កម្ពុជារកចំណូលបាន ​១,៥ ​ពាន់លានដុល្លារ ​ពីការនាំចេញគ្រាប់ស្វាយចន្ទី​ឆៅជាង ១ ​លានតោន

កម្ពុជារកប្រាក់ចំណូលបាន ​១,៥ ​ពាន់លានដុល្លារ ​ពីការនាំចេញគ្រាប់ស្វាយចន្ទីឆៅប្រមាណ ១ លានតោន​នៅក្នុងឆ្នាំ ២០២៥ ​កើនឡើង ២៧% ធៀបនឹងឆ្នាំ ២០២៤។​​

យោងតាម​ទិន្នន័យក្រៅផ្លូវការរបស់​សមាគមស្វាយចន្ទីកម្ពុជាបង្ហាញថា​ ​ផលិតកម្មគ្រាប់ស្វាយចន្ទីឆៅ​របស់​កម្ពុជា​​សម្រេចបានជាង ១ លានតោន​ (១០២០៧៥៧) នៅក្នុងឆ្នាំ ២០២៥​​ ដែលឆ្លុះបញ្ចាំងពីភាពធន់​នៃវិស័យនេះ នៅចំពេលដែលមានបញ្ហាប្រឈមនៃ​ការប្រែប្រួលអាកាស​ធាតុកំពុង​បន្តកើតមាន។ ​

​លោក អួន ស៊ីឡុត ​ប្រធានសមាគមស្វាយចន្ទីកម្ពុជា ​មានប្រសាសន៍ថា ​លទ្ធផលដ៏រឹង​មាំនេះ​កើតមានឡើង ទោះបីជាមានការរអាក់រអួលខ្លាំងទាក់ទងនឹងអាកាសធាតុកាលពីដើមឆ្នាំ ២០២៥ ក៏ដោយ។

កាលពីខែមីនា ឆ្នាំ ២០២៥ ​លក្ខខណ្ឌអាកាសធាតុអាក្រក់​បានជះ​ឥទ្ធិពល​អវិជ្ជមាន​ដល់ការប្រមូលផល ដែល​ជំរុញឱ្យអ្នកជំនាញ និងតំណាងឧស្សាហកម្ម​ព្រមានពីការ​ធ្លាក់ចុះនៃទិន្នផលស្វាយចន្ទី។

​ទោះជាយ៉ាងណាក៏ដោយ ស្ថានភាពបានចាប់ផ្តើមប្រសើរឡើងវិញនៅក្នុងខែមេសា បន្ទាប់​ពីសមាគម​ស្វាយចន្ទីកម្ពុជា ​បានដាក់ចេញនូវវិធានការសម្របខ្លួននឹងអាកាសធាតុ។

​លទ្ធផលវិជ្ជមានបានបន្តរហូតដល់ខែឧសភា និងមិថុនា នៅពេលដែល​លក្ខខណ្ឌ​អាកាស​ធាតុ​មានស្ថិរភាព ដែលអនុញ្ញាតឱ្យផលិតកម្មស្វាយចន្ទីងើបឡើងវិញ និងលើសពីការរំពឹង​ទុកកាល​ពីដំបូង។

​លោក អួន ស៊ីឡុត ​បន្ថែមថា ​ទិន្នផលចុងក្រោយនេះ ហាក់ដូចជាផ្ទុយ​ពីការព្រួយបារម្ភ​ដំបូង​ដែលលើកឡើងដោយ សមាគមស្វាយចន្ទីកម្ពុជា បើទោះបីជាសមាគម បានប្រឹងប្រែង​ក្នុងរយៈពេល ៣ ឆ្នាំកន្លងមក​ ដើម្បីជំរុញវិធីសាស្ត្រ​កសិកម្ម​សរីរាង្គ និងភាពធន់នឹងអាកាសធាតុ ដើម្បីជួយកសិករសម្របខ្លួនទៅនឹង​ការប្រែប្រួល​អាកាស​ធាតុក៏ដោយ។​

​លោក អួន ស៊ីឡុត បញ្ជាក់ថា៖ «គោលបំណងរបស់​យើងគឺផ្តល់អំណាចដល់​កសិករនូវបច្ចេកទេស​ពិតប្រាកដដែលអាច​ជួយឱ្យពួកគេរកចំណូលបានកាន់តែច្រើនពីដីចំម្ការរបស់ពួកគាត់»។

អ្នកសង្កេតការណ៍ក្នុងឧស្សាហកម្មបានលើកឡើងថា ការរួមបញ្ចូលគ្នានៃលក្ខខណ្ឌអាកាសធាតុដែលបានប្រសើរឡើង និង​ការបណ្តុះបណ្តាលកសិករ បានដើរតួនាទីយ៉ាងសំខាន់ក្នុងការរក្សានិរន្តរភាពនៃវិស័យស្វាយចន្ទីកម្ពុជា ដែលជួយឱ្យវិស័យនេះបន្តរីកចម្រើន ទោះបីជាមានភាពមិនច្បាស់លាស់នៃអាកាសធាតុកើនឡើងក៏ដោយ៕

អត្ថបទ៖ ឡេង ដេត