Lee Joon-gi ស្ថិតនៅក្រោមការស៊ើបអង្កេត ពាក់ព័ន្ធនឹងការគេចពន្ធ

តារាសម្ដែង Lee Joon-gi បច្ចុប្បន្នកំពុងស្ថិតក្រោមការត្រួតពិនិត្យ បន្ទាប់ពីត្រូវបានស៊ើបអង្កេតដោយសេវាពន្ធជាតិនៃប្រទេសកូរ៉េខាងត្បូង។ យោងតាមរបាយការណ៍ពី TVReport នៅថ្ងៃទី ១៩ ខែមីនា តារាល្បីរូបនេះត្រូវបានតម្រូវឲ្យបង់ពន្ធចំនួន ៩០០ លានវ៉ុន (ប្រហែល ៦២០,០០០ ដុល្លារអាមេរិក) បន្ទាប់ពីការត្រួតពិនិត្យយ៉ាងល្អិតល្អន់លើកំណត់ត្រាហិរញ្ញវត្ថុរបស់គាត់។

ការស៊ើបអង្កេតដែលត្រូវបានរាយការណ៍ថា បានចាប់ផ្តើមជិតពីរឆ្នាំមុន ដោយផ្តោតជាចម្បងលើ JG Entertainment ដែលជាក្រុមហ៊ុន Lee Joon-gi បង្កើតឡើងក្នុងឆ្នាំ ២០១៤។ ទោះបីជាមានកិច្ចសន្យាផ្តាច់មុខជាមួយ Namoo Actors ក៏ដោយ ប៉ុន្តែប្រាក់ចំណូលរបស់តារាសម្តែងពីគម្រោងរបស់គាត់ គឺត្រូវបានបង្កើតឡើងដោយ JG Entertainment ដែលចាត់ថ្នាក់ពួកគេជាប្រាក់ចំណូលសាជីវកម្ម។ ចំណាត់ថ្នាក់នេះបានអនុញ្ញាតឲ្យក្រុមហ៊ុនបង់ពន្ធសាជីវកម្ម ២៤% ជំនួសឲ្យពន្ធលើប្រាក់ចំណូលផ្ទាល់ខ្លួនដែលខ្ពស់ជាង៤៥% ។ អាជ្ញាធរសង្ស័យថា ការរៀបចំហិរញ្ញវត្ថុនេះ ត្រូវបានរៀបចំឡើងដោយចេតនាដើម្បីកាត់បន្ថយបំណុលពន្ធ ដែលជំរុញឲ្យមានការពិនិត្យឡើងវិញយ៉ាងទូលំទូលាយអំពីប្រតិបត្តិការហិរញ្ញវត្ថុរបស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ ជាការឆ្លើយតបទៅនឹងការចោទប្រកាន់ ទីភ្នាក់ងាររបស់តួឯកប្រុសក្នុងរឿង «Moon Lovers: Scarlet Heart Ryeo» បានអះអាងយ៉ាងម៉ឺងម៉ាត់ថា លោកតែងតែប្រកាន់ខ្ជាប់នូវបទប្បញ្ញត្តិពន្ធ ហើយសកម្មភាពហិរញ្ញវត្ថុទាំងអស់ត្រូវបានធ្វើឡើងក្រោមការណែនាំរបស់ទីប្រឹក្សាពន្ធដែលមានជំនាញវិជ្ជាជីវៈ ខណៈពេលដែលទទួលស្គាល់ថា គាត់បានទូទាត់ការបង់ពន្ធត្រឡប់មកវិញពេញលេញរួចហើយ។ ពួកគេក៏បានបង្ហាញផងដែរថាគាត់បានដាក់ពាក្យប្តឹងជាផ្លូវការជំទាស់នឹងសេចក្តីសម្រេចរបស់អាជ្ញាធរពន្ធដោយលើកហេតុផលថា ការសម្រេចចិត្តនេះមិនស្របតាមការអនុវត្តពន្ធស្តង់ដារ។

បន្ថែមលើភាពចម្រូងចម្រាស របាយការណ៍បានលេចចេញទាក់ទងនឹងផ្ទះជួលលំដាប់ខ្ពស់នៅទីក្រុង Cheongna ទីក្រុង Incheon ដែល JG Entertainment ទិញនៅឆ្នាំ ២០២១ ក្នុងតម្លៃ ២.៩៥ ពាន់លានវ៉ុន (ប្រហែល ២.១ លានដុល្លារអាមេរិក)។ ការរំពឹងទុកបានកើតឡើងថា Lee Joon-gi បានប្រើប្រាស់ទ្រព្យសម្បត្តិជាលំនៅដ្ឋានផ្ទាល់ខ្លួនរបស់គាត់ ដោយជំរុញឲ្យមានការត្រួតពិនិត្យបន្ថែមទៀត។

ដ្បិតថាយាងនេះក្ដី អ្នកតំណាងរបស់តារាសម្ដែងប្រុសវ័យ៤២ឆ្នាំ បានបដិសេធយ៉ាងដាច់អហង្ការ ចំពោះការអះអាងទាំងនេះ ដោយបញ្ជាក់ឲ្យច្បាស់ថា ផ្ទះជួលនេះបម្រើជាការិយាល័យកណ្តាលផ្លូវការរបស់ JG Entertainment ។ អាជ្ញាធរ​ពន្ធដារ​បាន​ពិនិត្យ​មើល​បញ្ហា​នេះ​តាំងពី​ពេល​នោះ​មក ហើយ​រក​មិន​ឃើញ​មាន​ការ​បំពាន​ផ្លូវ​ច្បាប់​ទាក់ទង​នឹង​អចលនទ្រព្យ​នោះ​ទេ។

ទោះបីជាមានវិវាទពន្ធដែលកំពុងបន្តក៏ដោយ ក៏ភ្នាក់ងាររបស់ Lee Joon-gi នៅតែអះអាងថា តារាសម្តែងរូបនេះបានសហការយ៉ាងពេញលេញជាមួយអាជ្ញាធរ និងប្តេជ្ញាដោះស្រាយបញ្ហារកាំរកូសប្រកបដោយតម្លាភាពបំផុត៕

អត្ថបទ៖ សាង ស្រីល័ក្ខ

ចុចអាន៖កោះជេជូ រំពឹងទេសចរណ៍កាន់តែរីកចម្រើនក្រោយរឿង«When Life Gives You Tangerines» កំពុងល្បីល្បាញ