លោកជំទាវ ជា សិរី បរិច្ចាគថវិកា២០លានរៀល ចូលរួមដោះស្រាយបញ្ហាគ្រាប់មីននៅកម្ពុជា

លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា បានចូលរួមបរិច្ចាគថវិកាប្រមាណ ២០លានរៀល ជូនដល់រាជរដ្ឋាភិបាលកម្ពុជា ដើម្បីរួមចំណែកដោះស្រាយបញ្ហាមីន នៅទូទាំងប្រទេសកម្ពុជា។

ការចូលរួមបរិច្ចាគថវិកានេះ បានធ្វើឡើងបន្ទាប់ពីសម្តេចតេជោ ហ៊ុន សែន អំពាវនាវដល់វិស័យឯកជននានា ដែលមានបំណងចូលរួមជាមួយរាជរដ្ឋាភិបាល ដើម្បីបោសសម្អាតមីននៅកម្ពុជា។

លោកទេសរដ្ឋមន្រ្តី លី ធុជ អនុប្រធានទី១ នៃអាជ្ញាធរមីន បានអះអាងថា កម្ពុជាត្រូវការថវិកាប្រមាណ ៩០លានដុល្លារសហរដ្ឋអាមេរិកថែមទៀត ដើម្បីបោសសម្អាតមីន នៅសេសសល់លើផ្ទៃដីប្រមាណជិត២ពាន់គីឡូម៉ែត្រការ៉េ។

យោងតាមរបាយការណ៍របស់អាជ្ញាធរមីន បានឱ្យដឹងថា គិតចាប់តាំងពីឆ្នាំ១៩៩២ មកដល់ខែឧសភា ឆ្នាំ២០២២ កម្ពុជាបានបោសសម្អាតមីន និងគ្រាប់មិនទាន់ផ្ទុះ លើផ្ទៃដីប្រមាណ ២៤១០គីឡូម៉ែត្រការ៉េ ដោយនៅសេសសល់​ប្រមាណ ១៩៩២គីឡូម៉ែត្រការ៉េទៀត។ ប្រជាជនប្រមាណជាង៥ម៉ឺននាក់បានរងគ្រោះដោយ​សារមីន ខណៈជិត​២ម៉ឺននាក់ បានស្លាប់ និងជា៩ពាន់នាក់ពិការ។ អាជ្ញាធរមីន បានប្តេជ្ញាថា នឹងបោសសម្អាតមីនឱ្យត្រឹមឆ្នាំ ២០២៥ ខាងមុខ តាមផែនការរបស់រាជរដ្ឋាភិបាល។

សម្តេចតេជោ ហ៊ុន សែន បានថ្លែងអំណរគុណដល់សប្បុរសជនទាំងអស់ ដែលបានចូលរួមបរិច្ចាគថវិកានេះផងដែរ៕