សហគមន៍កសិកម្មទំនើបស្វាយចន្ទីខ្នាតធំមួយទៀត បង្កើតឡើងនៅខេត្តសៀមរាប

ខេត្តសៀមរាបនឹងមានសហគមន៍កសិកម្មទំនើបខ្នាតធំមួយទៀតសម្រាប់ដំណាំស្វាយចន្ទី ដែលមានសមាជិកមកពីស្រុកចំនួន៤ ជាមួយនឹងផ្ទៃដីដាំដុះប្រមាណ២៥០០ហិកតា ដែល​នឹងក្លាយទៅជាសហគមន៍កសិកម្មទំនើបស្វាយចន្ទីធំជាងគេនៅកម្ពុជា។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា បើមិនមានអ្វីប្រែប្រួលទេ ខេត្តសៀមរាបនឹងមានសហគមន៍កសិកម្មទំនើបរហូត​ដល់ទៅ៥​សហគមន៍ ​នៅមុនដំណាច់ឆ្នាំ២០២៥នេះ។

គិតមកដល់ពេលនេះ មានសហគមន៍កសិកម្មទំនើបចំនួន ១៣ ដែលត្រូវបានបង្កើតជាផ្លូវការ ហើយ​សហគមន៍ចំនួន ៥ ទៀត កំពុងស្ថិតនៅក្នុងដំណើរការនៃការបង្កើត​ជាសហគមន៍​កសិកម្ម​ទំនើប។

រាជរដ្ឋាភិបាលកម្ពុជាបានសម្រេចត្រៀមកញ្ចប់ថវិកាប្រមាណ ៥០ លានដុល្លារ បន្ថែមទៀត ដើម្បី​​គាំទ្រដល់ការផ្ដល់កម្ចីអត្រាការប្រាក់ទាបដល់សហគមន៍កសិកម្មទំនើប នៅក្នុង​រយៈ​ពេល ៣ ឆ្នាំ (២០២៥-២០២៧) ដែលជាយន្តការមួយក្នុងការពង្រឹងគុណ​ភាពកសិកម្ម និង​ទី​ផ្សារ​៕