បាត់មុខយូរឆ្នាំ តារាល្បីឈ្មោះទសវត្សរ៍៨០-៩០ លេចមុខលើទឹកដីប្រទេសកំណើត

អ្នកគាំទ្រនៅកម្ពុជាបានសម្តែងការចាប់អារម្មណ៍ខ្លាំងក្រោយពេលឃើញអតីតតារាសម្តែងស្រីល្បីឈ្មោះរបស់ខ្មែរមួយរូប គឺអ្នកស្រី ចាន់ សេរីរ័ត្ន បង្ហាញវត្តមានមកលេងនៅទឹកដីកំណើតប្រទេសកម្ពុជានាពេលថ្មីៗនេះ។

អ្នកស្រី ចាន់ សេរីរ័ត្ន ត្រូវបានទស្សនិកជនស្គាល់ និងចាំបានថា អ្នកស្រីជាតារាជើងចាស់មួយដួងដែលមានប្រជាប្រិយភាពល្បីល្បាញនាអំឡុងទសវត្សរ៍ឆ្នាំ៨០-៩០។ ប៉ុន្តែបន្ទាប់ពីក្រសោបបានការគាំទ្រមួយសន្ទុះ អ្នកស្រីក៏បាត់វត្តមានពីទីផ្សារសម្តែងដោយគេដឹងថា អ្នកស្រី ចាន់ សេរីរ័ត្ន បានរសាត់ខ្លួនទៅរស់នៅឯក្រៅប្រទេស។

អតីតតារាសម្តែងអ្នកនាង ចាន់ សេរីរ័ត្ន បច្ចុប្បន្នគឺកំពុងប្រើជីវិតរស់នៅយ៉ាងមានសេចក្តីសុខនាទីដីប្រទេសអូស្ត្រាលីខណ:គិតមកទល់ពេលនេះ អ្នកស្រីបានចាកចេញពីវិស័យសិល្បៈខ្មែរប្រមាណជាជិត២០ឆ្នាំមកហើយ។ យ៉ាងណាមិញថ្វីត្បិតអតីតតារាជើងចាស់រួបនេះចេញទៅរស់នៅស្រុកគេយូឆ្នាំហើយក្តី តែអ្នកស្រីនៅតែនឹកអាល័យដល់ប្រទេសកំណើតកម្ពុជាមិនភ្លេចឡើយ។

តួយ៉ាងថ្មីៗនេះ ពោលគឺអំឡុងខែមិថុនាឆ្នាំ២០២២ នេះគេបានប្រទះឃើញអ្នកនាង ចាន់ សេរីរ័ត្ន បានបង្ហាញវត្តមានមកលេងនៅលើទឹកដីស្រុកខ្មែរដែលជាប្រទេសកំណើតខ្លួនយ៉ាងភ្ញាក់ផ្អើល។ ការវិលមកលេងប្រទេសកំណើតលើកនេះដែរ គឺអ្នកនាង ចាន់ សេរីរ័ត្ន មិនត្រឹមតែមកដើរលេងកម្សាន្តនោះទេ តែអ្នកនាងក៏បានជួបជុំញាតិមិត្តធ្វើបុណ្យដោយភាពសប្បាយរីករាយថែមទៀត៕

អត្ថបទ៖ ចាន់រ៉ា