លោក ប៉ែន​ សុវិជាតិ៖ កម្ពុជា ទទួលបានកេរ្តិ៍ឈ្មោះ​ជាចំណែកមួយ​នៃប្រភពផ្គត់ផ្គង់

កម្ពុជា បច្ចុប្បន្នទទួលបានកេរ្តិ៍ឈ្មោះ ជាចំណែកមួយនៃប្រភពផ្គត់ផ្គង់ និងមានការទុកចិត្តពីអ្នកបញ្ជាទិញ។ ជាក់ស្តែងមានការបញ្ជាទិញ ទោះក្នុងកាលៈទេសៈវិបត្តិកូវីដ ក៏ពុំមានការរអាក់រអួលក្នុងការផ្គត់ផ្គង់ឡើយ។ នេះជាការបញ្ជាក់របស់លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម នៅក្នុងសន្និសីទសារព័ត៌មាន​ស្ដីពី«សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងពាណិជ្ជកម្ម» នៅថ្ងៃទី២១ កក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បានបន្តថា ប្រទេសខ្លះ ដោយសារថ្លៃដឹកជញ្ជូនកើនឡើង ក៏មានការដាច់ខ្សែរយៈខ្លះក្នុងការនាំចេញ ប៉ុន្តែកម្ពុជា ទោះបីជាថ្លៃដឹកជញ្ជូនកើនឡើងក្តី យើងបានសម្របសម្រួលឱ្យស្របរវាងអ្នកផលិត និងអ្នកទិញ ដើម្បីធានានិរន្តរភាពនៃ​ការនាំចេញ។ ជាក់ស្តែងទំហំពាណិជ្ជកម្មរវាងកម្ពុជា-សហរដ្ឋអាមេរិក បានកើនដល់កម្រិតមួយខ្ពស់ ដោយឡែកទៅ​ទីផ្សារអឺរ៉ុបក៏ដូចគ្នា។ RCEP និងកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន ក៏ជាកក្តារួមចំណែកបង្កើន​ការនាំចេញសម្រាប់កម្ពុជាផងដែរ ។

អ្នកនាំពាក្យក្រសួងពាណិជ្ជកម្ម បានគូសបញ្ជាក់ថា ធុរជន និងអ្នកនាំចេញកម្ពុជា បាននាំចេញទំនិញទៅទីផ្សារ RCEP ជាច្រើន ខណៈដែលកិច្ចព្រមព្រៀងពាណិជ្ជកម្មសេរីរវាងកម្ពុជា កូរ៉េ នឹងចូលជាធរមានឆាប់ៗខាងមុខ។

បើតាមលោក ប៉ែន សុវិជាតិ ក្រសួងពាណិជ្ជកម្ម បានព្យាយាមទំនាក់ទំនងជាមួយប្រទសផ្សេងៗទៀត ដែលមាន​តម្រូវការ​អង្ករខ្ពស់ដូចជា ឥណ្ឌូនេស៊ី ហ្វីលីពីន  បង់ក្លាដេស និងចិន ដើម្បីពង្រីកការនាំចេញ​អង្ករកម្ពុជាបន្ថែមទៀត។

លោកបន្ថែមដូច្នេះថា« កំណើននៃការនាំចេញនេះ គឺជាសក្ខីភាពមួយ ដោយកំណើនមានតាំងពី ៩ភារយ រហូតដល់ជិត ១០០ភាគរយ ដែលនេះជាឱកាសបើកទូលាយ ទទួលបានប្រយោជន៍ពីកិច្ចព្រមព្រៀងពាណិជ្ជកម្មសេរីថ្នាក់តំបន់»។

ចំណែកកេរ្តិ៍ឈ្មោះរបស់កម្ពុជា គឺជាប្រភពផ្គត់ផ្គង់មាននិរន្តរភាព និងភាពគួរឱ្យជឿទុកចិត្ត ជាក់ស្តែងដូចជា ផ្លែស្វាយ និងចេក របស់កម្ពុជា មានការពេញនិយមខ្លាំងនៅលើទីផ្សារគោលដៅ ដែលបាននាំចេញកន្លងមក។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ នៅឆមាសទី១ឆ្នាំ២០២២នេះ កម្ពុជា បាននាំចេញអង្ករជាង ៣២ម៉ឺនតោនទៅកាន់សហភាពអឺរ៉ុប ចិន អាស៊ាន និងប្រទេសគោលដៅ២៣ទៀត កើនឡើង១៦ភាគរយ ធៀបនឹងរយៈពេលដូចគ្នាឆ្នាំ២០២១។ ចំណែក ការនាំចេញស្រូវមានជាង ១៧៣ម៉ឺនតោន ទៅកាន់វៀតណាម កើនឡើង២ភាគរយ នឹងរយៈពេលដូចគ្នាឆ្នាំ២០២១៕