ព័ត៌មានអន្ដរជាតិ

អូស្រ្តាលីគ្រោងចេញច្បាប់ថ្មី តម្រូវឱ្យក្រុមហ៊ុនបច្ចេកវិទ្យាយក្សៗដូចជា Meta និង Google បង់ប្រាក់ឱ្យស្ថាប័នព័ត៌មាន

បានផុស

២ years មុន

នៅ

ថ្ងៃអង្គារ ១៧ ធ្នូ ២០២៤

ដោយ

អូស្ត្រាលីគ្រោងដាក់ចេញនូវច្បាប់ថ្មីមួយ ដោយកំណត់ឱ្យក្រុមហ៊ុនបច្ចេកវិទ្យាយក្សអន្តរជាតិ បង់ប្រាក់ឱ្យក្រុមហ៊ុនប្រព័ន្ធផ្សព្វផ្សាយអូស្ត្រាលី ចំពោះការបង្ហោះមាតិកាព័ត៌មាននៅលើវេទិការបស់ពួកគេ។ នេះបើតាមការប្រកាសរបស់រដ្ឋមន្ត្រីក្រសួងសេវាកម្មហិរញ្ញវត្ថុអូស្រ្តាលី លោក Stephen Jones កាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតផ្តួចផ្តើមនៃច្បាប់ ដែលគេហៅថា «គំនិតផ្តួចផ្តើមការចរចាព័ត៌មាន» នឹងដាក់សម្ពាធឱ្យក្រុមហ៊ុនបច្ចេកវិទ្យាយក្សធំៗដូចជា Meta និង Google ចរចាការបង់ប្រាក់ជាមួយស្ថាប័នប្រព័ន្ធផ្សព្វផ្សាយអូស្រ្តាលី បើមិនដូច្នោះទេ ពួកគេនឹងចំណាយប្រាក់រាប់លានដើម្បីបន្តប្រតិបត្តិការនៅអូស្រ្តាលី។

បើតាមលោក Jones គោលដៅនៃគំនិតផ្តួចផ្តើមនេះ នឹងដាក់ចេញឡើងដើម្បីបង្កើតកិច្ចព្រមព្រៀងហិរញ្ញវត្ថុលើកទឹកចិត្ត រវាងវេទិកាឌីជីថល និងអាជីវកម្មប្រព័ន្ធផ្សព្វផ្សាយព័ត៌មានក្នុងប្រទេសអូស្ត្រាលី។ វានឹងផ្ដោតលើក្រុមហ៊ុនបច្ចេកវិទ្យាធំៗ ដែលទាញប្រាក់ចំណូលយ៉ាងច្រើនពីប្រតិបត្តិការក្នុងប្រទេសអូស្ត្រាលី ជាពិសេសក្រុមហ៊ុនដែលមានប្រាក់ចំណូលលើសពី ២៥០ លានដុល្លារអូស្រ្តាលី (១៦០ លានដុល្លារអាមេរិក)។

គួររំឭកថា កាលពីឆ្នាំ ២០២១ អូស្ត្រាលីបានអនុម័តច្បាប់ដើម្បីតម្រូវឱ្យក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកដូចជា Google និង Meta ផ្តល់សំណងដល់ក្រុមហ៊ុនប្រព័ន្ធផ្សព្វផ្សាយ ចំពោះការបង្ហោះតំណភ្ជាប់ ដែលជំរុញអ្នកអានឱ្យប្រើប្រាស់វេទិការបស់ពួកគេ ហើយពួកគេអាចកើបចំណូលពីការផ្សព្វផ្សាយពាណិជ្ជកម្ម។

ជុំវិញការប្រកាសចុងក្រោយ អ្នកនាំពាក្យក្រុមហ៊ុន Meta លើកឡើងថា សំណើរបស់រដ្ឋាភិបាលអូស្រ្តាលី ធ្វើឡើងដោយមិនគិតពីតថភាពនៃរបៀបដែលវេទិការបស់ខ្លួនដូចជា Facebook ត្រូវបានគេប្រើប្រាស់។ អ្នកនាំពាក្យបន្តថា៖ «មនុស្សភាគច្រើនមិនប្រើវេទិការបស់យើងដើម្បីមើលមាតិកាព័ត៌មានទេ ខណៈស្ថាប័នព័ត៌មានបានស្ម័គ្រចិត្តជ្រើសរើសដើម្បីបង្ហោះមាតិការបស់ពួកគេនៅលើវេទិការបស់យើង ដោយសារពួកគេទទួលបានប្រយោជន៍ពីការធ្វើដូច្នេះ»៕