Jimin និង J-Hope បរិច្ចាគប្រាក់ ១០០លានវ៉ុន ជួយកុមាររងគ្រោះនៅតួកគី-ស៊ីរី

យោងតាមការផ្សព្វផ្សាយរបស់អង្គការ UNICEF កូរ៉េខាងត្បូង នៅថ្ងៃទី ១៥ ខែកុម្ភៈ បានឱ្យដឹងថា Jimin និង J-Hope សមាជិកក្រុម BTS បានបរិច្ចាគប្រាក់ផ្ទាល់ខ្លួន ១០០លានវ៉ុន (ប្រហែល ៧៨,៦០០ដុល្លារអាមេរិក) ជួយដល់កុមាររងផលប៉ះពាល់ដោយសារគ្រោះរញ្ជួយដីនៅប្រទេសតួកគី និងស៊ីរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះ​មិន​មែន​ជា​លើក​ទី​មួយ​ទេ​ដែល​សមាជិក​ក្រុម BTS បានធ្វើ​បរិច្ចាគប្រាក់ជួយដល់សង្គម និងសកម្មភាពមនុស្សធម៌នៅទូទាំងពិភពលោក ខណៈកាលពីឆ្នាំ២០១៨កន្លងទៅ J-Hope ធ្លាប់បរិច្ចាគជួយជនរងគ្រោះក្នុងហេតុការណ៍គ្រោះមហន្តរាយនៅក្នុងប្រទេសកូរ៉េខាងត្បូង និងតំបន់ផ្សេងទៀតនៃពិភពលោកផងដែរ។

ចំណែកឯ Jimin វិញក៏មានកំណត់ត្រាជួយដល់ជនក្រីក្រតាមរយៈការបរិច្ចាគមូលនិធិដល់អង្គការក្នុងស្រុក និងអង្គការពិភពលោកមួយចំនួន។

បន្ទាប់ពីចូលរួមបរិច្ចាគទៅដល់ជនរងគ្រោះនៅតួកគី-ស៊ីរី J-Hope បាននិយាយថា “ខ្ញុំសង្ឃឹមថាប្រាក់នេះអាចផ្តល់ជំនួយ និងក្តីសង្ឃឹមដល់កុមារដែលរងគ្រោះដោយសារការរញ្ជួយដី ក្នុងគ្រាអាសន្ននេះ”។ រីឯ Jimin និយាយស្រដៀងគ្នាដែរថា “ខ្ញុំសង្ឃឹមថា ជំនួយរបស់ខ្ញុំនឹងអាចជួយដល់កុមារដែលរងផលប៉ះពាល់ដោយសារគ្រោះរញ្ជួយដី” ។

ក្រោយទទួលបានការបរិច្ចាគ អគ្គលេខាធិការ UNICEF កូរ៉េខាងត្បូង លោក Lee Ki Chul បានថ្លែងអំណរគុណដល់សមាជិក BTS សម្រាប់ជំនួយឧបត្ថម្ភ និងការជួយផ្សព្វផ្សាយក្តីស្រឡាញ់ ក្តីសង្ឃឹម និងឥទ្ធិពលវិជ្ជមានទៅកាន់ពិភពលោក៕

ប្រែសម្រួល៖ សន្យា

ចុចអាន៖ មនុស្សពិសេស ៥រូប មានសំណាង បាន Jennie ធ្វើនំសូកូឡាផ្ទាល់ដៃ ជូនថ្ងៃ Valentine

ចុចអាន៖ Jimin សមាជិកក្រុម BTS ប្រកាសចេញអាល់ប៊ុម ទោលដំបូងនៅខែក្រោយ