កសិផល កសិឧស្សាហកម្ម ជាង ៨០ ម៉ឺនតោន ត្រូវបាននាំចេញ តាមច្រកទ្វារអន្តរជាតិអូរយ៉ាដាវ

ប្រជាកសិករនៅតាមបណ្តាខេត្តផ្សេងៗសម្រុកយកកសិផល និងឧស្សាហកម្ម មកតាមច្រកទ្វារអន្តរជាតិអូយ៉ាដាវ ខេត្តរតនគិរី ចេញទៅក្រៅប្រទេស បានជាង ៨០ ម៉ឺនតោន ក្នុងរយៈពេលជិតពីរខែ ដើមឆ្នាំ២០២៤ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៉ីម លីន ប្រធានច្រកទ្វារអន្តរជាតិអូរយ៉ាដាវ បានឱ្យដឹងថា ត្រឹមតែពីរខែប៉ុណ្ណោះ ច្រកទ្វារព្រំដែនអន្តរជាតិអូរយ៉ាដាវ (កម្ពុជា) – លេថាញ់ (វៀតណាម) បាននាំកសិផល និងកសិកឧស្សាហកម្មចេញ សរុបប្រមាណជាង ៨០ ម៉ឺនតោន ក្នុងនោះ ទំនិញនាំចេញសរុបជាផ្លូវការមានចំនួន ១២៦ ៧៦៧ តោន។ កសិផល និងកសិឧស្សាហកម្មនាំចេញជាផ្លូវការនេះមានដូចជា ផ្លែស្វាយ គ្រាប់ស្វាយចន្ទី ម្សៅដំឡូងមី កៅស៊ូក្រែប និងផ្លែកចេកដំបូងលឿង ដែលទំនិញទាំងអស់នេះសុទ្ធតែជាទំនិញរបស់ក្រុមហ៊ុនដែលត្រូវបង់ពន្ធ។

ចំណែកកសិផលដែលនាំចេញក្រៅផ្លូវការរយៈពេល ២ខែ មានចំនួនសរុប ៦៧៣ ៧៤០ តោន។ ទំនិញនាំចេញក្រៅផ្លូវការនេះគឺជារបស់បងប្អូនប្រជាកសិករដែលផលិតបាន ហើយមិនត្រូវការបង់ពន្ធអាករនោះទេ មានដូចជា ដំឡូងមីស្រស់ ដំឡូងមីក្រៀម គ្រាប់ស្វាយចន្ទី និងសណ្ដែកសៀងជាដើម។ សរុបទាំងទំនិញផ្លូវការ និងទំនិញក្រៅផ្លូវការ មានចំនួន ៨០០ ៥០៧ តោន។

លោក ស៊ីម លីន បញ្ជាក់ថា បើប្រៀបធៀបទៅនឹងរយៈពេលដូចគ្នា ឆ្នាំ២០២៤ ច្រកទ្វារព្រំដែនអូរយ៉ាដាវបាននាំទំនិញចេញគ្រប់ប្រភេទទៅក្រៅប្រទេសច្រើនជាងឆ្នាំ២០២៣ កន្លងទៅ។

លោក ស៉ីម លីន បានឱ្យដឹងទៀតថា រយៈពេល ២ខែ ដើមឆ្នាំ២០២៤ សម្រាប់ច្រកទ្វារព្រំដែនអន្តរជាតិអូរយ៉ាដាវ បច្ចុប្បន្នកំពុងមមាញឹកការនាំកសិផលចេញ និងចូល និងមានទំនាក់ទំនងល្អក្នុងការសហការត្រួតពិនិត្យទប់ស្កាត់ជាមួយភាគីវៀតណាម ក្នុងការបង្ក្រាបបទល្មើសឆ្លងដែនគ្រប់ប្រភេទមានភាពល្អប្រសើរ។ ចំពោះការសម្របសម្រួលក្នុងការធ្វើដំណើរភ្ញៀវជាតិ និងអន្តរជាតិចេញចូលរវាងភាគីទាំងពីរ កម្ពុជា និងវៀតណាម តាមច្រកទ្វារនេះ ក៏មានភាពរលូន៕

អត្ថបទ៖ វុទ្ធឦសាន