ធនាគារ អេស៊ីលីដា ប្រកាសដាក់ឲ្យដំណើរការជាផ្លូវការនូវ អេស៊ីលីដា អ៉ីសប ឬផ្សារអនឡាញ

ធនាគារ អេស៊ីលីដា ភីអិលស៊ី ជាធនាគារពាណិជ្ជទីមួយ​ក្នុងប្រទេស​កម្ពុជា ដែល​បាន​បោះផ្សាយ​មូល​ប​ត្រ​កម្មសិទ្ធិ​ជា​សាធារណៈ​នៅ​ក្រុមហ៊ុន​ផ្សារ​មូលបត្រ​កម្ពុជា (​ផ​.​ម​.​ក​) នៅថ្ងៃទី ៣០ ខែវិច្ឆិកា ឆ្នាំ ២០២១ នេះ បានប្រកាសដាក់ឲ្យដំណើរការជាផ្លូវការនូវ អេស៊ីលីដា អ៉ីសប(ផ្សារអនឡាញ) ដែលជាមធ្យោបាយទាន់សម័យសម្រាប់ទិញ-លក់ទំនិញ និងទូទាត់អនឡាញតាម អេស៊ីលីដា ម៉ូបាល។

ថ្លែង​នៅក្នុង​សន្និសីទ​សារ​ព័ត៌មាន​ ស្តីពី​ការដាក់​ឲ្យ​ដំណើរការ​ជា​ផ្លូវការ​នូវ អេស៊ីលីដា អ៉ីសប​នៅ​ព្រឹក​ថ្ងៃទី ​៣០ ​វិច្ឆិកា​នេះ បណ្ឌិត អ៉ិន ចាន់នី ប្រធាន​នាយក​ប្រតិបត្តិ ធនាគារ អេស៊ីលីដា ភីអិលស៊ី បាន​មានប្រសាសន៍ថា ផ្សារ​អន​ឡាញ​កំពុងមាន​ប្រជាប្រិយ​ភាពខ្លាំង​នៅក្នុង​ពិភពលោក រួមទាំង​ព្រះរាជាណាចក្រ​កម្ពុជា​។ មូលហេតុ​ចម្បង​ ដែល​មនុស្ស​ជាច្រើន​និយម​ទិញ​-​លក់ ទំនិញ និង​សេវ​កម្ម​ផ្សេងៗ តាម​ផ្សារ​អន​ឡាញ ដោយសារ​វា​មាន​ភាពងាយស្រួល ចំណេញ​ពេលវេលា ជៀសផុត​ការឆ្លង​មេរោគ ក្នុង​បរិបទ នៃ​ការរីក​រាលដាល​ជំងឺ​កូ​វីដ​-១៩​។

​លោក បណ្ឌិត បាន​បន្តថា ​ដោយ​មើលឃើញ​ឱកាស និង​សក្តានុពល​ផ្សារ​អន​ឡាញ​នេះ ធនាគារ អេស៊ីលីដា បាន​អភិវឌ្ឍ និង​ដាក់​ឲ្យ​ដំណើរការ​ជា​ផ្លូវការ​នូវ អេស៊ីលីដា អ៉ីសប ជា​ផ្សារ​អន​ឡាញ ដើម្បី​ឲ្យ​ដៃគូ​អាជីវកម្ម អាជីវករ និង​អតិថិជន អាច​ទិញ​-​លក់ និង​ទូទាត់​ទំនិញ និង​សេវាកម្ម ផ្សេងៗ បាន​យ៉ាង​ឆាប់រហ័ស ងាយស្រួល ចំណេញ​ពេលវេលា និង​មាន​សុវត្ថិភាព​ខ្ពស់​។ ក្នុងនោះ The First Store ជា​ក្រុមហ៊ុន​ផ្គត់ផ្គង់​ទំនិញ​ដំបូង​គេ ដែល​បានដាក់​លក់ទំនិញ​រាប់ម៉ឺន​ប្រភេទ នៅលើ​ផ្សារ​អន​ឡាញ អេស៊ីលីដា អ៉ីសប ។

លោក ប៊ុន ណា​រ៉ា អ្នកគ្រប់គ្រង​ទូទៅ the First Store The First Store បាន​មានប្រសាសន៍ថា The First Store​បាន បង្កើតឡើង​នៅ​ឆ្នាំ​២០១៣ ដោយ​ផ្តោតលើ​គុណភាព​តម្លៃ និង​សេវាកម្ម ដើម្បី​បំពេញតម្រូវការ​ប្រចាំថ្ងៃ​ដោយមាន​ទំនិញ​ប្រហែល​១២០០០​មុខទំនិញ​សម្រាប់​ផ្គត់ផ្គង់​ជូន​អតិថិជន​ទូទាំងប្រទេស​។ លោក​បាន​បន្តថា ក្នុងសម័យ​បច្ចេកវិទ្យា និង​ក្នុង​បរិបទ​កូ​វីដ​-១៩​នេះ ផងដែរ E-Shop ដើរតួនាទី​ដ៏​សំខាន់​ក្នុង​វិស័យ​អាជីវកម្ម​។ លោក​បាន​បន្ថែមថា​« យើងខ្ញុំ​ក៏មាន​មោទនភាព​ជាខ្លាំង ដែល​បាន​សហការ​ជាមួយ ACLEDA E-Shop ដើម្បី​មាន​ភាពងាយស្រួល​ក្នុង​ការបញ្ជាទិញ​។​ The First Store រីករាយ​បម្រើ​លោកអ្នក​ដោយ​បេះដូង​»៕​