សឹងមួយប្រទេសថៃ បន្តជួបគ្រោះធម្មជាតិដ៏កាចសាហាវ រួមទាំងបាក់ដីភ្នំនិងរន្ទះបាញ់

ថៃបានចេញការព្រមានអំពីគ្រោះធម្មជាតិដ៏កាចសាហាវ ដែលនឹងវាយប្រហារខេត្តសឹងមួយប្រទេស ​ចាប់ពីថ្ងៃអង្គារទី២ខែកញ្ញាទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod, នាយកដ្ឋានឧតុនិយមថៃ បានចេញសេចក្តីប្រកាសថា ខេត្តចំនួន៥១ បូករួមទាំងទីក្រុងបាងកកផងដែរ នឹងកើតមានភ្លៀងធ្លាក់ជញ្ជ្រំខ្លាំងបំផុត ទឹកជំនន់ធ្ងន់ធ្ងរ រន្ទះបាញ់និងបំណាក់ដីភ្នំដ៏កាចសាហាវ ចាប់ពី២៤ម៉ោងក្រោយទៅ។

កន្លែងដែលរងការវាយប្រហារខ្លាំងជាងគេនៅតែជាតំបន់ភាគខាងជើង ដែលមានដូចជាខេត្ត Hong Son, Chiang Mai, Lamphun, Lampang, Phrae, Uttaradit, Sukhothai, Tak, Kamphaeng Phet, Phitsanulok, Phichit និង Phetchabun។

ក្រៅពីនេះ តំបន់ដែលរងការវាយប្រហារធ្ងន់ធ្ងរផ្សេងទៀតមាននៅភាគកណ្តាលចំនួន១០ខេត្ត, ប៉ែកអាគ្នេយ៍៨ខេត្ត, ប៉ែកនិរតី៥ខេត្ត, ប៉ែកឦសាន១៨ខេត្ត និងប៉ែកខាងកើត៨ខេត្ត។

គ្រោះធម្មជាតិនេះគឺបណ្តាលមកពីឥទ្ធិពលនៃព្យុះ ណងហ្វា ដែលនៅតែបន្តគ្របដណ្តប់និងបង្កទុក្ខវេទនាដល់ប្រទេសថៃ ហើយគេរំពឹងថា វានឹងបន្តវាយប្រហារដល់ចុងសប្តាហ៍។

មុននេះdErព្យុះ ណងហ្វា បានវាយប្រហារខ្លាំងក្លាលើប្រទេសថៃ ដោយឥទ្ធិពលរបស់វា បង្អុរភ្លៀងធ្លាក់ បង្កជាគ្រោះទឹកជំនន់ធ្ងន់ធ្ងរក្នុងខេត្តចំនួន៦ ដូចជា Chiang Mai, Mae Hong Son, Phitsanulok, Phetchabun និង Sukhothai ធ្វើឲ្យពលរដ្ឋជាង ៥ ០០០នាក់ រងទុក្ខ។

នៅស្រុក Lom Kao នៃខេត្ត Phetchabun, ទឹកជំនន់បានជន់លិចក្នុងកម្រិតធ្ងន់ធ្ងរបំផុតមិនធ្លាប់មានក្នុងរយៈពេលមួយទសវត្សរ៍ ដោយបំផ្លាញផ្ទះសម្បែងពលរដ្ឋ និងរំខានដល់ប្រតិបត្តិការជួយសង្គ្រោះ៕

អត្ថបទ៖ សុខ សុវណ្ណ

ចុចអាន៖ មិនទាន់ធូរទេ! ខេត្តថៃចំនួន ២៩ នៅតែប្រឈមគ្រោះទឹកជំនន់និងបំណាក់ដីធ្ងន់ធ្ងរ ដោយសារព្យុះ ណងហ្វា