ងូតទឹកកណ្ដាលអធ្រាត្រ ចំយប់ពេញបូណ៌មី ជនជាតិចិនជឿស៊ប់ខ្លាំង

យោងតាមជំនឿដ៏យូរលង់របស់ជនជាតិចិនដែលបានជឿស៊ប់ទៅលើអំណាចក្រៅខ្លួន ការងូតទឹកពាក់កណ្ដាលអធ្រាត្រនៅក្រោមពន្លឺព្រះចន្ទ នារាត្រីពេញបូណ៌មី អាចជួយបង្កើនថាមពល អំណាច កិត្យានុភាព និងមន្តស្នេហ៍របស់អ្នក ជាពិសេសចំថ្ងៃបុណ្យសែននំព្រះខែតែម្ដង។

តាមជំនឿ​និយាយថា ក្នុងយប់ពេញបូណ៌មី ​នៅ​ពេល​ដែល​ព្រះ​ចន្ទ​ស្ថិត​នៅ​ចំមុំ ៩០ដឺក្រេ​ពី​លើ​ក្បាល អ្នកដែលបាន​ងូត​ទឹក​ក្រោម​ពន្លឺ​ព្រះ​ចន្ទ​ ពិតជាអាចប្រមូលថាមពលវិជ្ជមានជួយពង្រឹង​អំណាច បង្កើនសំណាង និងភាព​ទាក់ទាញចំពោះខ្លួនឯង។ គេជឿថា ពន្លឺព្រះចន្ទពេញវង់ ជាថាមពលដ៏មានឥទ្ធិពលបំផុត​ មិនត្រឹមតែនាំសំណាង តែអាចបណ្ដេញភាពស៊យ និងចង្រៃឧបទ្រពចេញពីខ្លួនយ៉ាងស័ក្តិសិទ្ធិទៀតផង។

យ៉ាងណាមិញ នេះគ្រាន់តែជាផ្នែកមួយនៃជំនឿចិនបុរាណប៉ុណ្ណោះ។ ដូច្នេះវាស័ក្តិសិទ្ធិប៉ុនណា មានតែអ្នកដែលមានជំនឿទេ ទើបដឹងច្បាស់៕

អត្ថបទ៖ សន្យា

ចុចអាន៖ នំ ៧ ប្រភេទ ខ្វះមិនបាន ហើយជនជាតិ ចិន តែងយកជាដង្វាយសែនព្រះខែរាល់ឆ្នាំ