ព័ត៌មានអន្ដរជាតិ

ការនាំចេញវាយនភណ្ឌ និងសម្លៀកបំពាក់វៀតណាមរំពឹងកើនដល់ ៤៦ ប៊ីលានដុល្លារឆ្នាំនេះ

បានផុស

៨ ខែ មុន

នៅ

ថ្ងៃព្រហស្បតិ៍ ២៧ វិច្ឆិកា ២០២៥

ដោយ

ការនាំចេញវាយនភណ្ឌ និងសម្លៀកបំពាក់របស់ប្រទេសវៀតណាម រំពឹងថានឹងកើនដល់ ៤៦ ប៊ីលានដុល្លារឆ្នាំនេះ ដោយកើនឡើង ៥,៦% ធៀបនឹងឆ្នាំមុន។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមវាយនភណ្ឌ និងសម្លៀកបំពាក់វៀតណាម (VITAS) បានប្រកាសពីការប៉ាន់ប្រមាណដ៏វិជ្ជមាននេះកាលពីថ្ងៃអង្គារ ដោយប្រធានរបស់សមាគម លោក Vũ Đức Giang បាននិយាយថា ឆ្នាំនេះនឹងក្លាយជាព្រឹត្តិការណ៍សំខាន់មួយសម្រាប់វិស័យវាយនភណ្ឌ និងសម្លៀកបំពាក់វៀតណាម ខណៈវាបន្តការងើបឡើងវិញយ៉ាងខ្លាំង បន្ទាប់ពីរងសម្ពាធជាសកលជាច្រើនឆ្នាំ។

អតិរេកពាណិជ្ជកម្មរបស់ឧស្សាហកម្មវាយនភណ្ឌ និងសម្លៀកបំពាក់វៀតណាម ត្រូវបានប៉ាន់ប្រមាណថាមានចំនួនរហូតដល់ទៅ ២១ ប៊ីលានដុល្លារ ដែលវាបង្ហាញថា វិស័យនេះជាសសរស្តម្ភសំខាន់នៃតុល្យភាពពាណិជ្ជកម្មរបស់វៀតណាម។

ជាមួយគ្នានោះ លោក Giang បានសង្កត់ធ្ងន់លើកិច្ចខិតខំប្រឹងប្រែងជំរុញពាណិជ្ជកម្មជាបន្តបន្ទាប់របស់ VITAS រួមទាំងកម្មវិធីជាតិចំនួន ១០ និងគំនិតផ្តួចផ្តើមចំនួន ២០ ដែលបានជួយអាជីវកម្មវៀតណាម ឱ្យចូលរួមក្នុងការតាំងពិព័រណ៍អន្តរជាតិសំខាន់ៗនៅសហរដ្ឋអាមេរិក បារាំង អាល្លឺម៉ង់ អូស្ត្រាលី រុស្ស៊ី និងកាណាដា។ កិច្ចខិតខំប្រឹងប្រែងទាំងនេះ បានដើរតួនាទីយ៉ាងសំខាន់ក្នុងការរក្សា និងពង្រីកចំណែកទីផ្សារនៅទូទាំងទីផ្សារសកលសំខាន់ៗ។

តាំងពីឆ្នាំ ២០២០ មក វិស័យវាយនភណ្ឌ និងសម្លៀកបំពាក់វៀតណាម បានប្រឈមមុខនឹងបញ្ហាប្រឈមដែលមិនធ្លាប់មានពីមុនមក ដោយចាប់ពីជំងឺរាតត្បាតកូវីដ-១៩ រហូតដល់កំណើនភាពតានតឹងភូមិសាស្ត្រនយោបាយ បទប្បញ្ញត្តិបរិស្ថានតឹងរ៉ឹង និងកំណើនវិធានការការពារនិយមដូចជាពន្ធបដិការរបស់អាមេរិកជាដើម។

ទោះបីបែបនេះក្ដី វៀតណាមនៅតែរក្សាចំណាត់ថ្នាក់របស់ខ្លួនក្នុងចំណោមប្រទេសនាំចេញវាយនភណ្ឌ និងសម្លៀកបំពាក់កំពូលៗទាំង ៣ របស់ពិភពលោក៕