​ចិន នឹងបញ្ជាទិញមៀនប៉ៃលិនមួយថ្ងៃខ្ទង់ ២០០តោន ចាប់ពីខែ សីហាតទៅ

គយចិន បានទទួលស្គាល់ និងអនុញ្ញាតឱ្យក្រុមហ៊ុនចិន អាចនាំចូលផ្លែមៀនប៉ៃលិនរបស់កម្ពុជា ទៅទីផ្សារចិន នៅអំឡុងខែសីហា ខាងមុខ។ នេះបើតាមការបញ្ជាក់ពីលោក សួន ជុំ អនុប្រធានសមាគមមៀនប៉ៃលិន ដែលទទួលបានដំណឹងនេះពីក្រុមហ៊ុន ស៊ីន គួយ យ័ន របស់ចិនមានរោងចក្រ និងឡសម្លាប់មេរោគ​លើ​ផ្លែមៀន នៅក្នុងខេត្តប៉ៃលិន។

លោក សួន ជុំ បានបញ្ជាក់ប្រាប់កម្ពុជាថ្មី នៅថ្ងៃទី ១០ មិថុនានេះថា ក្រុមហ៊ុនបញ្ជាទិញ បានប្រាប់ឱ្យកសិករដាំមៀន នៅខេត្តប៉ៃលិន ត្រៀមខ្លួនដើម្បីប្រមូលផលមៀនសម្រាប់នាំចេញទៅផ្សារប្រទេសចិន។

លោកបន្តថា ក្រុមហ៊ុនចិន ចាប់ផ្តើមបញ្ជាទិញជាដំណាក់កាល ពោលគឺដំណាក់កាលទី១ ចាប់ពីខែ សីហា ដល់ខែធ្នូ ឆ្នាំនេះ ក្នុងតម្លៃ ៣  ៦០០រៀល ក្នុងមួយគីឡូក្រាម។ ដំណាក់កាលទី ២ ចាប់ពីខែ ធ្នូ ដល់ខែ មករា ឆ្នាំ ២០២៣ តម្លៃ ៣ ៨០០រៀល ដំណាក់កាលទី៣ ពីខែមករា ដល់ខែ កុម្ភៈ តម្លៃមួយគីឡូ ៤ ០០០រៀល និងឈានដល់ ៤ ៥០០រៀល​​ ចាប់ខែមីនា ដល់ឧសភា ឆ្នាំ២០២៣។ បើតាមលោក សួន ជុំ ក្នុងមួយថ្ងៃក្រុមហ៊ុនចិន អាចបញ្ជាទិញមៀនប៉ៃលិនប្រមាណខ្ទង់ ១០០-២០០ តោន។

ប៉ុន្តែតម្រូវការរបស់ក្រុមហ៊ុន គឺទាមទារឱ្យកសិករ ជាម្ចាស់ចម្ការត្រូវមានវិញ្ញាបនបត្រអនុវត្តកសិកម្មល្អ (CAM GAP) ដែលចេញពីក្រសួងកសិកម្ម​ រុក្ខាប្រមាញ់ និងនេសាទ។​ នេះជាការបញ្ជាក់បន្ថែមរបស់លោក សួន ជុំ។

លោក វេង សាខុន រដ្ឋមន្តី្រក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកន្លងមកថា បច្ចុប្បន្ន កម្ពុជាមានផ្ទៃដីដាំដុះតាង៉ែនទូទាំងប្រទេសសរុប ១៣,៦០៨ហិកតា នៅក្នុងខេត្តចំនួន១៤ ។ ខេត្តដែលមានកសិករដាំដុះប្រភេទនេះច្រើនជាងគេ គឺខេត្តប៉ៃលិន បាត់ដំបង រតនៈគិរី និងបន្ទាយមានជ័យ។ លោករដ្ឋមន្រ្តីបានគូសបញ្ជាក់ថា ទិន្នផលផ្លែមៀនប៉ៃលិន ឬតាង៉ែន គិតជាមធ្យមមានចំនួន១៦តោន ក្នុងផ្ទៃដីមួយហិកតា៕