សារមន្ទីរជាតិ ចាប់ឱកាសក្នុងវិបត្តិកូវីដ-១៩

ខណៈវិបត្តិសាកល នៃការឆ្លងជំងឺកូវីដ-១៩ បានរាតត្បាតសាកលលោក នាំឱ្យកាត់បន្ថយការប្រាស្រ័យទាក់ទង និងធ្វើដំណើរជាដើមនោះ សារមន្ទីរជាតិកម្ពុជា បានចាប់ឱកាស ដោយរៀបចំកែលម្អមួយចំនួនដើម្បីត្រៀមផ្សព្វផ្សាយទទួលភ្ញៀវទេសចរជាតិ និងអន្តរជាតិឡើងវិញ។

លោក ឆាយ វិសុទ្ធ ប្រធាននាយកដ្ឋានសារមន្ទីរជាតិកម្ពុជា បានឱ្យ “កម្ពុជាថ្មី” ដឹងថា សារមន្ទីរជាតិមិនទាន់មានគម្រោងទាក់ទាញភ្ញៀវទេសចរបរទេស តាមរយៈការផ្សព្វផ្សាយតាមប៉ុស្ដិ៍ ​ឬភ្នាក់ងារដំណើរទេសចរណ៍ក្រៅប្រទេសទេ ដោយបច្ចុប្បន្ន កំពុងមានការកែលម្អ និងកែសម្រួល ការរៀបចំដាក់តាំងវត្ថុបុរាណនៅក្នុងសារមន្ទីរ​ ដោយកែលម្អទាំងការលាបជញ្ជាំង បំពាក់ភ្លើង ជួលជុលដំបូល និងដំឡើងស្លាកព័ត៌មាន។

លោក ឆាយ វិសុទ្ធ មានប្រសាសន៍បន្តថា៖ “ការកែលម្អទាំងនេះ ជាយន្តការធ្វើឱ្យភ្ញៀវបានចូលទស្សនាសារមន្ទីរជាតិទទួលបានព័ត៌មានច្រើនជាងមុន។ យើងឃើញថា កូវីដ មានបញ្ហាប៉ះពាល់មួយចំនួន ប៉ុន្តែវាជាឱកាសសម្រាប់សារមន្ទីរក្នុងការចល័តរូបចម្លាក់ និងជួសជុលសារមន្ទីរ”។

ប្រធាននាយកដ្ឋានសារមន្ទីរជាតិកម្ពុជា រូបនេះបញ្ជាក់ថា ប៉ុន្តែអ្វីៗទាំងអស់នេះមិនអាចធ្វើម្ដងរួចនោះទេ គឺត្រូវធ្វើជាដំណាក់ៗ ព្រោះមានបញ្ហាធនធានមនុស្ស និងថវិកា ពិសេសបញ្ហាធនធានមនុស្ស ដែលពេលខ្លះសារមន្ទីរមានថវិកាល្មមគ្រប់គ្រាន់អាចធ្វើបាន ប៉ុន្តែខ្វះធនធានមនុស្សដែលត្រូវការប្រើប្រាស់ដើម្បីចងក្រងព័ត៌មាន។

លោកមានប្រសាសន៍បន្តថា៖ “យើងត្រូវការស្រាវជ្រាវពីព័ត៌មានដែលយើងដាក់បញ្ហាញនៅសារមន្ទីរជាតិ ពាក្យថា ជាតិ មួយគឺធ្ងន់ ដែលអាចយកទៅប្រើប្រាស់ជាឯកសារយោងសម្រាប់ការពិភាក្សា ឬការលើកឡើងក្នុងសំណេរផ្សេងៗ ដែលយើងត្រូវប្រយ័ត្នប្រយែងមែនទែនរឿងហ្នឹង។ សម្រាប់ខ្ញុំ ខ្ញុំយល់ថា អ្វីដែលយើងធ្វើបាន គឺចាប់ផ្ដើមចេញពីខ្លួនយើងសិន មានន័យថាធ្វើឱ្យខ្លួនយើង ឬសារមន្ទីរបានស្អាតហើយ បានយើងចាប់ផ្ដើមជំហានទី២ គឺធ្វើទីផ្សារផ្សព្វផ្សាយ ដែលយើងនឹង​ជជែកជាមួយខាងភ្នាក់ងារទេសចរណ៍ រៀបចំកញ្ចប់ទេសចរណ៍ និងផ្ទាំងផ្សាយពីសារមន្ទីរតាមច្រកអន្តរជាតិទាំងជើងអាកាស ជើងគោក និងជើងទឹក ក៏ដូចជាតាមសណ្ឋាគារ កន្លែងភ្ញៀវស្នាក់នៅជាដើម…”។

ប្រធាននាយកដ្ឋានសារមន្ទីរជាតិកម្ពុជា រូបនេះបានឱ្យដឹងថា តម្លៃចូលទស្សនាសារមន្ទីរគឺស្មើគ្នាសម្រាប់ភ្ញៀវទេសចរបរទេសគ្រប់ជាតិសាសន៍ លើកលែងតែគណៈប្រតិភូ ឬការស្នើសុំពិសេសពីស្ថាប័នរដ្ឋ និងស្ថាប័នឯកជនដៃគូ។ ចំពោះតម្លៃ ក្មេង ៣ដុល្លារ មនុស្សចាស់ ១០ ដុល្លារ។ ប៉ុន្តែចំពោះភ្ញៀវជាតិ តម្លៃតែ ៥០០ រៀល ប៉ុណ្ណោះ។​

គួរបញ្ជាក់ថា សារមនី្ទរជាតិត្រូវបានកសាងឡើងនៅក្នុងឆ្នាំ១៩១៧ នាសម័យអាណានិគមបារាំងមកលើព្រះរាជាណាចក្រកម្ពុជា (១៨៦៣-១៩៥៣) ដែលមានស្ថាបត្យករ ជនជាតិបារាំង​ឈ្មោះ ហ្សក ហ្រ្គូសលីយេ។ សារមន្ទីរជាតិមានបណ្ដោយ ៥៤ម៉ែត្រ និង ជម្រៅ ៦៦ម៉ែត្រ ហើយសង់លើខឿនដែលមានកម្ពស់ ២ម៉ែត្រកន្លះ។ ពិធីសម្ភោធបានប្រព្រឹត្តិនិងទៅ ថៃ្ងទី១៣ ខែមេសា ឆ្នាំ១៩២០ ក្រោមព្រះរាជាធិបតីភាពរបស់ ព្រះករុណា ព្រះបាទស៊ីសុវត្ថិ ព្រះចៅក្រុងកម្ពុជា និង ចំពោះ​មុខ​ លោក ហង់រី បូឌ្វាំង អ្នកប្រចាំការជាន់ខ្ពស់បារាំងនៅកម្ពុជា។ កាលពីដំបូងឡើយសារមនី្ទរជាតិនេះមានឈ្មោះថា សារមនី្ទរក្រុងកម្ពុជាធិបតី ហើយ​ដើម្បី​លើក​កិតិ្តយស​ដល់​លោក​ទេសាភិបាល​បារាំង​ឈ្មោះ អាល់ប៊ែរ សារូត៍ (Albert Sarraut) ទើបប្តូរឈ្មោះជាសារមនី្ទរអាល់ប៊ែរ សារូត៕

អត្ថបទ៖ ច័ន្ទ វីរៈ