កម្ពុជា-មីយ៉ាន់ម៉ាពន្លឿនការចរចាលើកិច្ចព្រមព្រៀង DTA ដើម្បីលើកកម្ពស់ការដោះដូរ​ពាណិជ្ចកម្ម និងវិនិយោគ

ប្រទេសមីយ៉ាន់ម៉ាគឺជាប្រទេសសមាជិកអាស៊ានចុងក្រោយបង្អស់របស់កម្ពុជាក្នុងការបញ្ច​ប់ការចរចាលើកិច្ចព្រមព្រៀងស្តីពីការចៀសវាងការយកពន្ធត្រួតគ្នា (​DTA) ដើម្បីបើកផ្លូវឱ្យ​ប្រទេសទាំងពីរជំរុញទាំងការវិនិយោគ និងដោះដូរទំនិញ​ដែលទំហំនៅមានកម្រិតទាប​នៅឡើយបើធៀបនឹងបណ្តាសមាជិកដទៃទៀត។

កាលពីថ្ងៃទី១៣ ដល់ថ្ងៃទី១៥ ខែមករាឆ្នាំ២០២៣ គណៈប្រតិភូនៃអគ្គនាយកដ្ឋានពន្ធដាររបស់កម្ពុជាដែលបានដឹកនាំដោយលោកបណ្ឌិត រសង ជាសិទ្ធ ប្រធាននាយកដ្ឋាននីតិកម្ម គោលនយោបាយ សារពើពន្ធ និងសហប្រតិបត្តិការពន្ធដារអន្តរជាតិ  នៃអគ្គនាយកដ្ឋានពន្ធដារ បានប្រជុំពិភាក្សាលើកិច្ចព្រមព្រៀងនេះជុំទី២ ជាមួយគណៈប្រតិភូនៃសាធារណរដ្ឋនៃសហភាព មីយ៉ាន់ម៉ា ដឹកនាំដោយាលោកស្រី KHIN Yamon Aung អគ្គនាយករង នៃនាយកដ្ឋានចំណូលផ្ទៃក្នុង នៃក្រសួងផែនការ និងហិរញ្ញវ​ត្ថុ តាមរយៈប្រព័ន្ធវីដេអូ។

​លោកស្រី KHIN Yamion Aung បានលើកឡើងអំពីវឌ្ឍនភាពដែលសម្រេចបានពីកិច្ចប្រជុំចរចាជុំទី១ នៅក្នុងឆ្នាំ២០២២ នៅរាជធានីភ្នំពេញ ដែលកម្ពុជាបានធ្វើជាឱ្យបានឆាប់ផងដែរ។ ​

 លោកបណ្ឌិត សេង ជាសិទ្ធ បាន​វាយតម្លៃខ្ពស់ចំពោះកិច្ច ខិតខំរបស់ភាគីមីយ៉ាន់ម៉ា ក្នុងការរៀបចំឱ្យមានកិច្ចប្រជុំចរចាកិច្ចព្រមព្រៀង DTA ជុំទី២ នេះ។ ​លោកបណ្ឌិតក៏បាន មានសុទិដ្ឋិនិយមថា៖« កិច្ចព្រមព្រៀង DTA នេះ នឹងអាចជាចលករមួយរួមចំណែកក្នុងការជំរុញទំនាក់ទំនងពាណិជ្ជកម្ម និង វិនិយោគរវាងកម្ពុជា និងមីយ៉ាន់ម៉ា ឱ្យប្រសើរឡើងផងដែរ»។ ​

​ភាគីទាំងពីរបានពិភាក្សាលម្អិត និងស៊ីជម្រៅលើគ្រប់មាត្រា និងចំណុចដែលនៅសេសសល់ទាំងអស់ដែលពុំទាន់បានឯកភាព នៅជុំទី១។ ​ជាមួយគ្នានោះដែរ ភាគីទាំងពីរ បានដោះស្រាយបញ្ហាដែលនៅសេសសល់ទាំងអស់ ដោយមាត្រាទាំង ៣១ នៃកិច្ចព្រមព្រៀង ត្រូវបានឯកភាពគ្នាទាំងស្រុង។

គួរបញ្ជាក់ផងដែរថា ក្នុងចំណោមរដ្ឋសមាជិកអាស៊ានទាំង ១០ មីយ៉ាន់ម៉ាគឺជារដ្ឋសមាជិកអាស៊ានចុងក្រោយគេ ដែលកម្ពុជាត្រូវចរបា កិច្ចព្រមព្រៀង DTA ​ ដើម្បីឈានទៅសម្រេចបានវិធានការទាក់ទិននឹងពន្ធដារ រ ទៅសម្រេចបានវិធានការទាក់ទិននឹងពន្ធដារ ដែលមានចែងក្នុងផែនការមេសហគមន៍ សេដ្ឋកិច្ចអាស៊ាន៕