ខេត្តព្រះវិហារត្រៀមផ្ទៃដី២៣ ហិកតាសម្រាប់ធ្វើទីតាំងបូជា សពអ្នកស្លាប់ដោយសារជំងឺ កូវីដ១៩

អាជ្ញាធរខេត្តព្រះវិហារបានត្រៀមផ្ទៃដីសរុបប្រមាណ ២៣ហិចតា ដែលមានទីតាំងស្ថិតនៅភូមិថ្នល់បែកឃុំថ្មី ស្រុកគូលែន ខេត្តព្រះវិហារ សម្រាប់ធ្វើទីតាំងបូជាសពអ្នកដែលោទទួលមរណ:ភាពដោយសារជំងឺកូវីដ ១៩។

លោក ប្រាក់ សុវណ្ណ អភិបាល នៃគណ:អភិបាលខេត្តព្រះវិហារដែលបានចុះត្រួតពិនិត្យទីតាំងត្រៀមរៀបចំកន្លែងបូជា​សពបានឱ្យដឹងថាការត្រៀមរៀបចំកន្លែងបូជាសពដែលទទួលមរណ:ភាពដោយសារជំងឺកូវីដ ១៩នេះបន្ទាប់ពីខេត្តមានអ្នកឆ្លងជំងឺនេះជាបន្តបន្ទាប់។

លោកអភិបាលខេត្តបានបន្តថាទីតាំងបូជាសពដែលស្ថិតនៅភូមិថ្នល់បែក ឃុំថ្មី ស្រុកគូលែន ខេត្តព្រះវិហារនេះស្ថិតនៅឆ្ងាយពីភូមិអ្នកស្រុកងាយស្រួលក្នុងការយកសពអ្នកស្លាប់ដោយសារជំងឺកូវីដ១៩ទៅបូជាព្រោះវាមិនធ្វើឱ្យប៉ះពាល់ដល់ប្រជាពលរដ្ឋឡើយ។

លោកអភិបាលខេត្តបានបន្តទៀតថា ការត្រៀមរៀបចំកន្លែងបូជាសពសម្រាប់អ្នកដែលទទួលមរណ:ភាពដោយសារជំងឺកូវីដ ១៩ មានផ្ទៃដីសរុបប្រមាណ ២៣ហិតា នេះក្នុងនោះយើងក៏បានរៀបចំកន្លែងត្រៀមបូជាសពទំហំ ៥ម៉ែត្រx ៧ម៉ែត្រដែលចំណាយថវិកាអស់ប្រហែល ៣,០០០ ដុល្លារអាមេរិកផងដែរ។

សម្តេចតេជោហ៊ុន សែន នាយករដ្ឋមន្ត្រីកម្ពុជា បានណែនាំដល់គណកម្មការ និងអនុគណកម្មការប្រយុទ្ធប្រឆាំងជំងឺកូវីដ ត្រូវយកចិត្តទុកដាក់រៀបចំទីបច្ឆាបូជាសពនិងទីកន្លែងសម្រាប់កប់សពអ្នកស្លាប់ដោយជំងឺកូវីដ១៩ ឲ្យបានសមរម្យ ខណៈ ចំនួនអ្នកស្លាប់ដោយសារកូវីដ១៩មានការកើនឡើងពីមួយថ្ងៃទីមួយថ្ងៃ។

ជាមួយគ្នានេះដែរ សម្តេចក៍បានណែនាំដល់រដ្ឋបាលខេត្តដែលមានជនជាតិរស់នៅត្រូវរកដីរដ្ឋដើម្បីត្រៀមបម្រុងធ្វើជាទីកន្លែងកប់សពជនជាតិដែលស្លាប់ដោយកូវីដឲ្យបានសមស្របទៅតាមទំនៀមទំលាប់ប្រពៃណីរបស់ជនជាតិផងដែរ។

គួរបញ្ជាក់ថាគិតត្រឹមថ្ងៃទី០១ខែកក្កដសឆ្នាំ២០២១ខេត្តព្រះវិហារមានអ្នកឆ្លងជំងឺកូវីដ១៩ចំនួន១០៤នាក់ស្រី៣៦នាក់និងកុមារី១៧នាក់ អ្នកជាសះស្បើយចំនួន៤៤នាក់និងកំពុងសម្រាកព្យាបាលនៅមន្ទីរពេទ្យចំនួន៦០នាក់៕

អត្ថបទ៖ សំអឿន