀត ស្លឹកគ្រៃ ដូង ខ្ជាយ ខ្ទឹមស សណ្តែកដី ប្រហុក អំបិល ប៊ីចេង និងគ្រឿងផ្សំផ្សេងទៀត ដើម្បីឱ្យទឹកសម្លមានរសជាតិឆ្ងាញ់ និងមានក្លិនឈ្ងុយឈ្ងប់។

នំបញ្ចុកដែលលោកយាយលក់រាល់ថ្ងៃ ក៏​មានម៉ូយយកមកលក់ឱ្យដល់ផ្ទះរៀងរាល់ពេលល្ងាច ព្រោះជាជាម៉ូយប្រចាំ និងស្គាល់គ្នាច្រើនឆ្នាំផងដែរ៕

អត្ថបទ៖ ប្រុញ វិធិន