ប្រតិបត្តិករទេសចរណ៍ថៃ ​ទទូចឱ្យបញ្ចៀសរដ្ឋប្រហារ ខ្លាចប៉ះពាល់វិស័យទេសចរណ៍

ប្រតិបត្តិករទេសចរណ៍ថៃ បាន​ទទូចសុំឱ្យ​មាន​ការ​បញ្ចៀស​រដ្ឋប្រហារទម្លាក់រដ្ឋាភិបាលដឹកនាំដោយ​លោក​ស្រីនាយករដ្ឋមន្រ្តី ផែថងថាន ស៊ីណាវ៉ាត្រ គ្រប់លទ្ធភាព​ទាំងអស់ ចំពេលថៃប្រឈមមុខនឹងអស្ថិរភាពនយោបាយធ្ងន់ធ្ងរ។

តាមការចុះផ្សាយរបស់កាសែតបាងកកប៉ុស្តិ៍​នៅព្រឹកថ្ងៃសុក្រនេះ​ ក្រុមប្រឹក្សាទេសចរណ៍ថៃ (TCT) បាននិយាយថា ឧស្សាហកម្មទេសចរណ៍ថៃ បាន​រងបញ្ហា​ពីខាងក្រៅរួចហើយ រួមទាំងសេដ្ឋកិច្ច និង​ភូមិសាស្ត្រនយោបាយ។

ការទទូចនេះធ្វើឡើងខណៈថៃប្រឈមមុខនឹង​អស្ថិរភាពនយោបាយធ្ងន់ធ្ងរ ដោយ​បង្កការភ័យខ្លាចថា ការធ្វើរដ្ឋប្រហារយោធាទម្លាក់លោកស្រី ផែថងថាន ចេញពីតំណែងអាចកើតឡើង ខណៈភាគីជាច្រើនទាមទារ​ឱ្យ​លោកស្រីចុះចេញ និងរំលាយសភា ដែលស្ថានការណ៍កាន់តែអាក្រក់ខ្លាំងក្រោយ​បែកធ្លាយសារសម្លេងសន្ទនារវាងលោកស្រី ផែថងថាន និងសម្ដេច ហ៊ុន សែន ប្រធានព្រឹទ្ធសភាកម្ពុជា ជុំវិញភាព​តានតឹងព្រំដែនកម្ពុជា-ថៃ។

អនុប្រធាន TCT លោក Ratchaporn Poolsawadee បាននិយាយថា៖ «ភាពចលាចលនយោបាយគួរ​តែ​ត្រូវបានដោះស្រាយដោយយន្តការប្រជាធិបតេយ្យ មិនមែនជារដ្ឋប្រហារដូចដែលបានកើតឡើងក្នុងឆ្នាំ ២០១៤ ទេ»។ លោក​បន្តថា ​ក្នុងអំឡុងពេលនោះ ចំនួននៃការមកដល់របស់ជនបរទេសបានធ្លាក់ចុះយ៉ាងខ្លាំង ដែលភាគច្រើនបណ្តាលមកពីកង្វះទំនុកចិត្តក្នុងការធ្វើដំណើរ។

ចំពេលមានភាពចលាចលនយោបាយដែលកំពុងបន្ត លោក Ratchaporn បាននិយាយថា ទំនុកចិត្តទេសចរណ៍គួរតែត្រូវបាន​ធានា ដោយសារតែឧស្សាហកម្មគ្មានផ្សែងរបស់ថៃមួយ​នេះ រងនូវបញ្ហា​ជាច្រើនរួចហើយតាំងពីដើមឆ្នាំ ដែលធ្វើឱ្យ​ភ្ញៀវអន្តរជាតិធ្លាក់ចុះ។

បញ្ហា​ទាំងនោះរួមមាន​ទាំងកង្វល់សុវត្ថិភាពពីភ្ញៀវចិន ការដំឡើងពន្ធគយរបស់សហរដ្ឋអាមេរិក គ្រោះរញ្ជួយដី និងចុងក្រោយបំផុតនេះ គឺជម្លោះ​អ៊ីរ៉ង់-អ៊ីស្រាអែល ចំពេលដែលការប្រកួតប្រជែងលើទិសដៅទេសចរណ៍ពីប្រទេសដទៃបន្ថែមសម្ពាធ៕