ព័ត៌មានជាតិ

តើឆ្នាំ២០២៤ អាកាសចរណ៍ស៊ីវិលកម្ពុជា សម្រេចបានសមិទ្ធផលធំៗអ្វីខ្លះ?

បានផុស

១ year មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

វិស័យអាកាសចរណ៍ស៊ីវិលរបស់កម្ពុជា បាននិងកំពុងដើរតួនាទីយ៉ាងសំខាន់លើការដឹកជញ្ជូនអ្នកដំណើរ និងទំនិញទាំងតាមផ្លូវអាកាសជាតិ និងអន្តរជាតិ ជាក់ស្តែងរយៈពេល ១ឆ្នាំ នៃឆ្នាំ២០២៤ អាកាសចរណ៍ស៊ីវិលកម្ពុជា សម្រេចបានសមិទ្ធផល និងវឌ្ឍនភាពធំៗ ចំនួន ៦ លើវិស័យដឹកជញ្ជូនតាមផ្លូវអាកាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក ស៊ិន ចាន់សិរីវុត្ថា រដ្ឋលេខាធិការនៃលេខាធិការដ្ឋានអាកាសចរណ៍ស៊ីវិលកម្ពុជាបានថ្លែងមកកាន់កម្ពុជាថ្មីថា វិស័យអាកាសចរណ៍ស៊ីវិលកម្ពុជា កំពុងដើរតួនាទីសំខាន់លើការដឹកជញ្ជូនអ្នកដំណើរ និងទំនិញ ដើម្បីបម្រើដល់វិស័យទេសចរណ៍ ពាណិជ្ជកម្ម វិនិយោគ ការភ្ជាប់រវាងប្រជាជន និងប្រជាជន ប្រទេស និងប្រទេស និងការផ្លាស់ប្តូរវប្បធម៌ជាដើម។

សមិទ្ធផល និងវឌ្ឍនភាពធំៗ ដែលអាកាសចរណ៍ស៊ីវិល សម្រេចបានទាំង ៦ រួមមាន៖

អាកាសយានដ្ឋានអន្តរជាតិទាំង ៣ ភ្នំពេញ សៀមរាប និងព្រះសីហនុ បានតភ្ជាប់ជើង ហោះហើរអន្តរជាតិទៅកាន់ ១២ ប្រទេស ព្រមទាំងតំបន់រដ្ឋបាលពិសេសហុងកុង និងកោះតៃវ៉ាន់ផងដែរ ដោយគិតជាសរុបបានភ្ជាប់ការហោះហើរទៅកាន់គោលដៅ ឬរាជធានី/ទីក្រុងចំនួន ៣៤ នៅក្នុងតំបន់ និងសកលលោក និងមានក្រុមហ៊ុន អាកាសចរណ៍ជាតិ និងអន្តរជាតិសរុបចំនួន ៣១ ក្រុមហ៊ុន។

ជើងហោះហើរអន្តរជាតិ ត្រូវបានពង្រឹង និងពង្រីក ដោយទទួលបានលទ្ធផលយ៉ាងល្អប្រសើរ លើការតភ្ជាប់ជើងហោះហើរជាប្រវត្តិសាស្ត្រ រវាងរាជធានីភ្នំពេញ និងរដ្ឋធានីញូវដែលី ប្រទេសឥណ្ឌា និងការចាប់ផ្តើមហោះហើរឡើងវិញរបស់ក្រុមហ៊ុន អាកាសចរណ៍អេមីរ៉ាត និងកាតា ដែលផ្សារភ្ជាប់ជើងហោះហើរ រវាងរាជធានីភ្នំពេញ និងទីក្រុងឌូបៃ និងទីក្រុងដូហា។
អ្នកដំណើរតាមផ្លូវអាកាស៖ មានអ្នកធ្វើដំណើរសរុបចំនួន ៦,២៤ លាននាក់ ដែល មានកំណើនប្រមាណ ២២% បើប្រៀបធៀបទៅនឹងរយៈពេលដូចគ្នានៅក្នុងឆ្នាំ ២០២៣ ដែលមានចំនួនអ្នកដំណើរសរុបចំនួន ៥,១១ លាននាក់។
ដឹកជញ្ជូនទំនិញតាមផ្លូវអាកាស៖ មានចំនួន ៧៧,៨ ពាន់តោន ដែលមានកំណើន វិជ្ជមានប្រមាណ ៤០% បើប្រៀបធៀបទៅនឹងរយៈពេលដូចគ្នា នៅក្នុងឆ្នាំ២០២៣ ដែលការដឹកជញ្ជូនទំនិញតាមផ្លូវអាកាសមានចំនួន ៥៥,៧ ពាន់តោន។

ជើងហោះហើរ៖ មានជើងហោះហើរសរុបចំនួន ៥៨ ៣៥៤ ជើង ដែលមានកំណើន ១៤% បើប្រៀបធៀបទៅនឹងរយៈពេលដូចគ្នានៅក្នុងឆ្នាំ២០២៣ ដែលទទួលបាន ជើងហោះហើរសរុបចំនួន ៥១ ១៤៩ ជើង។
ជើងហោះហើររំលង៖ មានសរុបចំនួន ៧១ ៦១៣ ជើង ដែលមានកំណើន ១៤% បើប្រៀបធៀបទៅនឹងរយៈពេលដូចគ្នានៅក្នុងឆ្នាំ២០២៣ ដែលទទួលបានជើង ហោះហើរសរុបចំនួន ៦៣ ០៨៧ ជើង៕