សេដ្ឋកិច្ច

តម្លៃមាសនឹងបំបែកកំណត់ត្រាថ្មីខ្ពស់បំផុត ៥៦០០ ដុល្លារ មួយតម្លឹង នៅដើមឆ្នាំនេះ

បានផុស

៤ ខែ មុន

នៅ

ថ្ងៃអង្គារ ៦ មករា ២០២៦

ដោយ

តម្លៃមាសនឹងកើនឡើងបំបែកកំណត់ត្រាថ្មីខ្ពស់បំផុតដល់ ៥ ៦០០ ដុល្លារ ក្នុងមួយតម្លឹង នៅក្នុងត្រីមាសទី១ ឆ្នាំ ២០២៦ ដោយសារវិបត្តិសេដ្ឋកិច្ច ភូមិសាស្ត្រនយោបាយ សង្គ្រាមរុស្ស៊ី-អ៊ុយក្រែន និងការចាប់ខ្លួនមេដឹកនាំវេណេស៊ុយអេឡាកាលពីពេលថ្មីៗនេះ។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities មានប្រសាសន៍ថា ស្ថានភាពពិភពលោករឹតតែធ្វើឱ្យមានការភ័យខ្លាច ខណៈអ្នកវិនិយោគធំៗមួយចំនួន មិនមើលឃើញការជួញដូរអ្វីក្រៅតែពីតម្លៃហាងឆេងមាស។

លោក ឡុង សំណាង បញ្ជាក់ថា៖ «វិនិយោគិនធំៗ គេកត់ចំណាំទុកថា តើពេលដែលមានសង្គ្រាម មានវិបត្តិសេដ្ឋកិច្ចកើតឡើង តើអាជីវកម្មមួយណាដែលល្អជាងគេបំផុត មានតែហាងឆេងមាសទេ ដែលមានសុវត្ថិភាពបំផុត ហើយរកផលចំណេញបានច្រើន ព្រោះតម្រូវការមាសកើនឡើងសម្រាប់ប្រទេសទិញទុកសម្រាប់ការពារហានិភ័យ»។

យោងតាមប្រព័ន្ធផ្សព្វផ្សាយរបស់អាមេរិក តម្លៃមាសបានហក់ឡើងខ្ពស់បំផុត ៥៤៨០ ដុល្លារ ក្នុងមួយតម្លឹង ស្មើនឹងជាង ៦០% នៅក្នុងឆ្នាំ ២០២៥។

លោក ឡុង សំណាង បានបញ្ជាក់បន្ថែមថា តម្លៃហាងឆេងមាស នឹងបំបែកកំណត់ត្រាថ្មីដល់ ៥៦០០ ដុល្លារ ក្នុងមួយតម្លឹងនៅដើមឆ្នាំ ២០២៦ នេះ។

គិតត្រឹមម៉ោង ៩ ព្រឹកថ្ងៃទី ០៦ ខែមករា ឆ្នាំ ២០២៦ តម្លៃមាសក្នុងស្រុកលក់ចេញ ៥៤០ ដុល្លារ ក្នុងមួយជី កើនឡើង ១០ ដុល្លារ ធៀបនឹងថ្ងៃសុក្រចុងសប្ដាហ៍មុន ៥៣០ ដុល្លារ មួយជី៕

អត្ថបទ៖ ឡេង ដេត