ទិន្នផលត្រីកើនឡើងជាងឆ្នាំមុន ខណៈតម្លៃក៏ទាប

ទិន្នផល​ត្រីប្រហុកនៅតាមដាយ មានការកើនឡើងខ្ពស់​ជាងឆ្នាំមុន ដោយសារ​តែការបង្ក្រាប​បទល្មើសបានច្រើន ជាពិសេស​នៅបឹងទន្លេសាប​ ដែល​ធ្វើឱ្យត្រី​កកើតឡើងវិញ​ទាន់ពេលវេលា​ ហើយត្រីធ្វើចរាចរណ៍ធម្មតា។​

លោក ឈុន ហាំងតុង ប្រធានអង្គភាពនេសាទរដ្ឋកណ្តាលស្ទឹង នៃក្រសួងកសិកម្ម រុក្ខាប្រមាញ់ និងនេ​សាទ​ ប្រាប់កម្ពុជាថ្មីថា ត្រីចាប់ផ្ដើមត្រូវច្រើនរយៈពេល ៣ ថ្ងៃហើយ ពោលគឺចាប់តាំងពីថ្ងៃទី ០៧ ខែធ្នូ ឆ្នាំ ២០២៤។

លោក ឈុន ហាំងតុងបានអះអាងថា ស្ថានភាពត្រីតាមដាយ មានកំណើន ដោយសារតែការបង្ក្រាបបទល្មើស និងទឹកធំជាងឆ្នាំមុន។ ជាមធ្យម រយៈពេល ១ ម៉ោង ត្រីចូលដាយប្រមាណ ៧០០ ទៅ ៨០០ គីឡូក្រាម អាស្រ័យលើអាកាសធាតុ អាចដល់១ តោន។

តម្លៃធូរថ្លៃជាងឆ្នាំមុនពី ៧០០ រៀល ដល់ ៨០០ រៀល ក្នុងមួយគីឡូក្រាម ដែលតម្លៃលើកពីដាយ ខណៈឈ្មួញយកទៅលក់បន្តតាមប្រភេទត្រី តូច ធំ។

រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ត្រីប្រហុកចាប់ផ្ដើមត្រូវចាប់ពីថ្ងៃទី ០៨ រហូតដល់ថ្ងៃទី ១៣ ខែធ្នូ ឆ្នាំ ២០២៤ ខណៈត្រី​ចាប់​ផ្ដើមបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ នៅក្នុងភូមិសាស្ត្រខេត្តកណ្ដាល រាជធានីភ្នំពេញ។

រដ្ឋបាលជលផលក៏ប្រកាសដល់ពលរដ្ឋដែលមានបំណងធ្វើប្រហុក ផ្អក ត្រីឆ្អើ ឬទឹកត្រីរួសរាន់ទៅទិញត្រីតាមពេលវេលាដែលបានបញ្ជាក់ជូន។

ការប្រមូលផលត្រីទឹកសាបសម្រេចបានជាង ៤២ ម៉ឺនតោន (៤២៦ ៧៥០) នៅក្នុងឆ្នាំ ២០២៣ មានការកើនឡើង ៥%៕

អត្ថបទ៖ ឡេង ដេត