សុបិនឃើញរន្ទះបាញ់ ជាប្រផ្នូលមិនគួរព្រងើយកន្តើយ

សុបិន្តឃើញរន្ទះបាញ់ ជាសុបិនដែលមនុស្សជាច្រើនកម្រជួបប្រទះ ប៉ុន្តែយោងទៅតាមជំនឿ វាមានអត្ថន័យគួឱ្យចាប់អារម្មណ៍ ដែលអ្នកគួរដឹង និងយកចិត្តទុកដាក់។

ប្រសិនបើអ្នកសុបិន​ឃើញ​រន្ទះ បាញ់មកចំ​ពី​មុខ​អ្នក នោះជាសុបិនប្រាប់ប្រផ្នូលល្អ។ វាមានន័យថា សំណាងអាក្រក់ទាំងឡាយនឹងបញ្ចប់ក្នុងពេលនេះឯង ហើយទុក្ខព្រួយនឹងជំនួសដោយរឿងល្អៗជាបន្តបន្ទាប់។

ប្រសិនសុបិនឃើញរន្ទះបាញ់ចំអ្នកដទៃវិញ អត្ថន័យរបស់វាគឺនឹងទទួលបានសំណាងពីទិសខាងលិច ឬមកពីការផ្សងរង្វាន់។ មិនអ៊ីចឹងទេ​ នរណាម្នាក់នឹងជូនអំណោយឱ្យអ្នក។

បើសុបិនឃើញរន្ទះ បាញ់ចំដើមឈើ វា​មានន័យ​ថា ​​សំណាងនឹងរត់មករកជាហូហែ អ្នកនឹង​គ្មាន​ទុក្ខលំបាកទៀតទេអំឡុងពេលនេះ ពោលគឺជីវិតនឹងជួបតែលាភ​សំណាង ។

ឯសុបិនឃើញរន្ទះ បាញ់ចំផ្ទះរបស់អ្នក ជាប្រផ្នូលអាក្រក់។ មនុស្សក្នុងផ្ទះនឹងមានការយល់ច្រឡំជាមួយគ្នា បង្កទៅជារឿងជម្លោះ។ មិនតែប៉ុណ្ណោះសុខភាពរបស់សមាជិកគ្រួសារក៏មិនល្អដែរ នរណាម្នាក់អាចឈឺធ្ងន់ភ្លាមៗ។

សុបិន្តឃើញរន្ទះ បាញ់ទៅលើផ្ទះអ្នកដទៃ ជាប្រផ្នូលទាក់ទងនឹងសុខភាព និងគ្រោះ។ អ្នកផ្ទាល់អាចរងជំងឺដែលមិននឹកស្មានដល់ ឬម្យ៉ាងទៀត មនុស្សក្នុងផ្ទះនឹងជួបគ្រោះថ្នាក់។

ដោយឡែកសុបិនឃើញរន្ទះ បាញ់ទៅលើដី គឺជាសុបិនដែលមានអត្ថន័យល្អ។ វាមានន័យថា សំណាងអាក្រក់នឹងកន្លងផុតទៅ ហើយអ្នកនឹងទទួលបានសំណាងល្អពាក់ព័ន្ធនឹងការរកស៊ី ឬការជួញដូរនានា៕

អត្ថបទ៖ ​សន្យា

ចុចអាន៖ ប្រសិនយល់​សប្តិ​ឃើញ​ផ្ទះ​រលំ ​ឬបាក់បែក ទំនាយគឺ….