អូស្ត្រាលី និងជប៉ុន ចាប់ដៃគ្នាជម្រុញការនាំចេញគ្រាប់ស្វាយចន្ទីកម្ពុជាទៅកាន់ទីផ្សារអន្តរជាតិ

ស្ថានទូតអូស្ត្រាលី និងជប៉ុនប្រចាំនៅប្រទេសកម្ពុជាបានសហការគ្នាដើម្បី​ពង្រឹងវិស័យស្វាយចន្ទីរបស់កម្ពុជា តាមរយៈការគាំទ្រដែលបំពេញឲ្យគ្នាទៅវិញទៅមក ដែលអាចជួយបង្កើនសមត្ថភាពកែច្នៃ និងទទួលបានគ្រាប់ស្វាយចន្ទីកម្ពុជាដែលកាន់តែមានរសជាតិឆ្ងាញ់ និងគុណភាពខ្ពស់នាំចេញទៅកាន់ទីផ្សារពិភពលោកកាន់តែច្រើន។

យោងតាមស្ថានទូតអូស្រ្តាលីប្រចាំនៅប្រទេសកម្ពុជា បានលើកឡើងថា គ្រាប់ស្វាយចន្ទីប្រមាណ ៥ ភាគរយប៉ុណ្ណោះនៃគ្រាប់ស្វាយចន្ទីចំនួន ៨៤០ ពាន់តោន ដែលបានដាំដុះនៅក្នុងប្រទេសកម្ពុជា ដែលត្រូវបានកែច្នៃនៅក្នុងប្រទេស។

«ប្រសិនបើកម្ពុជាអាចបង្កើនការកែច្នៃក្នុងប្រទេសបាន កម្ពុជាអាចទទួលបានតម្លៃបន្ថែម បង្កើតការងារ និងបង្កើនប្រាក់ចំណូលកាន់តែច្រើន»។ នេះបើយោងតាមស្ថានទូតអូស្ត្រាលី។

ដោយមានការគាំទ្រពីរដ្ឋាភិបាលទាំងពីរ ក្រុមហ៊ុនកែច្នៃគ្រាប់ស្វាយចន្ទី MIRARTH Agri Tech ដែលមានទីតាំងស្ថិតក្នុងខេត្តកំពង់ធំ កំពុងរួមចំណែកជំរុញការកែច្នៃនៅក្នុងប្រទេស បង្កើនវត្តមានគ្រាប់ស្វាយចន្ទីរបស់កម្ពុជាទៅកាន់ទីផ្សារពិភពលោក និងធានាឱ្យកសិករខ្នាតតូចដែលដាំគ្រាប់ស្វាយចន្ទីទាំងនេះទទួលបានតម្លៃសមរម្យ និងមានស្ថិរភាព។

បើតាមស្ថានទូតដដែល ការគាំទ្ររបស់ជប៉ុនបានជួយ ក្រុមហ៊ុនMIRARTH ពង្រឹងខ្សែសង្វាក់ផ្គត់ផ្គង់ និងធ្វើការសិក្សាអំពីលទ្ធភាពកែច្នៃគ្រាប់ស្វាយចន្ទី និងការកាត់បន្ថយកាកសំណល់។ ចំណែកឯប្រទេសអូស្ត្រាលីវិញ បានជួយ MIRARTH បង្កើនការត្រៀមខ្លួននាំចេញរបស់ខ្លួន ដោយផ្តល់ជំនួយតាមរយៈការបណ្តុះបណ្តាល ការផ្គូរផ្គងអាជីវកម្ម និងការចូលរួមក្នុងសន្និសីទគ្រាប់ស្វាយចន្ទីពិភពលោកឆ្នាំ ២០២៥ ដែលបាននាំអោយមានកិច្ចព្រមព្រៀងដំបូងជាមួយក្រុមហ៊ុនមួយចំនួន។

«ក្រុមហ៊ុន MIRARTH គ្រោងនឹងកែច្នៃគ្រាប់ស្វាយចន្ទីចំនួន ៣០០០ តោនក្នុងឆ្នាំ ២០២៥ និងឆ្ពោះទៅរកគោលដៅគ្មានកាកសំណល់។​កិច្ចសហការរវាងអូស្ត្រាលី និងជប៉ុននេះ ឆ្លុះបញ្ចាំងពីការប្តេជ្ញាចិត្តរួមគ្នារវាងប្រទេសយើងទាំងពីរក្នុងការជំរុញវិស័យដែលមានសក្តានុពលខ្ពស់នៅកម្ពុជា ដើម្បីបង្កើនផលិតភាពនៃផលិតកម្ម ការងារ និងជីវភាពរស់នៅ ព្រមទាំងជំរុញកំណើនសេដ្ឋកិច្ចប្រកបដោយចីរភាព»។ នេះបើយោងតាមស្ថានទូតអូស្រ្តាលី។

កម្ពុជាផលិតគ្រាប់ស្វាយចន្ទីបានចំនួន ៨៥ ម៉ឺនតោន (៨៥០ ០០០) កើនឡើង២៦.៨% ក្នុង​នោះ​នាំចេញទៅក្រៅប្រទេសចំនួនជាង ៨១ ម៉ឺនតោន គិតជាទឹកប្រាក់ ១,១៥០ ពាន់លានដុល្លារ កើនឡើង៣១% ធៀបនឹងឆ្នាំ ២០២៣​ ដែលមានទឹកប្រាក់ត្រឹមតែ ៨៣៧ លានដុល្លារ។ នេះបើយោងតាមរបាយការណ៍​របស់ស​មាគម​ស្វាយ​ចន្ទី​កម្ពុជាចេញផ្សាយនៅថ្ងៃទី ២៧ ខែធ្នូ ឆ្នាំ ២០២៤​​។

លោក អួន ស៊ីឡុត ប្រធានសមាគមស្វាយចន្ទីកម្ពុជាប្រាប់កម្ពុជាថ្មីនៅថ្ងៃទី ២៧ ខែធ្នូ ឆ្នាំ ២០២៤ នេះថា កត្តាដែលនាំ​​ឱ្យការនាំ​ចេញស្វាយចន្ទីកើនឡើង​ ដោយសារសមាគម​បាន​អំពាវនាវ​​ឱ្យសមាជិក​សមាគមស្វាយ​ចន្ទីកម្ពុជាទូទាំងប្រទេសហាលគ្រាប់ទុក​ក្នុងពេលដែល​តម្លៃធ្លាក់ចុះកាលពីដើមឆ្នាំនេះ និងចំពេលដែល​មានបាតុ​ភូតអេលនីណូ (El Nino)។

លោក អួន ស៊ីឡុត ​បានឱ្យដឹងថា៖ «សមាគមបាន​អំពាវនាវឱ្យសមាជិកហាលគ្រាប់ទុកក្នុង​អំឡុង​​ពេលតម្លៃចន្ទីធ្លាក់​ចុះកាលពីដើមឆ្នាំ បានធ្វើឱ្យតម្លៃគ្រាប់ស្វាយចន្ទីងើបឡើងវិញនៅពាក់​កណ្ដាល​ខែមីនា រហូតដល់ខែមេសា ដែលមានតម្លៃ ៥ ៤០០ រៀល ក្នុងមួយគីឡូក្រាម និងកើនឡើង​ទៀតនៅខែបន្ទាប់។ ម្យ៉ាងទៀត នៅអាហ្វ្រិកទិន្នផល​ស្វាយចន្ទីបានធ្លាក់ចុះប្រមាណ ៥០% ដោយសារបាតុភូត​អេលនីណូ (El Nino)»។

សម្រាប់រដូវកាលថ្មី ឆ្នាំ ២០២៥ ស្វាយចន្ទីកំពុងចេញផ្កា ខណៈលោក អួន ស៊ីឡុត បញ្ជាក់ថា បច្ចុប្បន្នរដូវចុះត្រជាក់ អាចនឹងប៉ះពាលដល់ទិន្នផលប្រមាណ ១០% ទៅ ២០% ប្រសិនបើ​កសិករ​មិនរកវិធីទប់ស្កាត់ទាន់ពេលវេលា ខណៈសមាគមក៏កំពុងរកវិធីទប់ទល់ការចុះត្រជាក់នេះដែរ។

យោងតាមក្រសួងកសិកម្ម កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕