ឡាវ ដាក់គោលដៅពង្រឹងពាណិជ្ជកម្មតាមអនឡាញដើម្បីលើកកម្ពស់វិស័យ SME

រដ្ឋាភិបាលឡាវបានពង្រឹងបន្ថែមទៅលើពាណិជ្ជកម្មអេឡិចត្រូនិក ជាគោលដៅយុទ្ធសាស្ត្រដ៏សំខាន់ ចាប់ពីពេលនេះទៅដល់ឆ្នាំ ២០២៥​ ដោយផ្តោតសំខាន់លើការលើកកម្ពស់សហគ្រាសធុនតូច និងមធ្យម (SME) ដើម្បីជំរុញកំណើនសេដ្ឋកិច្ច ។

ពាក់ព័ន្ធនឹងបញ្ហានេះដែរ លោក Latthana Douangboupha អគ្គនាយករងនៃនាយកដ្ឋានជំរុញសហគ្រាសធុនតូច និងមធ្យម (SME) ក្រោមក្រសួងឧស្សាហកម្ម និងពាណិជ្ជកម្មឡាវបញ្ជាក់ថា គោលបំណងបង្កើតគោលនយោបាយ និងយុទ្ធសាស្ត្រពាណិជ្ជកម្មអេឡិចត្រូនិកនេះ គឺដើម្បីពង្រឹងសហគ្រាសធុនតូច និងមធ្យមក្នុងយុគសម័យឌីជីថល ។

បច្ចុប្បន្ន ពាណិជ្ជកម្មតាមប្រព័ន្ធអេឡិចត្រូនិកទទួលបានការចាប់អារម្មណ៍យ៉ាងខ្លាំងនៅក្នុងប្រទេសឡាវ ជាពិសេសក្នុងអំឡុងពេលជំងឺរាតត្បាតកូវីដ ១៩ ដែលជំរុញឲ្យរដ្ឋាភិបាលឡាវទទួលស្គាល់តម្រូវការសម្រាប់បទប្បញ្ញត្តិច្បាស់លាស់ដើម្បីការពារវិនិយោគិន ។

ស្របពេលជាមួយគ្នានេះ ការចេញច្បាប់ថ្មីមួយដែលគាំទ្រដល់កំណើននៃពាណិជ្ជកម្មអេឡិចត្រូនិច ក៏បានបង្កើនទំនុកចិត្តបន្ថែមទៀតទៅដល់ប្រតិបត្តិការឌីជីថល ក្នុងចំណោមពាណិជ្ជករ និងអ្នកប្រើប្រាស់ឡាវជាដើម ។

គួរឲ្យដឹងថា ចាប់តាំងពីការអនុវត្តច្បាប់ស្តីពីប្រតិបត្តិការអេឡិចត្រូនិកក្នុងឆ្នាំ ២០១២​ និងច្បាប់ស្តីពីពាណិជ្ជកម្មអេឡិចត្រូនិកក្នុងឆ្នាំ ២០២១ មក រដ្ឋាភិបាលឡាវបានស្រាវជ្រាវយ៉ាងសកម្មនូវគំនិតផ្តួចផ្តើមដើម្បីជំរុញកំណើន និងបង្កើតប្រាក់ចំណូលពីពាណិជ្ជកម្មអេឡិចត្រូនិកមួយនេះផងដែរ ​៕

ប្រែសម្រួល៖ នាង​ រតនៈ

ប្រភព៖​ Laotian Times