ព័ត៌មានអន្ដរជាតិ

សេដ្ឋកិច្ចថៃប្រឈមមុខនឹងការធ្លាក់ចុះ ដោយសារពន្ធ ៣៦% របស់ ត្រាំ

បានផុស

១១ ខែ មុន

នៅ

ថ្ងៃពុធ ៩ កក្កដា ២០២៥

ដោយ

សេដ្ឋវិទូបានព្រមានថា សេដ្ឋកិច្ចថៃ ដែលពឹងផ្អែកខ្លាំងលើការនាំចេញ និងវិស័យទេសចរណ៍សម្រាប់កំណើន កំពុងប្រឈមមុខនឹងការធ្លាក់ចុះនៅឆ្នាំនេះ ប្រសិនបើពន្ធខ្ពស់របស់អាមេរិកចូលជាធរមាននៅដើមខែសីហាខាងមុខ។ នេះបើតាមការចុះផ្សាយរបស់កាសែតបាងកកប៉ុស្តិ៍ និង The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមានបែបនេះ ធ្វើឡើងក្រោយប្រធានាធិបតីអាមេរិក លោក ដូណាល់ ត្រាំ ប្រកាសពន្ធខ្ពស់ ៣៦ ភាគរយ លើថៃ ដោយទុកពេលឱ្យចរចាបន្ថែមរយៈពេល ៣ សប្ដាហ៍ មុនពេលវាចូលជាធរមាននៅថ្ងៃទី ១ សីហា។

ទីផ្សារសហរដ្ឋអាមេរិក រួមចំណែកប្រមាណ ១៨ ភាគរយ នៃការនាំចេញសរុបរបស់ថៃកាលពីឆ្នាំមុន ហើយពន្ធ ៣៦ ភាគរយ រំពឹងថានឹងវាយប្រហារវិស័យដ៏សំខាន់របស់ថៃមួយនេះមុនគេ។

មួយក្នុងចំណោមសេដ្ឋវិទូ ប្រធានផ្នែកស្រាវជ្រាវសេដ្ឋកិច្ចនៅក្រុមហ៊ុន InnoVest X Securities លោក Piyasak Manasant បានព្យាករថា ផលិតផលក្នុងស្រុកសរុប (GDP) ថៃ អាចធ្លាក់ចុះរហូតដល់ ១,១ ភាគរយ ពេញមួយឆ្នាំ ២០២៥ ហើយអត្រានេះអាចធ្លាក់ចុះរហូតដល់ ៤-៤,៥ ភាគរយ នៅឆមាសទី២។ កាសែត Krungthep Turakij បានស្រង់សម្ដីលោក ដែលនិយាយយ៉ាងដូច្នេះថា៖ «នោះគឺដោយសារតែសហរដ្ឋអាមេរិកជាទីផ្សារសំខាន់របស់ថៃ ខណៈពន្ធសកលនឹងប៉ះពាល់ដល់ការចំណាយ និងទេសចរណ៍»។

កាសែត The Nation វិញ បានស្រង់សម្ដីអ្នកជំនាញភាគច្រើនដែលនិយាយថា ពន្ធ ៣៦ ភាគរយ នឹងធ្វើឱ្យថៃខាតបង់ផ្នែកប្រកួតប្រជែង និងទម្លាក់ទំនុកចិត្តវិនិយោគិនបរទេស ដែលអាចឱ្យពួកគេផ្លាស់ប្ដូរទីតាំងផលិតកម្មទៅប្រទេសផ្សេងៗ រួមទាំងវៀតណាម (ជាប់ពន្ធ ២០%) ម៉ាឡេស៊ី (២៥ ភាគរយ) និងបណ្ដាប្រទេសអាមេរិកឡាទីន ដែលភាគច្រើនជាប់ត្រឹមពន្ធមូលដ្ឋាន ១០ ភាគរយ។

អ្នកជំនាញថៃជាច្រើនបានលើកឡើងថា ពន្ធខ្ពស់នឹងធ្វើឱ្យកំណើនសេដ្ឋកិច្ចថៃធ្លាក់ចុះក្រោមការព្យាកររបស់ធនាគារពិភពលោក និងមូលនិធិរូបិយវត្ថុអន្តរជាតិ (IMF) សម្រាប់ឆ្នាំនេះប្រមាណ ១,៨ ភាគរយ។

កន្លងមក គណៈកម្មាធិការអចិន្រ្តៃយ៍រួមស្តីពីពាណិជ្ជកម្ម ឧស្សាហកម្ម និងធនាគារ បានព្រមានថា ការដំឡើងពន្ធ ៣៦ ភាគរយ លើការនាំចូលរបស់ថៃ នឹងធ្វើកំណើន GDP របស់ប្រទេស អាចធ្លាក់ចុះដល់ ០,៧-១,៤ ភាគរយ ជាមួយនឹងការនាំចេញប្រចាំឆ្នាំអាចធ្លាក់ចុះដល់ ២ ភាគរយ។

ជាមួយគ្នានោះ សហភាពនិយោជកនៃពាណិជ្ជកម្ម និងឧស្សាហកម្មថៃ (EconThai) ឯណោះវិញ បាននិយាយថា ពន្ធ ៣៦ ភាគរយ របស់អាមេរិក អាចដាក់សម្ពាធលើវិស័យផលិតកម្មថៃ ដោយកម្មករទំនងជានឹងទទួលបន្ទុកធ្ងន់ធ្ងរ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សហភាពព្យាករថា តម្លៃនៃការនាំចេញសរុបរបស់ថៃ រំពឹងថានឹងធ្លាក់ចុះជាង ៥០ ភាគរយ ភ្លាមៗនៅខែនេះ ពោលគឺសូម្បីតែមុនពេលពន្ធដដែលចូលជាធរមាន ដែលនេះមានន័យថា កម្មកររោងចក្រនៅថៃ នឹងរងផលប៉ះពាល់នៅឆមាសទី២ នៃឆ្នាំ ២០២៥ ។

អនុប្រធាន EconThai និងជាប្រធានក្រុមប្រឹក្សាប្រឹក្សាអភិវឌ្ឍន៍ការងារជាតិ លោក Tanit Sorat បាននិយាយថា៖ «កម្មករថៃជាច្រើនទំនងជាបាត់បង់ការងាររបស់ពួកគេ ដោយភាពអត់ការងារធ្វើបានរារាំងទីផ្សារការងារបន្តដល់ឆ្នាំ ២០២៦»។

លោកបានបន្តថា ពន្ធគយនឹងបង្ខំឱ្យក្រុមហ៊ុនផលិត កាត់បន្ថយផលិតកម្មនៅទូទាំងឧស្សាហកម្មនានារួមមានសំបកកង់ ម៉ាស៊ីនត្រជាក់ គ្រឿងប្រើប្រាស់ក្នុងផ្ទះ ផលិតផលអេឡិចត្រូនិកមួយចំនួន និងផលិតផលកសិកម្មកែច្នៃ ។ ជាធម្មតា ផលិតផលទាំងនេះត្រូវបាននាំចេញទៅកាន់សហរដ្ឋអាមេរិក ដែលជាទីផ្សារដ៏សំខាន់របស់ថៃ។

លោក Tanit បាននិយាយថា ក្នុងរយៈពេលខ្លី រោងចក្រអាចនឹងបញ្ឈប់កម្មករ ខណៈមានការប្រកួតប្រជែងតឹងតែងជាវៀតណាម ម៉ាឡេស៊ី និងឥណ្ឌូណេស៊ី (ជាប់ពន្ធអាមេរិក ៣២ ភាគរយ)។ ក្នុងរយៈពេលវែង លោកនិយាយថា ថៃអាចនឹងបាត់បង់ភាពទាក់ទាញជាគោលដៅវិនិយោគនៅអាស៊ីអាគ្នេយ៍ ដោយសារអ្នកវិនិយោគបរទេសនឹងជ្រើសរើសការបណ្ដាក់ទុននៅវៀតណាម ឬឥណ្ឌូណេស៊ី ដែលមិនត្រឹមតែជាប់ពន្ធទាបជាងប៉ុណ្ណោះទេ ប៉ុន្តែក៏មានតម្លៃថាមពល និងប្រាក់ឈ្នួលទាបជាង៕