អាមេរិក ប្រាប់ឲ្យឈប់ប្រើសឺរ៉ាំងចាក់វ៉ាក់សាំងកូវីដ របស់ក្រុមហ៊ុនចិន

រដ្ឋបាលចំណីអាហារនិងឪសថអាមេរិក (FDA) កាលពីថ្ងៃព្រហស្បតិ៍ បានស្នើសុំឲ្យអ្នកផ្តល់សេវាសុខាភិបាល បញ្ឈប់ការប្រើប្រាស់សឺរ៉ាំងនិងម្ជុល ដែលផលិតដោយក្រុមហ៊ុនផលិតឧបករណ៍វេជ្ជសាស្រ្តចិន Guangdong Haiou Medical Apparatus Co (HAIOU)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឱសថការីម្នាក់បានប្រាប់ Reuters ថា សឺរ៉ាំងត្រូវបានដឹកជញ្ជូន សម្រាប់ប្រើជាមួយវ៉ាក់សាំងការពារជំងឺកូវីដ-១៩របស់ក្រុមហ៊ន Pfizer Inc/BioNTech SE។

អ្នកនាំពាក្យ FDA បាននិយាយថា ឧបករណ៍ទាំងនេះ ត្រូវបានផ្គត់ផ្គង់សម្រាប់កម្មវិធីចាក់វ៉ាក់សាំងការពារជំងឺកូវីដ-១៩ ត្រឹមថ្ងៃទី២២ខែមីនា។ ទីភ្នាក់ងារនេះមិនជឿថា ការបញ្ឈប់ប្រើប្រាស់សឺរ៉ាំងទាំងនេះ នឹងបណ្តាលឲ្យមានការពន្យារពេលចាក់វ៉ាក់សាំងនោះទេ។

FDA និយាយថា ខ្លួនបានទទួលព័ត៌មានអំពីបញ្ហាគុណភាព ដូចជាម្ជុលរបស់ក្រុមហ៊ុន HAIOU ដាច់ចេញពីសឺរ៉ាំងនិងជាប់នឹងដៃរបស់អ្នកជំងឺបន្ទាប់ពីចាក់ថ្នាំរួច និងឧប្បត្តិហេតុមួយចំនួនដែលពាក់ព័ន្ធនឹងការមុតម្ជុលលើដៃអ្នកផ្តល់សេវាថែទាំសុខភាព។

លោកស្រី Erin Fox នាយកជាន់ខ្ពស់ផ្នែកព័ត៌មានថ្នាំពេទ្យ នៅសកលវិទ្យាល័យ Utah Health បាននិយាយថា កាលពីពេលថ្មីៗនេះ ខ្លួនបានទទួលសឺរ៉ាំងជាមួយវ៉ាក់សាំង Pfizer / BioNTech ជាផ្នែកមួយនៃគ្រឿងផ្គត់ផ្គង់ដែលត្រូវបានដឹកជញ្ជូនដោយក្រុមហ៊ុន McKesson Corp (MCK.N)។ លោកស្រីនិយាយថា ពួកគេបានប្រើសឺរ៉ាំងទាំងនោះនៅក្នុងខែមីនា ប៉ុន្តែមិនបានប្រើមួយរយៈមកហើយ ហើយបច្ចុប្បន្នលែងប្រើតែម្តង។

FDA បានចេញសេចក្តីជូនដំណឹងអំពីការនាំចូល កាលពីថ្ងៃទី៣០ខែមេសាដើម្បីការពារកុំឲ្យសឺរ៉ាំងនិងម្ជុលចូល សហរដ្ឋអាមេរិកទៀត៕

ប្រែសម្រួល៖ Vann Vann

ប្រភព៖ Tuoi Tre 

ចុចអាន៖ ជប៉ុន ត្រៀមប្រើប្រាស់វ៉ាក់សាំង AstraZeneca ហើយនឹងចេញថ្លៃព្យាបាល បើមានករណីដុំកំណកឈាមលើអ្នកចាក់