ខេត្ត៤ របស់កម្ពុជានៅក្នុងតំបន់អភិវឌ្ឍត្រីកោណ CLV មានគម្រោងវិនិយោគ ១០៥ សរុបទឹកប្រាក់ ៣,៧ ពាន់លានដុល្លារ

តំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV) មាន ១៣ ខេត្ត ក្នុងនោះ ខេត្តទាំង ៤ របស់កម្ពុជា មានខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង មានគម្រោង​វិនិ​យោគ​ចំនួន ១០៥ គម្រោង គិតជាទឹកប្រាក់ប្រមាណ ៣,៧៤៥ ពាន់លានដុល្លារ ដែលបានបង្កើតការងារ​ជូនប្រជាពលរដ្ឋជាង ១៦ ម៉ឺននាក់។ នេះបើយោងតាមរបាយការណ៍​របស់ក្រុមប្រឹក្សា​អភិវឌ្ឍន៍​កម្ពុជា។

ក្នុងចំណោមគម្រោងទាំងអស់ មានគម្រោងវិនិយោគលើវិស័យកសិកម្មចំនួន ៨០ គម្រោង ដែលមានទឹកប្រាក់ ២,៧៤០ ពាន់លានដុល្លារ; ឧស្សាហកម្មមាន ៥ គម្រោង; ហេដ្ឋរចនាសម្ព័ន្ធមាន ១៩ គម្រោង; និងទេសចរណ៍ ១ គម្រោង។

លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិន និងជាអ្នកស្រាវជ្រាវសេដ្ឋកិច្ច នៃរាជ​បណ្ឌិត្យសភាកម្ពុជា បានលើកឡើងថា បណ្ដាប្រទេសជាច្រើនបានបោះទុន​វិនិយោគ​នៅតំបន់ត្រីកោណអភិវឌ្ឍន៍ CLV របស់កម្ពុជា ក្នុងនោះប្រទេសវៀតណាម ៣២,៣៨ ភាគរយ; ចិន ២១,៩០ ភាគរយ; សិង្ហបុរីជិត ៤ ភាគរយ; អង់គ្លេស ៣,៨១ ភាគរយ; រួមនឹងកម្ពុជាខ្លួនឯង ២៦ ភាគរយ។

លោកបណ្ឌិត គី សេរីវឌ្ឍន៍ បានបញ្ជាក់ថា៖ «បរទេសទាំងអស់វិនិយោគនៅទីនេះ ដែលមានក្រុមហ៊ុនអាមេរិក អង់គ្លេស និងអូស្ត្រាលី បើវាស្ថិតនៅក្នុងដែនអធិបតេយ្យភាពកម្ពុជា គ្មានក្រុមហ៊ុនណាមកបាតុកម្មទេ»។

សូមជំរាបថា គម្រោងទាំង ១០៥ បែងចែក្នុងខេត្តទាំង ៤ រួមមាន ខេត្តក្រចេះ មាន ៤២ គម្រោង ខេត្តស្ទឹងត្រែង ១៦ គម្រោង ខេត្តរតនគិរី ២៨ គម្រោង ខេត្តមណ្ឌលគិរី ១៩ គម្រោង៕

អត្ថបទ៖ ឡេង ដេត