សេដ្ឋកិច្ច

អ្នកជំនាញសេដ្ឋកិច្ច កុំឱ្យពលរដ្ឋភ័យខ្លាច សម្រុកទិញប្រេងស្ដុកទុក

បានផុស

៤ ខែ មុន

នៅ

ថ្ងៃសុក្រ ១៣ មីនា ២០២៦

ដោយ

លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិន នៃរាជបណ្ឌិតសភាកម្ពុជានៅថ្ងៃទី ១៣ ខែមីនា ឆ្នាំ ២០២៦ បានអំពាវនាវកុំឱ្យប្រជាពលរដ្ឋមានការភ័យខ្លាចរឿងតម្លៃប្រេងកើនឡើង ហើយសម្រុកទៅទិញប្រេងស្តុកទុក ដែលជាគ្រោះថ្នាក់សម្រាប់សេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត គី សេរីវឌ្ឍន៍ បញ្ជាក់ថា៖ «ម្នាក់ៗសម្រុកទៅទិញប្រេងយកមកទុកខ្លួនឯងទាំងអស់ ខ្លាចអត់មានអីចាក់ វានឹងក្លាយទៅជាគ្រោះថ្នាក់ អត់មានប្រេង យើងមិនទាន់ត្រូវការជិះផង យើងទៅទិញយកមកស្តុកទុក ដោយសារភ័យខ្លាចអត់អីជិះ»។

បើតាមអ្នកជំនាញរូបនេះ តម្លៃប្រេងកើនឡើង គឺជារឿងសកល ហើយអ្នកដែលខ្វះប្រេងជាងគេ គឺមហាអំណាចធំៗ ដែលមានកប៉ាល់ដឹកទំនិញធំៗ មិនមែនយើងជិះម៉ូតូ១ គ្រឿង ទៅភ័យខ្លាចអស់សាំងចាក់ទេ។ «មធ្យោបាយនៃការដោះស្រាយ មហាអំណាច គេនឹងរកមធ្យោបាយដោះស្រាយ វាមិនអាចទុកឱ្យប្រេងក្លាយជាកត្តា រារាំងទៅដល់កំណើនសេដ្ឋកិច្ចពិភពលោក យើងមិនគួរភ័យពេកទេ តែយើងត្រូវត្រៀមដែរ»។ លោកបណ្ឌិត គី សេរីវឌ្ឍន៍ បន្ថែមបែបនេះ។

តម្លៃប្រេងកើនឡើង ដោយសារការកាត់ផ្ដាច់ នៃការផ្គត់ផ្គង់ប្រេងមិនអាចដឹកចេញតាមច្រកសមុទ្រហ័រមូស ដោយសារការវាយប្រហាររបស់អ៊ីរ៉ង់ ខណៈមនុស្សកំពុងភ័យខ្លាចរឿងការផ្គត់ផ្គង់។

លោកបណ្ឌិត គី សេរីវឌ្ឍន៍ បញ្ជាក់ថា ប្រសិនបើអត់ប្រេង មិនមែនតែកម្ពុជាទេ គឺទាំងអស់គ្នា ដែលមហាអំណាចត្រូវតែចរចារកដំណោះស្រាយ មិនអាចទុកបញ្ហាបានទេ។ ក្នុងរយៈពេលខ្លី មានបញ្ហាប្រឈម តែរយៈពេលវែងត្រូវតែមានដំណោះស្រាយ មិនដូច្នេះទេ ពិភពលោកក៏ដួលទាំងអស់គ្នា។

តម្លៃប្រេងឥន្ធនៈក្នុងស្រុកបានបន្តហក់ឡើងខ្ពស់ ក្នុងនោះតម្លៃលក់រាយសាំងធម្មតា ៥២០០ រៀល ក្នុងមួយលីត្រ ចាប់ពីថ្ងៃទី១១-១៣ ខែមីនា ចំណែកឯតម្លៃប្រេងម៉ាស៊ូតបានកើនឡើងដល់ ៦០៥០ រៀល ក្នុងមួយលីត្រ។

ប្រព័ន្ធផ្សព្វផ្សាយរបស់សហរដ្ឋអាមេរិករាយការណ៍ថា តម្លៃប្រេងបានកើនឡើងជាង ១០០ ដុល្លារ ក្នុងមួយបារ៉ែល គិតត្រឹមថ្ងៃព្រហស្បតិ៍ទី ១២ ខែមីនា ឆ្នាំ ២០២៦៕

អត្ថបទ៖ ឡេង ដេត