ព័ត៌មានអន្ដរជាតិ

ម៉ាឌូរ៉ូ អួតថា វ៉េណេស៊ុយអេឡាមានមីស៊ីលរុស្ស៊ី ៥០០០គ្រាប់ ខណៈអាមេរិកពង្រីកវត្តមានយោធានៅការីប៊ីន

បានផុស

៩ ខែ មុន

នៅ

ថ្ងៃព្រហស្បតិ៍ ២៣ តុលា ២០២៥

ដោយ

Chheang

ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ បាននិយាយកាលពីថ្ងៃពុធទី២២ខែតុលាថា ប្រទេសរបស់លោកបានដាក់ពង្រាយមីស៊ីលប្រឆាំងយន្តហោះចម្បាំង Igla-S ដែលផលិតដោយរុស្ស៊ីចំនួន ៥ ០០០គ្រាប់នៅទូទាំងទីតាំងការពារដែនអាកាសសំខាន់ៗ ខណៈដែលមានភាពតានតឹងចំពោះការកើនឡើងសកម្មភាពយោធារបស់សហរដ្ឋអាមេរិកនៅក្នុងតំបន់ការ៉ាប៊ីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកម៉ាឌូរ៉ូ បាននិយាយនៅក្នុងសុន្ទរកថាតាមទូរទស្សន៍ថា «កងកម្លាំងយោធានៅក្នុងពិភពលោកសុទ្ធតែដឹងពីអំណាចរបស់ Igla-S ហើយប្រទេសវ៉េណេស៊ុយអេឡាមានមិនតិចជាង ៥ ០០០គ្រាប់ទេ»។

មីស៊ីល Igla-S ផលិតដោយរុស្ស៊ី គឺជាមីស៊ីលរយៈចម្ងាយខ្លីចល័ត ដែលអាចកំណត់គោលដៅលើយន្តហោះគ្មានមនុស្សបើក ឧទ្ធម្ភាគចក្រ និងយន្តហោះហោះហើរទាប។

ការកត់សម្គាល់របស់មេដឹកនាំវ៉េណេស៊ុយអេឡា បានកើតឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា ទាហានម៉ារីន និងនាវិកចំនួន ៤ ៥០០នាក់ត្រូវបានដាក់ពង្រាយទៅកាន់តំបន់ការ៉ាប៊ីន ដែលជាផ្នែកមួយនៃប្រតិបត្តិការប្រឆាំងគ្រឿងញៀន និងបានបង្ហើបអំពីសកម្មភាពប្រតិបត្តិការដីគោកបន្ថែមទៀតនៅក្នុងប្រទេសវ៉េណេស៊ុយអេឡា។ លោកត្រាំ បានប្រាប់អ្នកយកព័ត៌មានថា «យើងពិតជាកំពុងចង់ធ្វើប្រតិបត្តិការដីគោកឥឡូវនេះ ពីព្រោះយើងគ្រប់គ្រងដែនសមុទ្របានយ៉ាងល្អ»។

ទីក្រុងវ៉ាស៊ីនតោនបានចោទប្រកាន់លោកម៉ាឌូរ៉ូ ពីបទមានទំនាក់ទំនងទៅនឹងក្រុមជួញដូរគ្រឿងញៀន ហើយបានចាត់តាំងសហការីរបស់គាត់មួយចំនួនជាផ្នែកនៃ«បណ្តាញភេរវកម្ម»។ ខណៈពេលដែលមន្ត្រីអាមេរិកនិយាយថា អន្តរាគមន៍យោធានៅតែជាជម្រើស គោលដៅចម្បងរបស់ពួកគេគឺដាក់សម្ពាធឲ្យលោកម៉ាឌូរ៉ូចុះចេញពីតំណែងតាមរយៈការដាក់ទណ្ឌកម្ម និងការគំរាមកំហែងនៃកងកម្លាំង។

លោកម៉ាឌូរ៉ូ បានឆ្លើយតបដោយការចល័តទ័ព និងអះអាងថា កងជីវពលស្ម័គ្រចិត្តរាប់លាននាក់ត្រៀមខ្លួនប្រយុទ្ធដើម្បីការពារជាតិ។ ទោះជាយ៉ាងណា អ្នកវិភាគបានចោទសួរទាំងទំហំ និងការហ្វឹកហាត់របស់កងកម្លាំងទាំងនោះ។

ទូរទស្សន៍ CNN បានកត់សម្គាល់ថា មីស៊ីល Igla-S ពិតជាស្ថិតនៅក្នុងឃ្លាំងអាវុធរបស់ប្រទេសវ៉េណេស៊ុយអេឡាជាយូរមកហើយ ទោះបីជាចំនួនដែលអះអាងដោយលោកម៉ាឌូរ៉ូ មិនត្រូវបានផ្ទៀងផ្ទាត់ដោយឯករាជ្យក៏ដោយ៕