ផ្អើលអ្នកគាំទ្រ! វណ្ណដា ប៉ះគ្នាជាមួយ Spritezakup តារារ៉េបស្រុកថៃ

អ្នកគាំទ្រជាច្រើនកំពុងភ្ងាក់ផ្អើល ក្រោយឃើញតារារ៉េបប្រទេសថៃ Sprite បានបង្ហោះរូបជាមួយវណ្ណដា ប៉ុន្មានម៉ោងមុននេះ សង្ស័យថាពួកគេនឹងរួមសហការការងារជាមួយគ្នាឆាប់ៗនេះ។

តាមរយៈការបង្ហោះនៅលើប្រព័ន្ធសង្គមអ៊ីនស្តារក្រាមរបស់តារារ៉េបប្រទេសថៃ ដែលកំពុងទទួលបានការគាំទ្រខ្លាំង គឺ Sprite ជាមួយម្ចាស់បទ Bok Kilo វណ្ណដា បានធ្វើឲ្យអ្នកគាំទ្រតារារ៉េបទាំងនេះ មានការភ្ងាក់ផ្អើលជាខ្លាំង ព្រោះថាពួកគេសុទ្ធសឹងតែជាតារាមានវ័យក្មេង ប៉ុន្តែពោលពេញទៅដោយសមត្ថភាពរ៉េបមិនធម្មតាដូចគ្នា។ បើតាមអ៊ីនស្តារក្រាមរបស់ Sprite បានបង្ហោះរូបជាមួយវណ្ណដា ២ សន្លឹក ព្រមទាំងភ្ជាប់ជាមួយឃ្លា Time to rise ដែលធ្វើឲ្យអ្នកគាំទ្រចាប់អារម្មណ៍ខ្លាំងថា តើពួកគេទាំងពីរអ្នកអាចមានអ្វីប្លែកជាមួយគ្នាជូនហ្វេនៗ។ លើសពីនោះទៅទៀត ក្រឡេកទៅមើលStory របស់តារារ៉េបថៃនោះវិញ គឺគេបានឃើញវណ្ណដា កំពុងអង្គុយក្នុងបន្ទប់ថតសំឡេងជាមួយតារារ៉េបថៃម្នាក់ទៀតគឺ F.Hero ដែលអាចបញ្ជាក់បានយ៉ាងច្បាស់ថា ពួកគេនឹងមានការសហការជាមួយគ្នាក្នុងពេលឆាប់ៗនេះ។

តាមរយៈសកម្មភាព និងរូបភាពទាំងអស់នេះ ធ្វើឲ្យអ្នកគាំទ្រវណ្ណដា រួមជាមួយអ្នកគាំទ្រ Sprite បាននិងកំពុងទន្ទឹងរង់ចាំដំណឹងល្អពីតារារ៉េបដ៏ល្បីឈ្មោះទាំងពីរអ្នកនេះ៕

អត្ថបទ៖ ផានិត