សហគមន៍កសិកម្ម «ស្រ្តីសាមគ្គីពានីរុងរឿង» គ្រោងបោះទុន ១១ ម៉ឺនដុល្លារ លើផលិតកម្មជ្រូក

លោក ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានឱ្យដឹងនៅថ្ងៃសុក្រ ទី ២៨ ខែកុម្ភៈ ឆ្នាំ ២០២៥ថា សហគមន៍កសិកម្ម «ស្រ្តីសាមគ្គីពានីរុងរឿង» នៅឃុំពានី ស្រុកកំពង់ត្រឡាច ខេត្តកំពង់ឆ្នាំង ទទួលបានថវិកាជំនួយឥតសំណង ៣៥០០០ដុល្លារ ពីគម្រោងពិពិធកម្មកសិកម្មកម្ពុជា(CASDP) ស្មើនឹង៤០% នៃផែនការវិនិយោគលើការធ្វើពិពិធកម្មមុខរបរចិញ្ចឹមជ្រូកជា​សហគមន៍ ស្របពេលដែលសហគមន៍វិនិយោគបង្គ្រប់ដោយខ្លួនឯងផ្ទាល់​៦០%​ទៀត។

សហគមន៍គ្រោងនឹងបោះទុនវិនិយោគរួមគ្នាជាមួយសមាជិករបស់ខ្លួន លើប្រតិបត្តិការ និងការធ្វើផលិតកម្មជ្រូកប្រមាណ ១១មុឺនដុល្លារ ដែលក្នុងនោះសហគមន៍នឹងដើរតួនាទីផ្គត់ផ្គង់ពូជកូនជ្រូក និងចំណីជ្រូកជូនដល់សមាជិក(មេជ្រូកពូជ​២០​ក្បាល កូន៣០០ក្បាល/ឆ្នាំ ចំណី៣០០តោន/ឆ្នាំ) ដើម្បីយកទៅចិញ្ចឹមបន្តរៀងៗខ្លួន និងផ្គត់ផ្គង់ជ្រូកសាច់ទៅកាន់ទីផ្សារក្នុងបរិមាណប្រហែល ៥០តោន/ឆ្នាំ។

លោក ឃឹម ហ្វីណង់ថ្លែងថា៖ «ក្នុងតួនាទីខ្ញុំជានាយកគម្រោងថ្មីនៃក្រសួងកសិកម្ម ពិតជាសប្បាយចិត្តដែលបានឃើញ​បងប្អូនកសិករយើងចាប់ផ្តើមធ្វើការរួមគ្នាដោយទំនុកចិត្តនិងភាពជឿជាក់ខ្ពស់តាមរយៈការដាក់ទុនវិនិយោគរួមគ្នា ហើយក៏សង្ឃឹមថាសហគមន៍ដ៏មានសក្តានុពលមួយនេះនឹងពិចារណាបង្កើនសមាហរណកម្មរបស់ខ្លួនបន្ថែមទៀត ជាពិសេសការធ្វើផលិតកម្មកសិកម្មតាមកិច្ចសន្យា ដើម្បីទៅប្រែក្លាយខ្លួនទៅសហគមន៍កសិកម្មទំនើបពេញលក្ខណៈសម្បត្តិតែម្តងក្នុងថ្ងៃណាមួយ»៕