សេដ្ឋកិច្ច

ក្រសួងកសិកម្ម ឱ្យមន្ត្រីរាយការណ៍ ករណីមានការដំឡើងថ្លៃប្រេង ខុសប្រក្រតី

បានផុស

៤ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

ក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យប្រធានមន្ទីរ រាជធានី-ខេត្ត ត្រូវរាយការណ៍ជាបន្ទាន់មកអគ្គលេខាធិការដ្ឋាន នៃក្រសួងកសិកម្ម ក្នុងករណីរកឃើញថា មានការដំឡើងតម្លៃប្រេងឥន្ធនៈខុសប្រក្រតី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណាត់ការនេះ កើតមានឡើង បន្ទាប់ពីក្រសួងកសិកម្ម បានជួបពិភាក្សាជាមួយក្រសួងរ៉ែ និងថាមពល និងក្រសួងពាណិជ្ជកម្ម ពាក់ព័ន្ធនឹងក្តីបារម្ភរបស់ប្រជាកសិករ ជុំវិញតម្រូវការផ្គត់ផ្គង់ និងតម្លៃប្រេងឥន្ធនៈ ដែលជាតម្រូវការចាំបាច់សម្រាប់ដំណើរការគ្រឿងចក្រកសិកម្ម ប្រព័ន្ធស្រោចស្រព និងការដឹកជញ្ជូនកសិផល។

ក្រសួងកសិកម្ម បានណែនាំឱ្យប្រធានមន្ទីរកសិកម្ម រាជធានី-ខេត្ត ចូលរួមសម្របសម្រួល និងតាមដានដោយយកចិត្តទុកដាក់លើស្ថានភាពផ្គត់ផ្គង់ និងតម្លៃប្រេង និងឧស្ម័នឥន្ធនៈ ក្នុងភូមិសាស្ត្ររាជធានី-ខេត្ត។ ចំពោះតម្លៃប្រេង និងឧស្ម័នឥន្ធនៈ ត្រូវអនុវត្តតាមតារាងតម្លៃដែលចេញផ្សាយ ដោយក្រសួងរ៉ែ និងថាមពល និង/ឬក្រសួងពាណិជ្ជកម្ម។

មន្ទីរកសិកម្ម រាជធានី-ខេត្តត្រូវសម្របសម្រួលដោះស្រាយឱ្យបានឆាប់រហ័សក្នុងករណីប្រជាកសិករ ឬសហគមន៍កសិកម្មមានបញ្ហាប្រឈម និងការលំបាកក្នុងការទទួលបាននូវប្រេងឥន្ធនៈ ដោយធ្វើការជូនដំណឹងដល់មន្ទីររ៉ែ និងថាមពល និង/ឬមន្ទីរពាណិជ្ជកម្មប្រចាំរាជធានី-ខេត្តសាមី។

មន្ទីររាជធានី-ខេត្តត្រូវចូលរួមសហការផ្សព្វផ្សាយដល់ប្រជាកសិករ ឬសហគមន៍កសិកម្មអំពីការប្រើប្រាស់មធ្យោបាយផ្ទុក (ប៊ីដុង ឬកាន) ក្នុងកម្រិតចំណុះដែលមានសុវត្ថិភាព និងធានាការពារកុំឱ្យមានហានិភ័យឆាបឆេះ ធ្វើឱ្យប៉ះពាល់ដល់ ទ្រព្យសម្បត្តិ ឬអាយុជីវិតផ្ទាល់ខ្លួន និងការរស់នៅរបស់ប្រជាជនក្នុងមូលដ្ឋាន។

ពាក់ព័ន្ធនឹងបញ្ហានេះ ក្រសួងពាណិជ្ជកម្ម បានណែនាំឱ្យស្ថានីយ និងដេប៉ូចែកចាយប្រេងឥន្ធនៈនៅតាមបណ្ដារាជធានី-ខេត្ត ត្រូវលក់ប្រេងទៅតាមតម្លៃដែលបានដាក់បង្ហាញជាសាធារណៈ ដើម្បីធានានូវតម្លាភាព។

តម្លៃប្រេងឥន្ធនៈលក់រាយនៅតាមស្ថានីយប្រេងឥន្ធនៈអនុវត្តចាប់ពីថ្ងៃទី ១៤ ដល់ថ្ងៃទី ១៦ ក្នុងនោះតម្លៃប្រេងសាំងធម្មតា លក់រាយ ៥២០០ រៀល ក្នុងមួយលីត្រ ខណៈប្រេងម៉ាស៊ូតកើនឡើងដល់ ៦៤០០ រៀល ក្នុងមួយលីត្រ៕

អត្ថបទ៖ ឡេង ដេត