ព័ត៌មានអន្ដរជាតិ

ថៃ និងកូរ៉េខាងត្បូងចរចាគ្នា លើកិច្ចព្រមព្រៀងពាណិជ្ជកម្មសេរី

បានផុស

២ years មុន

នៅ

ថ្ងៃអាទិត្យ ១៥ ធ្នូ ២០២៤

ដោយ

រដ្ឋមន្ត្រីក្រសួងពាណិជ្ជកម្មថៃ លោក Pichai Naripthaphan បានឱ្យដឹងកាលពីថ្ងៃសៅរ៍ថា ប្រទេសថៃ និងកូរ៉េខាងត្បូងបានត្រៀមខ្លួនដើម្បីចរចាកិច្ចព្រមព្រៀងពាណិជ្ជកម្មសេរី (FTA) ដើម្បីជំរុញពាណិជ្ជកម្ម សេវាកម្ម និងការវិនិយោគទ្វេភាគី។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pichai បានឱ្យដឹងពីការណ៍នេះ ក្រោយបានពិភាក្សាអំពីការចរចាភាពជាដៃគូសេដ្ឋកិច្ច ជាមួយឯកអគ្គរដ្ឋទូតកូរ៉េខាងត្បូងប្រចាំប្រទេសថៃ លោកស្រី Park Yongmin កាលពីថ្ងៃពុធ។ លោកបន្តថា FTA នឹងត្រូវបានដាក់ឈ្មោះថា កិច្ចព្រមព្រៀងភាពជាដៃគូសេដ្ឋកិច្ចថៃ-កូរ៉េខាងត្បូង (EPA)។

កិច្ចព្រមព្រៀងថ្មីនេះ មានគោលបំណងពង្រីកទីផ្សារបន្ថែមទៀតសម្រាប់ពាណិជ្ជកម្មលើទំនិញ សេវាកម្ម និងការវិនិយោគ។ វានឹងបន្ថែមពីលើកិច្ចព្រមព្រៀងដែលថៃ និងកូរ៉េខាងត្បូងមានស្រាប់ ដូចជា កិច្ចព្រមព្រៀងពាណិជ្ជកម្មសេរីសមាគមប្រជាជាតិអាស៊ីអាគ្នេយ៍-កូរ៉េខាងត្បូង និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ជាដើម។ បច្ចុប្បន្ន កូរ៉េខាងត្បូងគឺជាប្រភពវិនិយោគិនដ៏ធំបំផុតទី៦ សម្រាប់ប្រទេសថៃ។

ក្នុងជំនួបកាលពីថ្ងៃពុធដដែល លោក Pichai ក៏បានជំរុញផងដែរឱ្យកូរ៉េខាងត្បូងពិចារណាបើកទីផ្សាររបស់ខ្លួន ចំពោះផលិតផលកសិកម្មដែលមានគុណភាពខ្ពស់ពីប្រទេសថៃ រួមទាំងផ្លែឈើត្រូពិកដូចជា ស្វាយ មង្ឃុត ម្នាស់ បង្គា និងសាច់មាន់ ខណៈភាគីទាំង២បានពង្រីកទំនាក់ទំនងបន្ថែមទៀត។

គេមើលឃើញថា ការចរចារវាងថៃ និងកូរ៉េខាងត្បូង កើតឡើងចំពេលដែលមានការព្រួយបារម្ភពីគោលនយោបាយពន្ធរបស់ប្រធានាធិបតីជាប់ឆ្នោតអាមេរិក លោក ដូណាល់ ត្រាំ ដែលបណ្ដាលឱ្យមានការព្រមានពីអ្នកជំនាញ ឱ្យប្រទេសថៃធ្វើពិពិធកម្មទីផ្សារនាំចេញដើម្បីកាត់បន្ថយប៉ះពាល់ ខណៈប្រទេសនេះពឹងផ្អែកខ្លាំងលើការនាំចេញ ដើម្បីជំរុញកំណើនសេដ្ឋកិច្ចដែលដើរអូសជើង៕