Boeing បញ្ជាក់ថា ចិនបដិសេធមិនទទួលយន្តហោះផលិតរួច ដោយសារពន្ធ

ក្រុមហ៊ុនផលិតយន្តហោះ Boeing បាន​បញ្ជាក់កាលពីម្សិលមិញថា អតិថិជននៅក្នុងប្រទេសចិនបាន​បដិសេធមិនទទួលយន្តហោះផលិតរួចដែលខ្លួនបាន​បញ្ជាទិញ ដោយសារតែ​ការដំឡើងពន្ធ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ខណៈដែល​យន្តហោះទី៣របស់ Boeing ​ត្រូវបញ្ជូនទៅសហរដ្ឋអាមេរិកវិញ​នាថ្ងៃព្រហស្បតិ៍នេះ នាយកប្រតិបត្តិក្រុមហ៊ុន លោក​ Kelly Ortberg បាននិយាយកាលពីថ្ងៃពុធ អំឡុងពេលប្រកាសប្រាក់ចំណូលប្រចាំត្រីមាសទី១ថា៖ «ដោយសារតែពន្ធ​គយ អតិថិជនរបស់យើងជាច្រើននៅក្នុងប្រទេសចិន បានបដិសេធមិនទទួល​យក​យន្តហោះដែលត្រូវបានបញ្ជូនទៅនោះទេ»។

លោក Ortberg បាននិយាយថា ​ចិនគឺជាប្រទេសតែមួយគត់ដែលក្រុមហ៊ុន Boeing កំពុងប្រឈមមុខជាមួយ​នឹងបញ្ហានេះ ហើយក្រុមហ៊ុន​​នឹង​បង្ហែរយន្តហោះថ្មីៗទាំងនោះ ទៅឱ្យ​​អតិថិជននៃប្រទេសផ្សេងៗទៀតដែលចង់បាន​​ ដោយសារតែកង្វះខាតជាសកលនៃយន្តហោះពាណិជ្ជកម្មថ្មីៗ។

គួរគូស​បញ្ជាក់ថា មុនប្រធានាធិបតីអាមេរិក ដូណាល់ ត្រាំ បំផ្ទុះសង្រ្គាម​ពាណិជ្ជកម្ម ​យន្តហោះពាណិជ្ជកម្ម​ត្រូវបានជួញដូរទូទាំងពិភពលោក ដោយមិនបង់ពន្ធនោះទេ ក្រោមកិច្ចព្រមព្រៀងអាកាសចរណ៍ស៊ីវិលឆ្នាំ ១៩៧៩។

ប៉ុន្តែបច្ចុប្បន្ន ក្រុមហ៊ុនអាកាសចរណ៍ចិនដែលបញ្ជាទិញ​យន្តហោះ Boeing ឥឡូវនេះ អាចរងផលប៉ះពាល់យ៉ាងខ្លាំងដោយពន្ធសងសឹក ១២៥ ភាគរយ​ ដែល​ចិនដាក់លើ​ទំនិញនាំចូលពី​អាមេរិក។ យន្តហោះ 737 MAX ថ្មី មានតម្លៃទីផ្សារប្រហែល ៥៥ លានដុល្លារ នេះបើយោងតាមក្រុមហ៊ុនប្រឹក្សាអាកាសចរណ៍ IBA ។ ពន្ធ ១២៥ ភាគរយ មាន​ន័យថា តម្លៃយន្តហោះនឹង​កើនលើសនោះខ្ពស់ជាងទ្វេដង។

ក្រោមការបដិសេធរបស់អតិថិជនចិន មកទល់ពេល​នេះ ក្រុមហ៊ុន Boeing បាន​បង្ហែរយន្តហោះផលិតរួចម៉ូឌែល 737 MAX 8 ចំនួន ៣ គ្រឿង ត្រឡប់ទៅសហរដ្ឋអាមេរិក​វិញ​ហើយ។​

ភាគីចិន​ ក៏ដូចជារដ្ឋាភិបាល​ចិន​ មិនទាន់បាន​បកស្រាយយ៉ាងណាទេ ចំពោះការបដិសេធមិនទទួល​យន្តហោះទាំងនោះ។

បើតាម​ប្រធានផ្នែកហិរញ្ញវត្ថុរបស់ក្រុមហ៊ុន Boeing លោក Brian West ​ប្រទេសចិន​រួមចំណែកប្រហែល ១០ ភាគរយ​ ​នៃការ​បញ្ជាទិញយន្តហោះពាណិជ្ជកម្មរបស់ក្រុមហ៊ុន​។ ​លោកបន្ថែមថា ដើមឡើយ ក្រុមហ៊ុន Boeing គ្រោង​ផ្គត់ផ្គង់យន្តហោះថ្មីប្រហែល ៥០ គ្រឿងទៅកាន់ប្រទេសចិនក្នុងឆ្នាំនេះ ហើយឥឡូវនេះកំពុង​វាយតម្លៃជម្រើសសម្រាប់ការធ្វើទីផ្សារឡើងវិញនូវយន្តហោះចំនួន​ ៤១ គ្រឿង ដែលបាន​ផលិតរួចហើយ ឬកំពុងដំណើរការផលិត៕

​