ឌឿ វិសាល ត្រៀមចេញMVបទ «មិត្តភាពTYDA» រៀបរាប់ពីមិត្តភាពគ្រូពេទ្យកូវីដ-១៩

តារាចម្រៀង និងជាគ្រូពេទ្យស្ម័គ្រចិត្តប្រយុទ្ធប្រឆាំងជំងឺវីដ-១៩ លោក ឌឿ វិសាល បន្ទាប់ពីចេញបទ «បងស្រី» ដែលច្រៀងរៀបរាប់នូវការដឹងគុណលោកជំទាវ ពេជ្រ ច័ន្ទមុន្នី នឹងទទួលបានការគាំទ្រនោះ ស្រាប់តែមុននេះលោកបានបញ្ចេញបទថ្មីច្រៀងរាប់រាប់ពីមិត្តភាពរបស់ក្រុមគ្រូពេទ្យកូវីដ-១៩។

សម្រាប់បទចម្រៀងថ្មីពីសំណាក់តារាវ័យក្មេងលោក ឌឿ វិសាល នេះ មានចំណងជើងថា «មិត្តភាពTYDA» ខណ:បទនេះក៏ទើបត្រូវបានបង្ហោះផ្សព្វផ្សាយនៅលើបណ្តាញសង្គមយូធូ និងហ្វេសប៊ុកផ្លូវការរបស់លោក ឌឿ វិសាល កាលពីប៉ុន្មានថ្ងៃមុននេះ។ បទ «មិត្តភាពTYDA» បើតាមការបញ្ជាក់ពីលោក ឌឿ វិសាល មកកាន់កម្ពុជាថ្មី គឺនិពន្ធឡើងក្នុងអត្ថន័យច្រៀងរៀបរាប់ពីមិត្តភាពក្រុមគ្រូពេទ្យប្រយុទ្ធប្រឆាំងជំងឺកូវីដ-១៩។

លោក ឌឿ វិសាល បាននិយាយទៀតថា តាមរយ:បទនេះ លោកទើបតែចេញជាAudioដោយរំលេចជាមួយរូបភាពខ្លះៗប៉ុណ្ណោះ ហើយនាពេលឆាប់ៗខាងមុខ លោកនឹងផលិតចេញជាMVតែម្តង ព្រោះថាបទនេះ គឺសរសេររៀបរាប់ពីសកម្មភាពមួយចំនួនរបស់ក្រុមគ្រូពេទ្យប្រយុទ្ធប្រឆាំងជំងឺកូវីដ-១៩។ ម្យ៉ាងទៀតអ្វីដែលធ្វើឲ្យពួកយើងចងចាំនោះ គឺកំឡុងពេលនោះម្នាក់សុទ្ធលះបង់ទាំងពេលវេលា និងកម្លាំងកាយចិត្តដើម្បីជួយសង្គ្រោះអ្នកជំងឺកូវីដ។

ឌឿ វិសាល បន្តថា ដោយឆ្លងកាត់រឿងរ៉ាវមួយចំនួននេះហើយទើបលោកសម្រេចនិពន្ធបទនេះឡើងដែលត្រៀមចេញ​ថតMVនាពេលឆាប់ៗខាងមុខផងដែរ។

សូមបញ្ជាក់ថា លោក ឌឿ វិសាល ហៅធូ ត្រូវបានទស្សនិកជនដឹងថា លោកគឺជាតារាចម្រៀងមួយរូបដែលសុខចិត្តលះបង់ចោលការងារសិល្ប:ដើម្បីចូលរួមបេសកកម្មជាកងទ័ពអាវសជួយដល់ប្រជាពលរដ្ឋក្នុងដំណាក់កាលកូវីដ-១៩។ទង្វើរនេះទទួលបានការគាំទ្រនិងកោតសរសើរច្រើនពីមហាជន៕

អត្ថបទ៖ ចាន់រ៉ា