ព័ត៌មានជាតិ

Air Cambodia នឹងបើកជើងហោះហើរទៅកាន់ជប៉ុននាខែតុលាខាងមុខនេះ

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

ក្រុមហ៊ុនអាកាសចរណ៍ជាតិកម្ពុជា (Air Cambodia/ K6) នឹងចាប់ផ្តើមធ្វើការហោះហើរទៅកាន់ប្រទេសជប៉ុនក្នុងខែតុលា ក្រោយពីអាជ្ញាធរនៃប្រទេសទាំងពីរបានផ្តល់ការអនុញ្ញាត ដើម្បីឆ្លើយតបទៅនឹងកំណើននៃតម្រូវការរបស់ភ្ញៀវទេចរ និងវិនិយោគមកកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលបានថ្លែងប្រាប់កម្ពុជាថ្មីថា ស្ថាប័នមានសមត្ថកិច្ចនៃប្រទេសទាំង២ (កម្ពុជា និងជប៉ុន) បានឯកភាព និងអនុម័តលើការស្នើសុំរបស់ក្រុមហ៊ុនអាកាសចរណ៍ជាតិកម្ពុជា (Air Cambodia/ K6) សម្រាប់ប្រតិបត្តិការអាជីវកម្មដឹកជញ្ជូនតាមផ្លូវអាកាសទៅកាន់ប្រទេសជប៉ុន កាលពីថ្ងៃទី៤ ខែមេសា ឆ្នាំ២០២៥ កន្លងមកនេះ។

លោកថា ក្រុមហ៊ុនអាកាសចរណ៍ជាតិកម្ពុជា (Air Cambodia/ K6) នឹងចាប់ផ្តើមប្រតិបត្តិការហោះហើរដឹកអ្នកដំណើរក្នុងពេលឆាប់ៗនេះ (ឆ្នាំ២០២៥) រវាង ភ្នំពេញ-កាន់សៃ (អូសាកា-ប្រទេសជប៉ុន) ដោយឆ្លងកាត់ក្រុង ហ្វូចូវ (Fuzhou) នៃប្រទេសចិន (ភ្នំពេញ/PNH – ហ្វូចូវ/FOC – កាន់សៃ/KIX)។ ប្រតិបត្តិការនោះនឹងមានចំនួន៤ជើង/ក្នុងមួយសប្តាហ៍ ពោលគឺ ថ្ងៃចន្ទ ពុធ សុក្រ និងអាទិត្យ ដោយប្រើប្រាស់យន្តហោះប្រភេទ Airbus A321។

អ្នកនាំពាក្យរូបនេះបានថ្លែងបន្តទៀតថា៖«បច្ចុប្បន្នក្រុមហ៊ុនអាកាសចរណ៍ជាតិកម្ពុជា កំពុងបន្តសហការយ៉ាងជិតស្និទ្ធជាមួយប្រតិបត្តិករអាកាសយានដ្ឋានពាក់ព័ន្ធ ដើម្បីសម្រួលដល់ការផ្តល់សេវាកម្មចុះចតនៅតាមអាកាសយានដ្ឋានទាំងនោះ។ បើគ្មានអ្វីប្រែប្រួលនៅះទេ ក្រុមហ៊ុនអាកាសចរណ៍ជាតិកម្ពុជា អាចនឹងចាប់ផ្តើមដំណើរការប្រតិបត្តិការហោះដឹកជញ្ជូនអ្នកដំណើររបស់ខ្លួននៅអំឡុងខែតុលា ឆ្នាំ២០២៥ខាងមុខនេះ»។

យោងតាមអាកាសចរណ៍ស៊ីវិល នៅក្នុងត្រីមាសទី១ ឆ្នាំ ២០២៥ អាកាសយានដ្ឋានអន្តរជាតិទាំង ៣ របស់កម្ពុជា ទទួលបានជើងហោះហើរចំនួន ១៧ ៤៣៤ ជើង កើន ១៩ ភាគរយ ក្នុងនោះអ្នកដំណើរចំនួន ១ ៩៦០ ៦៣៥ នាក់ កើន ១៩ ភាគរយ និងទំនិញចេញ-ចូលជិត ២ ម៉ឺនតោន ១០ ភាគរយ ធៀបនឹងរយៈពេលដូចគ្នាលកាលពីឆ្នាំមុន។

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលប្រាប់កម្ពុជាថ្មីនៅថ្ងៃទី ២៥ ខែមេសា ឆ្នាំ ២០២៥ថា វិស័យដឹកជញ្ជូនតាមផ្លូវអាកាស ទើបតែងើបឡើងវិញជាលំដាប់បានប្រមាណ ៦៨ ភាគរយ ធៀបនឹងស្ថានភាពមុនវិបត្តិជំងឺកូវីដ១៩៕