អនុទីន ទទួលស្គាល់ថា ថៃ កំពុងរងសម្ពាធពីអន្តរជាតិ ឲ្យកម្ចាត់ Scammer បើមិនដូច្នោះនឹងទទួលទណ្ឌកម្ម

នាយករដ្ឋមន្ត្រីថៃ អនុទីន​ ឆានវីរៈគុល បានទទួលស្គាល់ដោយចំហថា ប្រទសថៃ កំពុងរងសម្ពាធឲ្យកម្ចាត់បណ្តាញឧក្រិដ្ឋកម្មតាមអនឡាញ (Scam) បើមិនដូច្នោះទេ អាចរងការដាក់ទណ្ឌកម្មពីអន្តរជាតិ។ នេះបើតាមការផ្សាយរបស់ The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំជាមួយមន្ត្រីអ្នកមុខអ្នកការមកពីស្ថាប័នមានសមត្ថកិច្ច កាលពីថ្ងៃអាទិត្យទី២ខែវិច្ឆិកាឆ្នាំ២០២៥ លោកអនុទីន បានបញ្ជាក់យ៉ាងច្បាស់ថា នាយកដ្ឋានប្រឆាំងការសម្អាតប្រាក់ (AMLO) ត្រូវតែដោះស្រាយបញ្ហានេះដោយផ្ទាល់ឲ្យបាន បើមិនចង់ឲ្យមានការដាក់ទណ្ឌកម្ម។ ថៃ កំពុងរងសម្ពាធខ្លាំ​ងណាស់ទាំងពីក្នុងប្រទេសនិងអន្តរជាតិ។ បើថៃប្រឆាំង Scammer មិនបានទេនោះ ថៃមិនមែនត្រឹមរងពាក្យរិះគន់ចំពោះភាពអសកម្មប៉ុណ្ណោះទេ ប៉ុន្តែអាចនឹងត្រូវអន្តរជាតិទុកចោលឲ្យនៅឯកោទៀតផង។

យ៉ាងណា ប្រធានក្រុមប្រឹក្សាភិបាល AMLO លោក Chatchai Promlert លើកឡើងថា (AMLO) បានចាត់វិធានការរួចហើយប្រឆាំងនឹងគណនីក្លែងក្លាយ ជាង ៨០០ ០០០ គណនី ហើយបានបង្កកប្រាក់ប្រមាណ ៣ ពាន់លានបាត នៅក្នុងប្រព័ន្ធ ប៉ុន្តែក្របខ័ណ្ឌច្បាប់ដែលមានស្រាប់ និងបច្ចេកវិទ្យាមានកម្រិត បានរារាំងដល់ការអនុវត្តច្បាប់។

រម្លឹកទៅកាលពីចុងខែតុលា កាសែត New York Times បានលាតត្រដាងយ៉ាងច្បាស់ថា ប្រទេសថៃ គឺជាច្រកឆ្លងកាត់សម្រាប់ក្រុម Scam ដែលបោកប្រាស់ជនជាតិអាមេរិកអស់ប្រាក់១៦.៦ពាន់លានដុល្លារ។

ក្នុងអត្ថបទចេញផ្សាយកាលពីថ្ងៃព្រហស្បតិ៍ទី២៣ខែតុលាឆ្នាំ២០២៥ New York Times បានដកស្រង់ប្រភពពីក្រសួងរតនាគារអាមេរិក ដោយសរសេរថា ជនជាតិអាមេរិក បានចាញ់បោកដោយសារតែអំពើឧក្រិដ្ឋកម្មនោះ ខណៈក្រុម Scam បានប្រើអាកាសយានដ្ឋានក្នុងប្រទេសថៃ ធ្វើជាស្ពានចម្លងសម្រាប់ទង្វើឆបោកនិងជួញដូរទៅកន្លែងផ្សេង។

លើសពីនេះ បើយោងតាមអត្ថបទដដែល, មនុស្សត្រូវបានគេល្បួងឲ្យមកប្រទេសថៃដើម្បីបំពេញការងារដែលពួកគេគិតថា ជាការងារបម្រើសេវាអតិថិជន ឬបច្ចេកវិទ្យាព័ត៌មានជាដើម។

បន្ទាប់ពីទៅដល់ទីក្រុងបាងកក អ្នកទាំងនោះ ត្រូវបានគេនាំឆ្លងដែនថៃ យកទៅឃុំឃាំងនៅក្នុងបរិវេណអាគារប្រទេសផ្សេង ហើយជាញឹកញាប់រងការធ្វើបាបរាងកាយ និងធ្វើទារុណកម្មថែមទៀតផង៕

អត្ថបទ៖ សុខ សុវណ្ណ

ចុចអាន៖ អនុទីនចេញមុខសុំទោស​ពលរដ្ឋ ក្រោយ​និយាយថា «ថៃ​រំលោភបំពាន​លើ​កម្ពុជា»