​ប្រទេសចំនួនបី ដែលវិនិយោគវិស័យសំណង់ និងអចលនទ្រព្យច្រើនជាងគេ នៅកម្ពុជា

វិស័យសំណង់ និងអចលនទ្រព្យ បានរួមចំណែកយ៉ាងសំខាន់ក្នុងសេដ្ឋកិច្ចជាតិ។ ប្រទេសដែលវិនិយោគវិស័យសំណង់ និងអចលនទ្រព្យ នៅកម្ពុជាច្រើនជាង គឺប្រទេសចិន បន្ទាប់កូរ៉េខាងត្បូង និងវៀតណាម ជាប់លេខរៀងទី៣។

យោងតាមរបាយការណ៍របស់ធនាគារជាតិនៃកម្ពុជា បានឱ្យដឹងថា លំហូរចូលវិនិយោគផ្ទាល់ពីបរទេសក្នុងឆ្នាំ ២០១៩ កើនឡើងប្រមាណ ១២ភាគរយ ស្មើ ៣,៥លានដុល្លារ។ ខណៈនេះដែរ លំហូរចូលវិនិយោគពីរបទេស ២,៣ ពាន់លានដុល្លារ បានចូលក្នុងវិស័យហិរញ្ញវត្ថុ ក្នុងនោះចិន​ ជាប្រទេសធំជាងគេ ដែលបានវិនិយោគដោយផ្ទាល់ ចំនួន ៤៣ភាគរយ បន្ទាប់មកកូរ៉េខាងត្បូង ១១ភាគរយ វៀតណាម ៧ភាគរយ ជប៉ុន និងសិង្ហបុរី ៦ភាគរយ ។ របាយការណ៍នេះ បង្ហាញដោយលោក លី រស្មី រដ្ឋលេខធិការក្រសួងរៀបចំដែនដី នគរូបនីយកម្ម និងសំណង់ នៅក្នុងសន្និសីទសារព័ត៌មាន ព្រឹកថ្ងៃទី ២៤ ខែ សីហា ឆ្នាំ ២០២២។

លោក លី រស្មី បានគូសបញ្ជាក់ថា កម្ពុជា ជាប្រទេសមានស្ថេរភាពនយោបាយ និងសន្តិសុខសង្គមល្អ ដែលធ្វើឱ្យមានការអភិវឌ្ឍខ្លាំងក្នុងវិស័យសំណង់ និងអចលនទ្រព្យ។ ក្នុងន័យនេះ លោក បញ្ជាក់ថា វិស័យសំណង់គឺជាផ្នែកមួយដែលមានសារៈសំខាន់ រួមចំណែកអភិវឌ្ឍសេដ្ឋកិច្ចជាតិ ដោយបំពេញនូវគោលបំណងជាមូលដ្ឋាន ​នៃការអភិវឌ្ឍសង្គម និងបានបង្កើតការងារយ៉ាងច្រើនដល់ពលរដ្ឋ ដោយបង្កើនប្រាក់ចំណូលខ្ពស់ដល់សង្គមជាតិ។

មន្រ្តីជាន់ខ្ពស់ក្រសួងរៀបចំដែនដី រូបនេះ បានបញ្ជាក់ថា ការវិនិយោគវិស័យសំណង់ ៦ខែ ឆ្នាំនេះ មាន ២០០០គម្រោង លើទុនវិនិយោគជាង ​១ពាន់លានដុល្លារ។ ដោយឡែកនៅឆ្នាំ ២០២១ មានជាង ៤ពាន់គម្រោង លើផ្ទៃក្រឡាជាង ១២លានម៉ែត្រការ៉េ ក្នុងនោះ ទុនវិនិយោគមានជាង ៥ពាន់លានដុល្លារអាមេរិក៕